Daş Salahlı kəndi 2018-ci ili uğurla başa vurub
Qazax
Rayon İcra Hakimiyyəti başçısının Daş Salahlı kənd İnzibati Ərazi Dairəsi üzrə
nümayəndəliyində 2018-ci ildə görülmüş işlər və qarşıda duran vəzifələrə dair hesabat
yığıncağı keçirilib. A.Əmilov
adına Daş Salahlı kənd 1 saylı tam orta məktəbində keçirilən hesabat
yığıncağında Qazax Rayon İcra Hakimiyyətinin başçısı Rəcəb Babaşov, aparatın məsul
işçiləri, hüquq-mühafizə orqanlarının, Idarə, müəssisə və təşkilatların rəhbərləri
və kənd sakinləri iştirak ediblər. Yığıncağı aparmaq üçün sədr və katib seçildikdən sonra gündəlikdə
duran məsələlər barədə məlumat verilib.
Qazax
Rayon İcra Hakimiyyətinin başçısı Rəcəb Babaşov yığıncağı giriş sözü ilə açaraq
bildirib ki, əsası ulu öndər Heydər Əliyev tərəfindən
qoyulan dövlət siyasəti bu gün ölkə başçısı İlham Əliyevin rəhbərliyi altında
uğurla davam etdirilir. Bu inkişaf və tərəqqini dövlət başçısının məqsədyönlü
siyasəti nəticəsində ölkəmizin son 15 ildə qazandığı uğur və nailiyyətlərdən də
aydın şəkildə görmək olar. Son illərdə ölkəmizin beynəlxalq aləmdə mövqeyinin və
nüfuzunun artması, bütün sahələr üzrə güclü dövlət kimi tanınması bunun bariz
nümunəsidir. Rayon rəhbəri qeyd edib ki, 2019-cu
il yanvar ayının 11-də Respublika Prezidenti İlham Əliyevin sədrliyi ilə Nazirlər
Kabinetinin 2018-ci ilin sosial-iqtisadi inkişafının yekunlarına və qarşıda
duran vəzifələrə həsr olunmuş geniş iclası keçirilmişdir. İclasda ölkə başçısı
2018-ci il ərzində Azərbaycanda həyata keçirilmiş genişmiqyaslı işlərə,
qazanılan uğur və nailiyyətlərə öz münasibətini bildirmiş, qarşıda duran vəzifələrdən
danışmışdır. Ölkə başçısı öz çıxışında ölkəmizin uğurla və hərtərəfli inkişaf
etdiyini, bütün sahələrdə dinamik inkişafın təmin olunduğunu bildirmişdir. İcra
başçısı bildirib ki, başa vurduğumuz 2018-ci il ölkəmizin hər yerində olduğu
kimi, Qazax rayonu üçün də hər bir sahədə uğurlu olmuşdur. Bunu istər sosial
obyektlərin inşasında, istər kənd təsərrüfatının inkişafında, istərsə də təhsil,
səhiyyə, mədəniyyət, idman və digər sahələrdə əldə etdiyimiz nailiyyətlər söyləməyə
əsas verir. Rayonumuzda barama, tütün, kartof və taxıl sahələrindən
götürdüyümüz bol məhsuldarlıq sayəsində deyə bilərik ki, 2018-ci il kənd təsərrüfatı
üçün məhsuldar bir il olmuşdur. Rayon rəhbəri
bildirib ki, Qazax rayonunda da kənd təsərrüfatının inkişaf etdirilməsi istiqamətində
məqsədyönlü işlər görülür. Bu gün rayonda kənd təsərrüfatı sahəsində olan bu
uğuru ildən-ilə artan əkin sahələrinin hektarından da aydın şəkildə görmək
olur. Belə ki, 2016-cı ildə 16520,6 hektarda, 2017-ci ildə 18694,37 hektarda əkin
aparılmışdısa, 2018-ci ildə bu rəqəm 20682 hektar olmuşdur. 2019-cu ildə isə
21481,30 hektarda əkin işlərinin aparılması nəzərdə tutulmuşdur. "2018-ci
il həm də Qazax rayonu üçün tikinti-quruculuq ili kimi yadda qaldı”, - deyən
rayon rəhbəri ”Azərxalça” ASC tərəfindən tikilən xalça müəssəsinin,
”Mətanət A” şirkəti tərəfindən inşa edilmiş Əhəng zavodunun, hazırda son
tamamlanma işləri aparılan İkinci Şıxlı kəndində ”İnvestel GROUP” MMC tərəfindən
tikilən Aqroparkın, "Gedik Carçı Qaynaq” LTD şirkəti tərəfindən
inşa edilən "Gedik-Carçı” Elektrod Zavodunun, 145 çarpayılıq
rayon mərkəzi xəstəxanasının tikintisini 2018-ci ilin uğurlu il olmasının əyani
sübutu kimi qiymətləndirib. Rayon
rəhbəri qeyd edib ki, sərhəddə yaşayan bir rayon üçün müasir standartlara cavab
verən xəstəxananın olması olduqca vacib məsələ idi. Ölkə başçısının diqqət və
qayğısı sayəsində bu məsələ öz müsbət həllini tapdı və bu gün 5 korpus yüksək səviyyədə
inşa olunub. Əlavə 3 korpusun inşası nəzərdə tutulur. Bütün bunlar bir daha onu
sübut edir ki, Qazaxda səhiyyə sahəsinə olan qayğı diqqət mərkəzindədir. Ölkə
başçısının yeni avtomobil yollarının çəkilməsi ilə bağlı verdiyi tapşırıq və
tövsiyələrə, Sərəncamlara uyğun olaraq Qazaxda bu sahədə məqsədyönlü işlərin
görüldüyünü qeyd edən icra başçısı rayonda olan təmirli yollardan söz açıb.
Bildirib ki, bu gün rayonda olan yüksək keyfiyyətli yollara misal olaraq Qazaxbəyli-Orta
Salahlı-Aşağı Salahlı, Yuxarı Salahlı-Kəmərli, Kosalar, Quşçu Ayrım, Canalı,
Çaylı, Bala Çaylı, Hüseynbəyli, Cəfərli kəndlərində yeni asfalt yolların çəkilişini,
Daş Salahlı-Ürkməzli-Dəmirçilər kənd yolunun isə yenidən bərpası göstərə bilərik. Ölkəmizdə elmin, təhsilin
inkişafında Qazaxın xüsusi rolu olduğunu qeyd edən rayon rəhbəri bildirib
ki, Qazax Müəllimlər Seminariyasının 100
illik yubileyinin qeyd olunması ilə bağlı ölkə başçısının 3 noyabr 2018-ci il
tarixli Sərəncam verməsi bunu bir daha sübut etdi. Bu Sərəncam onu göstərdi ki,
Qazax hər zaman ziyalılar, tarixi şəxsiyyətlər yurdu olub və bu, bundan sonra da
belə olacaqdır. Təkcə Qazax Müəllimlər Seminariyası onu deməyə əsas verir ki,
rayonda savadlı gənclər ordusu yetişir, bilikli gənclərimizin sayı günü-gündən
artır İcra
başçısı respublikamızda, eləcə də bölgələrimizdə təhsilin inkişafı üçün görülən
məqsədyönlü işlərdən də danışıb. Ölkəmizdə "Yeniləşən Azərbaycana yeni
məktəb” layihəsinin uğurla icra edildiyini bildirən rayon rəhbəri hazırda
rayonumuzda əsaslı şəkildə yenidən qurulan 964 şagird yerlik S.Vurğun adına
şəhər 2 nömrəli tam orta məktəbdə görülən işləri bunun əyani sübutu kimi
qiymətləndirib. Bundan əlavə, bu il rayonda daha 3 məktəbin – Kosalar, Qaymaqlı
və Kəmərli kənd məktəblərinin də əsaslı şəkildə yenidən qurulmasının nəzərdə
tutulduğunu bildirib. Rayon
rəhbəri vurğulayıb ki, ölkə başçısının, təhsil nazirinin təhsil sahəsinə
göstərdikləri diqqət və qayğının nəticəsidir ki, bu sahə gündən-günə inkişaf
edir, qazanılan uğurları, əldə edilən nailiyyətləri ilə seçilir. Sevindirici
haldır ki, dövlət tərəfindən göstərilən bu qayğını yüksək dəyərləndirən qazaxlı
məktəblilər öz uğurları ilə ölkə təhsilinə töhfə verirlər. Bu il qəbul
imtahanlarının nəticələrinə görə Qazaxın respublika məktəbləri arasında 3-cü
yerdə dayanması, "Ölkəmizi tanıyaq” tur-aksiyasından birinci yeri tutaraq qalib
kimi qayıtmaları bütün bu dediklərimizin əyani sübutudur. Bağçalarda
aparılan əsaslı yenidənqurma işlərindən söz açan icra başçısı yola saldığımız
2018-ci ilin bu sahədə əlamətdar olduğunu qeyd edib. Qazax rayonu üzrə olan 25
bağçadan 18-də müasir standartlara cavab verən şəraitin yaradılmasını, bu gün
açılışını etdiyimiz şəhər 6 saylı bağçanın körpə fidanların istifadəsinə verilməsini
yüksək dəyərləndirib. Bağçalarla bağlı görülən işlərin bu il də uğurla davam
etdiriləcəyini vurğulayan rayon rəhbəri Daş Salahlı kəndində də 1 bağçanın əsaslı
şəkildə yenidən qurulmasının nəzərdə tutulduğunu qeyd edib. Rayon
rəhbəri bildirib ki, yola saldığımız 2018-ci il əhalinin mənzil-məişət şəraitinin
yaxşılaşdırılması istiqamətində görülən işlərlə də yadda qalıb. Son iki il
yarımda rayonda olan 163 ədəd çoxmənzilli yaşayış binasından artıq 129-nun
yüksək səviyyədə təmir olunması və sakinlərin istifadəsinə verilməsi, bundan
əlavə, rayonda sakinlərin istəyini nəzərə alaraq çoxmənzilli binaların həyətlərində
xeyir-şər evlərinin tikilməsi bunun bariz nümunəsidir. Rayon rəhbəri həmin işlərin
uğurla davam etdirildiyini və şəhərdə daha 4 binanın təmirinə başlanıldığını
diqqətə çatdırıb. Yeni
iş yerlərinin yaradılması istiqamətində həyata keçirilən tədbirlərdən danışan rayon
rəhbəri həmin işlərin bu il də davam etdiriləcəyini qeyd edib. Buna misal
olaraq başlanılması nəzərdə tutulan su-kanalizasiya xəttinin, Gəncə-Qazax-Gürcüstan
dövlət sərhəddi avtomobil yolunun çəkilməsini, "Saloğlu” fərdi mebel
firması tərəfindən yeni tikiləcək fabrikin inşasını göstərib. Bildirib
ki, Azərbaycan Respublikasının Nazirlər Kabinetinin 21 sentyabr 2018-ci il
tarixli, 637s saylı Sərəncamı ilə Qazax rayonunun Ağköynək kəndi ərazisində
"Saloğlu” fərdi firması tərəfindən həyata keçiriləcək "Venzana” layihəsi
üçün nəzərdə tutulmuş 30.558 hektar torpaq sahəsi kənd təsərrüfatı təyinatlıdan
sənaye təyinatlı torpaqlar kateqoriyasına keçirilmişdir. Hazırda layihənin həyata
keçirilməsi üçün tikinti işlərinə başlanılmışdır. Bu isə rayonda yeni iş yerlərinin
açılması və əhalinin maddi rifah halının yaxşılaşdırılması deməkdir.
Sonra Daş
Salahlı kənd İƏD-si üzrə nümayəndə Tahir Hüseynli hesabat məruzəsi ilə çıxış edərək
bildirib ki, son illərdə, xüsusilə də 2018-ci ildə ölkəmizin qazandığıuuğurlardan görmək olar ki, Azərbaycan
inkişaf, tərəqqi, sabitlik ölkəsidir. Dünyada və bölgədə gedən proseslərdən
asılı olmayaraq Azərbaycan öz müstəqil yolu ilə, inkişaf yolu ilə uğurla gedir
və gedəcək. Respublikamızda
gedən hərtərəfli inkişaf rayonumuzda, eləcə də kəndlərimizdə də yüksək templə
davam etdirilir. İcra nümayəndəsi
bildirib ki, Daş Salahlı kəndi rayonun ən böyük kəndlərindən biridir. Kəndin
10585 nəfər əhalisi, 3019 təsərrüfatı, 6832 hektar ərazisi vardır. Kənd ərazisində
1 bələdiyyə, 2 tam orta məktəb, 3 körpələr evi–uşaq bağçası, 1 poçt-rabitə xidməti,
2048 nömrəli yeni elektron ATS və mobil telefon stansiyaları – Azərcell,
Bakcell və Nar mobile, 1 həkim məntəqəsi, 1 polis bölməsi, 2 polis məntəqəsi, 1
mədəniyyət evi, 2 kitabxana, 1 folklor evi, 1 klub, "Daş Salahlı” Sudan İstifadə
edənlər birliyi, 2 güləş dərnəyi, bir sıra respublika əhəmiyyətli sənaye obyekləri
- 8 ədəd daş karxanası, "AKKORD” sement zavodu, "Azrosprominvest” MMC, "Mətanət
A” şirkəti, "Gilan” MMC, "AAC” MMC kimi müəssisələr fəaliyyət göstərir ki, həmin
təşkilatlarda yüzlərlə Daş Salahlı kənd sakinləri işlə və yüksək əmək haqqı ilə
təmin olunmuşlar. Bu da kənd əhalisinin maddi rifah halının yaxşılaşması üçün
vacibdir. Kənd ərazisində
fəaliyyət göstərən Araz Əmilov adına Daş Salahlı kənd 1 saylı tam orta məktəbində
745 nəfər şagird təhsil alır ki, onların tərbiyəsi ilə 90 nəfər müəllim məşğul
olur. 26 nəfər texniki işçi işləyir. Hesabat ilində 1 saylı məktəbin 41
nəfər məzunu olmuş, onlardan 20 nəfəri ali məktəblərə sənəd vermiş, 19 nəfər
ali və orta ixtisas məktəblərinə qəbul olunmuşdur. Ali məktəblərə daxil olan məzunların
2 nəfəri 500-dən, 6 nəfəri isə 400-dən yuxarı bal toplamışdır. Şahin Cəbiyev
adına Daş Salahlı kənd 2 saylı tam orta məktəbində isə 608 nəfər şagird təhsil
alır ki, onların tərbiyəsi ilə 69 nəfər müəllim məşğul olur. 21 nəfər texniki işçi çalışır. 2018-ci ildə 2 saylı məktəbin 26 nəfər məzunu olmuş, onlardan 13 nəfəri
ali məktəblərə sənəd vermişdir. Ali məktəbə daxil olmaq üçün sənəd vermiş həmin
məzunlardan 12 nəfəri ali təhsil ocaqlarına qəbul olunmuş, 2 nəfər 600-dən, 4 nəfər
isə 500-dən yuxarı bal toplamışdır.
Əvvəlki illərdə
olduğu kimi, ötən il Daş Salahlı kəndi üçün də uğurlu olmuşdur. Belə ki,
2018-ci ildə rayon rəhbərliyinin köməkliyi ilə bir sıra işlər görülmüşdür. Kənd
əhalisinin rabitə xidmətinin yaxşılaşdırılması məqsədilə 150 telefon nömrəlik
daxili xətt şəbəkəsi genişləndirilərək əhalinin istifadəsinə verilmiş, Qazax
Sement zavoduna məxsus su xəttindən kənd qəbiristanlığına 40 mm-lik boru ilə
1,3 kilometr uzunluğunda yeni su xətti çəkilmiş, kəndin Səməd Vurğun küçəsindəki
300 mm-lik məişət su xəttinin 500 metrlik hissəsi dəyişdirilərək təmir
edilmişdir. Rayon rəhbərliyinin
və Daş Salahlı bələdiyyəsinin köməkdarlığı hesabına "Dəli qac” adlanan daxili
suvarma arxının yeni beton üzlüyə alınmasına və kənd ərazisindəki məişət
tullantılarının tökülməsi üçün 1 hektar ərazidə iritutumlu quyunun qazılmasına
və ətrafının metal torla əhatəyə alınması işlərinə başlanılmışdır. Hazırda işlər
davam etdirilir. Kənddaxili yollarda yaranan çala-çuxurlar mütəmadi olaraq
qum-çınqıl verilərək hamarlanır. 12 sentyabr
2018-ci il tarixində Qazax rayonunda olan "Asan Qatar”ın nümayəndə heyəti Daş
Salahlı kəndindəki uşaq bağçasında olmuş, Rayon İcra Hakimiyyəti başçısının
iştirakı ilə 51 nəfər uşağa şəxsiyyət vəsiqələrini təqdim etmişlər. Ötən il
rayon rəhbərliyinin köməkliyi ilə Qarabağ müharibəsi əlili Kərimov Mahmud Yasin
oğluna və kənd sakini Əliyev İlham Vəli oğlunun ailələrinə ev tikintisi üçün
lazım olan tikinti materialları alınaraq verilmişdir. Hesabat ilində
kənd əhalisinin köməkliyi ilə kənd ərazisində iməciliklər təşkil olunmuş və ərazidə
yerləşən qəbiristanlıq mütəmadi olaraq alaq otlarından biçilərək təmizlənmiş, səliqə-səhman
yaradılmışdır. Respublikamızda
kənd təsərrüfatına aid aparılan məqsədyönlü fəaliyyət Daş Salahlı kəndində də
uğurla davam etdirilir. Son 3 ilin statistik rəqəmlərinə baxsaq bunu aydın şəkildə
görərik. Belə ki, 2016-cı ildə cəmi əkin sahəsi 1980,8 hektar olduğu halda, 2018-ci
ildə 647,5 hektar və ya 33 faiz artaraq 2628,3 hektara çatmışdır. Artan əkin
sahələrindən 405 hektarında buğda və arpa, 242,5 hektarında isə digər kənd təsərrüfatı
məhsulları əkilmişdir. Daş Salahlı sakinləri hər il olduğu kimi, bu il də taxıl
zəmilərindən yüksək məhsuldarlıq əldə etmişlər. Əkilmiş 1205 hektar buğda sahəsindən
4422,4 ton, yəni hektara 36,7 sentner, 700 hektar arpa sahəsindən isə 1750 ton
və ya hektara 24,5 sentner məhsul götürmüşlər. 2019-cu il
üçün Daş Salahlı ərazisində 2633,9 hektar sahədə əkin aparılması nəzərdə
tutulmuşdur ki, bunun da 1205 hektarında buğda, 700 hektarında arpa, 728,9
hektarında isə yonca və digər kənd təsərrüfatı məhsullarının əkilməsi nəzərdə
tutulmuşdur. Bu günədək 1965 hektar ərazidə şumlama işləri aparılmış, 1131
hektar sahədə payızlıq buğda, 700 hektar sahədə isə arpa əkini başa
çatdırılmışdır. 2018-ci il
taxılçılar kimi baramaçılar üçün də uğurlu il olmuşdur. 300 kq barama planına
qarşı baramaçılar 470 kq barama yetişdirərək "Şəki-İpək” ASC-nin nümayəndələrinə təhvil
vermişlər ki, qarşıya qoyulmuş tapşırığa 157 faiz əməl olunmuşdur. 2018-ci ildə
kənd ərazisində 2 hektar tütün əkilmiş, sahələrdən 3491 kq tütün yığılaraq
tütün fabrikinə təhvil verilmiş, plana 107 faiz əməl edilmişdir. 2019-cu ildə də
kənd ərazisində 4 hektar tütün əkilməsi nəzərdə tutulmuşdur.
Kənd təsərrüfatı
məhsullarının inkişafındakı artımın əsas səbəblərindən biri də rayon rəhbərliyinin
bilavasitə rəhbərliyi ilə suvarma arxlarında aparılan təmizlik işləridir ki,
uzun illərdir diqqətdən kənarda qalmış arxlarda son 3 il ərzində çox böyük işlər
görülmüşdür. Belə ki, əhalinin suya olan tələbatını vaxtında və itkisiz ödəmək
üçün 2016-2017-ci təsərrüfat ilində 25,3 km arxın təmizlənməsi nəzərda
tutulmuş, 26,32 km arx təmizlənmişdir. Bunun da 20,84 km–i texnika, 5,48 km-i
isə əl əməyi ilə təmizlənmişdir. 2017-2018-ci təsərrüfat ilinə hazırlıq məqsədilə
18,39 km arx təmizlənmişdir ki, bunun da 13,89 km-i texnika, 4,5 km-i isə əl əməyi
ilə, 2018-2019-cu təsərrüfat ili üçün isə nəzərdə tutulan 17,25 km arx təmizlənərək
təsərrüfat sahiblərinin ixtiyarına verilmişdir. Suvarma arxlarının təmizlənməsində
Qazax Suvarma Sistemləri İdarəsinin texnikalarından, ”Daş Salahlı” SİB-in işçilərindən
və kənd əhalisinin köməyindən istifadə olunmuşdur. Sahibkarların torpaqlarının əkib
becərilməsində kənd ərazisində fəaliyyət göstərən mexanizatorlar və aqro lizinq
xidmət işçiləri yaxından iştirak edirlər. Belə ki, kənd əhalisinə xidmət üçün
21 traktor, 13 kotan, 9 taxılbiçən kombayn, 8 toxumsəpən, 5 otbiçən QDR, 4 gübrə
səpən, 5 dırmıq, 7 otbağlayan və digər kənd təsərrüfat texnikaları mövcuddur. Hesabat ilində
kənd təsərrüfatı məhsulları əkən 1652 nəfər əməkçiyə müəyyən olunmuş qaydada yanacaq
və sürtkü yağlarına görə 161542 manat subsidiya ödənilmişdir. 01.01.2019-cu il tarixə əhali və fermer
təsərrüfatlarında 4502 baş iribuynuzlu, 32070 baş xırdabuynuzlu heyvan, 11000
baş quş qeydiyyata alınmışdır. 5 dekabr 2018-ci il tarixdə 12 nəfər arıçıya
məxsus 250 yeşik arı ailəsi birkalanıb, qeydiyyata alınıb, akt tərtib
olunmuşdur. Hesabat ilində
Daş Salahlı kənd nümayəndəliyi "Vətəndaşların müraciətlərinə baxılması qaydası
haqqında” Azərbaycan Respublikasının Qanunu ilə müəyyən edilmiş qaydada vətəndaşların
qəbulunu həyata keçirmiş, onların ərizə, təklif və şikayətlərinə baxılaraq lazımi
tədbirlər görülmüşdür. Hesabat dövründə vətəndaşlardan 35 yazılı ərizə daxil
olmuş və ərizələrin hamısı müsbət həllini tapmışdır. Vətəndaşları narahat edən
müxtəlif formada 71 şifahi müraciət daxil olmuşdur. 2018-ci ildə yuxarı icra
orqanlarından, idarə və təşkilatlardan cəmi 36 məktub daxil olmuşdur. Hesabat
dövründə nümayəndəlik ərazisində 150 nəfərin nigah qeydiyyatı, 132 nəfərin
doğum qeydiyyatı, 62 nəfərin isə ölüm qeydiyyatı aparılmışdır. Daş Salahlı kəndi
Qarabağ müharibəsi zamanı 21 şəhid vermişdir. Qazax Rayon İcra Hakimiyyətinin başçısı Rəcəb Babaşov fəaliyyətə
başladığı ilk gündən şəhidlərimizin ruhunu əziz tutaraq şəhid ailələrinə,
onların doğmalarına, yaxınlarına daim diqqət və qayğı göstərir. Hər zaman
onların problemləri ilə maraqlanıb, qarşılaşdıqları çatışmazlıqların həlli
istiqamətində saysız-hesabsız işlər görüb. Nümayəndəlik ərazisində yaşayan şəhid
ailələrinə, imkansız ailələrə Qazax Rayon İcra Hakimiyyəti tərəfindən Yeni
il, Novruz və Qurban bayramları münasibətilə bayram sovqatları verilmişdir.
Daş Salahlı kənd
Polis bölməsinin rəisi Şakir Rüstəmov çıxış edərək qeyd edib ki, kənd ərazisində
Qazax rayon Polis şöbəsinin Daş Salahlı kənd bölməsi və yeni tikilib istifadəyə
verilmiş Polis Məntəqəsi fəaliyyət göstərir. Bildirib ki, kənddə bütün işlər yaxşı
qurulmaqla ərazidə əmin-amanlığın, rahatlığın, firəvanlığın qorunmasına xidmət
edir. Daş Salahlı kənd 1 saylı tam orta məktəbin direktoru Söylü Xəlilova, Daş
Salahlı kənd 2 saylı uşaq bağçasının müdiri Aybəniz Kərimova, bağçanın müəllimi
Çiçək Vəliyeva, Daş Salahlı kənd 2 saylı tam orta məktəbin sinif müəllimi Qətibə
Kazımova, ağsaqqal Akif Yusifov, şəhid bacısı Hicranə Məmmədova,
Yolçu Əliyev, II qrup Qarabağ müharibəsi əlili Mahmud Kərimov, Rəşad Cəfərov və
başqaları söz alaraq hesabat ilində kənddə görülən bütün işlərə görə kənd
sakinləri adından ölkə başçısı İlham Əliyevə öz dərin minnətdarlıqlarını
bildiriblər. Rayon İcra Hakimiyyətinin başçısı Rəcəb Babaşova sonsuz təşəkkürlərini
çatdırıblar. Sakinlər qeyd ediblər ki, bu gün istər şəhərin mərkəzində, istərsə
də kəndlərdə qaldırılan hər bir məsələ öz müsbət həllini tapır. Siz rayon rəhbərliyi
biz sakinlərlə görüşən zaman kənddə 1941-1945-ci il II Dünya müharibəsində həlak
olanların xatirəsinə ucadılmış abidənin təmir olunması barədə müraciət
etmişdik. Bu gün biz sevinirik ki, həmin müraciətimiz həll olundu və Abidə
Kompleksi yüksək səviyyədə əsaslı şəkildə təmir edilərək istifadəyə verildi.
Bundan başqa, kənddə bağçalarla bağlı məsələ qaldırmışdıq ki, sizin rəhbərliyiniz
sayəsində həmin məsələ də öz müsbət həllini tapdı. Bu gün kəndimizdə olan 3
uşaq bağçasından ikisi tam müasir standartlara cavab verən səviyyədədir. Bir təmirsiz
bağçamız qalıb ki, biz əminik ki, o da sizin uşaqlara olan sonsuz qayğınız sayəsində
yenidən əsaslı təmir olunacaqdır. Uzun illərdən bəri mövcud olan bir
problemimiz vardı ki, o da yol məsələsi idi. Artıq ölkə başçısının, siz rayon rəhbərliyinin
biz sakinlərə olan qayğısının nəticəsidir ki, kənddə yeni asfalt yolun çəkilməsinə
başlanılıb. İstər rayonda, istərsə də kəndimizdə olan bu dinamik inkişaf və
genişmiqyaslı abadlıq işləri bizi çox sevindirir. Biz bir daha əmin oluruq ki,
görülən işlərin təməlində, kökündə vətəndaş amili dayanır. Ən əsası da son iki
il yarımdır ki, Qazaxda həmin vətəndaş amili hər zaman ön planda tutulur. Ölkə
başçısının söylədiyi "Hər bir işin əsasında xalqa xidmət dayanır” cümləsinin
şahidi oluruq. Sakinlərin kənddə dayanacaq qoyulması üçün yerin ayrılması ilə
bağlı istəklərini dinləyən rayon rəhbəri aidiyyəti üzrə tapşırıq verib.
Qazax rayon İcra Hakimiyyətinin başçısı Rəcəb Babaşov yığıncağa yekun
vuraraq qeyd edib ki, 2019-cu ildə qarşıda daha mühüm vəzifələr durur. Rayon rəhbərliyi
dövlətimizin çiçəklənməsi naminə bu mühüm vəzifələrin həyata keçirilməsi
istiqamətində kənd sakinlərinə səmərəli fəaliyyət və uğurlar arzulayıb. GOYEZEN.AZ
Facebook-da paylaş