Azərbaycan İlahiyyat İnstitutunun əməkdaşları tərəfindən Qazaxda maarifləndirici tədbir keçirilib
Bu gün Qazaxda Azərbaycan Respublikasının Dini Qurumlarla İş üzrə
Dövlət Komitəsinin tabeliyində olan Azərbaycan İlahiyyat İnstitutunun (Aİİ) 2019-2020-ci
tədris ili üçün İnstituta yüksək intellektli və savadlı gənclərin cəlb olunması
məqsədilə maarifləndirici tədbir keçirilib. Qazax Rayon İcra
Hakimiyyətinin təşkilatçılığı ilə Qazax Gənclər Mərkəzində keçirilən tədbirdə
Rayon İcra Hakimiyyətinin başçısı Rəcəb Babaşov, icra aparatının məsul işçiləri,İlahiyyat
İnstitutunun rektoru, İlahiyyat üzrə fəlsəfə doktoru Ceyhun Məmmədov, İnstitutun dekanı Mirniyaz Mürsəlov, magistratura və
doktorantura şöbəsinin müdiri Fidan
Yusifova, Dini Qurumlarla İş üzrə Dövlət Komitəsinin əməkdaşları Rasim Tağıyev,
Ceyhun Rüstəmov, rayonda fəaliyyət göstərən din xadimləri, ümumtəhsil məktəblərinin direktorları və XI sinif
şagirdləri, Qazax Dövlət Sosial-İqtisadi Kollecin tələbələri, KİV nümyəndələri
iştirak ediblər. Tədbir iştirakçıları
əvvəlcə ulu öndər Heydər Əliyevin adını daşıyan parkda abidəsi önünə gül dəstəsi
qoyub, əziz xatirəsini dərin ehtiramla yad ediblər. Sonra ümummilli liderin
adını daşıyan Mərkəzdə həyat və fəaliyyətini əks etdirən stendlərlə tanış olub,
filmə baxıblar. Gənclər Mərkəzində
keçirilən tədbir İlahiyyat İnstitutunun tanıtım videoçarxının nümayişi
ilə başlayıb. Qazax Rayon İcra
Hakimiyyətinin başçısı Rəcəb Babaşov giriş sözü ilə çıxış edərək qonaqları
salamlayıb, tədbirin ilk dəfə olaraq Qazaxda keçirilməsinə görə İnstitutun rəhbərliyinə
minnətdarlığını bildirib. Tədbir iştirakçılarını müqəddəs Ramazan bayramının
başlanması münasibətilə təbrik edərək xoş arzularını çatdırıb. İcra başçısı Respublika Prezidenti İlham
Əliyevin təhsil sahəsinə göstərdiyi diqqət və qayğıdan bəhs edib. Rayon rəhbəri
Аzərbаycаn elminin, təhsilinin inkişafında ulu öndər Hеydər Əliyеvin misilsiz
xidmətləri olduğunu bildirib. Hazırda ümummilli liderin layiqli davamçısı İlham
Əliyevin ölkədə təhsil siyasətini uğurla davam etdirərək, onun inkişafına böyük
önəm verdiyini vurğulayıb. Rayon rəhbəri Azərbaycanda dövlət-din münasibətlərinin bu gün ən
yüksək səviyyədə tənzimləndiyini bildirib. Ölkəmizdə ulu öndər Heydər Əliyevin dinlə
bağlı siyasətinin bu gün ölkə başçısı İlham Əliyev tərəfindən uğurla davam
etdirildiyini bildirib. Bu gün Azərbaycanın multikultural ölkə kimi bütün
dünyada tanınmasında dövlət başçısının bu sahədə həyata keçirdiyi işlərin böyük
əhəmiyyət kəsb etdiyini qeyd edib. Azərbaycan İlahiyyət İnstitutunun
yaradılması haqqında sərəncam imzalamasını bu sahədə atılan ən uğurlu addım
kimi qiymətləndirib. Rayon rəhbəri qeyd edib ki, bu gün elə bir sahə tapılmaz
ki, orada Qurani-Kərimdə olan ayələrə müraciət olunmasın. Çünki müqəddəs
kitabdakı ayələrlə tanış olan zaman bir daha əmin oluruq ki, doğrudan da həmin
Qurani-Kərim bütün elmlərin şahıdır. İcra başçısı vurğulayıb ki, bizim üçün də
sevindirici hal olar ki, İlahiyyat İnstitutunda da qazaxlı tələbələr olsun və
ölkəmizə bu sahədə öz töhfələrini versinlər. Aİİ rektoru Ceyhun Məmmədov çıxış edərək iştirakçıları
salamlayıb, tədbirin belə yüksək səviyyədə təşkil olunmasına görə rayon rəhbərliyinə
minnətdarlığını bildirib. Müqəddəs Ramazan bayramı münasibətilə təbriklərini
çatdırıb. Rektor qeyd edib ki, ulu öndər Heydər Əliyevin miras qoyduğu, özündə
yüksək norma və dəyərlər sistemini ehtiva edən ənənələri bu gün Prezident İlham
Əliyev uğurla davam etdirir. Bildirib ki, dövlət başçısının yüksək diqqət və
qayğısı ilə icra olunan dövlət proqramları təhsil sisteminin inkişafına, uğurlu
nəticələrin qazanılmasına xidmət göstərir. İnstitut
haqqında məlumat verən C.Məmmədov ali təhsil müəssisəsinin Respublika Prezidenti İlham Əliyevin 9 fevral
2018-ci il tarixli sərəncamı ilə yaradıldığını bildirib. Qeyd edib ki, İnstitut Azərbaycan
xalqının tarixi ənənələrinə söykənən və dövlət siyasətinin məntiqi nəticəsi
olan yüksək dini-mənəvi mühitin qorunub saxlanılması, inkişafı və dini
fəaliyyətin təşkili sahəsində yüksəkixtisaslı kadrların hazırlanmasının təmin
olunması məqsədilə yaradılıb. Təhsil müəssisəsinin fəaliyyətindən bəhs edən rektor tələbələrə dəstək xidmətləri, məzunlar üçün iş
imkanları haqqında ətraflı məlumat verib. Qeyd edib ki, bu gün
ölkəmizdə bütün sahələrdə olduğu kimi, din sahəsində də yüksək ixtisaslı
peşəkar kadrların hazırlanmasına böyük ehtiyac vardır. İnstitut olaraq da əsas
məqsəd və hədəfimiz odur ki, bütün bölgələrimizi əhatə edək. Bu sahədə ölkə
başçısının istək və arzularına uyğun peşəkar mütəxəssislərin hazırlanmasında böyük
səylə çalışaq və töhfəmizi verək. Fəaliyyət göstərdiyi 1 il ərzində xeyli sayda
uğur və nailiyyətlərin qazanıldığını söyləyən C.Məmmədov bu sahədə görülən
işlərdən də danışıb. İnstitutda tələbələrə tədrislə yanaşı, tərbiyə, mənəvi
dəyərlərə, öz ölkəsinə, xalqına, Vətəninə layiqli vətəndaş kimi formalaşmağı da
təbliğ etdiklərini bildirib. Bundan əlavə, tələbələrin zəngin dünyagörüşünə
sahib olmaları, intellektli, savadlı, bilikli kadrlar kimi yetişmələri üçün də
məqsədyönlü tədbirlər həyata keçirildiyini, bu səpkidə görüşlər təşkil
olunduğunu qeyd edib. Aİİ-nin
İlahiyyat fakültəsinin dekanı Mirniyaz Mürsəlov ali təhsil müəssisəsinin tədris
prosesi, keçirilən fənlər haqqında məlumat verib. Aİİ-də qarşılıqlı etimada
əsaslanan şəffaf müəllim-tələbə münasibətlərinin hökm sürdüyünü vurğulayan
M.Mürsəlov tələbələrin daha yaxşı təhsil almaları üçün İnstitutda yaradılan
şəraitdən söhbət açıb. O, bu gün 100-dən çox tələbənin təhsil aldığı ali təhsil müəssisəsinin keyfiyyətli tədrisi təmin
edəcək kadr potensialına malik olduğunu bildirib. Qeyd edib ki, İnstitutda
dinşünaslıq, islamşünaslıq və xarici dillər kafedraları fəaliyyət göstərir ki,
burada dərslər
ingilis və ərəb dillərində sərbəst şəkildə mühazirə oxuya bilən, öz sahələrində
dərin biliyə malik olan alimlər tərəfindən aparılır. Aİİ-ninmagistratura
və doktorantura şöbəsinin müdiri Fidan Yusifova təqdimatla çıxış edərək, ali
təhsil müəssisəsinə qəbul prosesinin təşkili, həmçinin, mövcud ixtisaslar haqqında geniş məlumat verib. O, qeyd edib ki, İnstituta qəbul olunmuş hər bir
abituriyent dövlətin qayğı və diqqəti ilə yaradılmış lazımi şəraitdən,
ödənişsiz təhsil və digər imtiyazlardan tam yararlanacaq. F.Yusifova
tələbələrin ödənişsiz geyim və yeməklə təmin ediləcəklərini, dərslərdən əlavə,
ayrıca xarici dil kurslarına cəlb olunacaqlarını və digər üstünlüklərə
yiyələnəcəklərini bildirib. Sonra tədbir iştirakçılarını maraqlandıran
suallar cavablandırılıb. Aİİ-nin ictimai fəaliyyətini əks etdirən materiallar paylanılıb. Qazax Rayon İcra Hakimiyyətinin başçısı Rəcəb
Babaşov tədbirə yekun vuraraq bu cür görüşlərin böyük əhəmiyyət daşıdığını bir
daha vurğulayıb və İnstitutun kollektivinə gələcək işlərində uğurlar arzulayıb.
Facebook-da paylaş