Milli dövlətçiliyin inkişafında Heydər Əliyevin həyatı və siyasi fəaliyyəti real faktdır
Azərbaycan bugünkü müstəqilliyinə nail olmaq və müstəqilliyini qoruyub
saxlamaq, əbədi və dönməz etmək üçün çətin və keşməkeşli tarixi bir yoldan
keçmişdir. Bu yolun mahiyyəti və sonrakı tarixi proseslərə təsiri Heydər Əliyev
kimi tarixi şəxsiyyətin yeni siyasi reallıqlarla nail olunan ümummilli
nəticələr ilə özünü sübuta yetirməkdədir. Heydər Əliyevin siyasi fəaliyyətinin
hədəfində duran azad və müstəqil dövləti qurmaq, onu qorumaq, tarixi reallığa
çevirmək məharəti olmadan bugünkü müstəqil, azad, bütöv və qalib Azərbaycanı
təsəvvür etmək mümkün ola bilməz. Böyük şəxsiyyətlər olmasaydı ölkələrin tarixi çox bəsit və maraqsız olardı.
Azərbaycan da müstəqilliyin şərəfli yolunda Heydər Əliyev kimi böyük şəxsiyyətin ideyalarının
və əməllərinin sayəsində inamlı addımlarla irəliləmiş, yıxılmamış və zirvəyə
çatmışdır. Azərbaycanın tarixi və taleyi XX əsrin son 30 ili və XXI əsrin
əvvələrində Heydər Əliyevin şəxsiyyəti və əzəmətli ideyaları üzərində qurulub.
Müstəqilliyin yaranmasından tutmuş onun indiki heyrətamiz inkişaf dinamikasına
qədər milli dirçəlişi əks etdirən tarixi dövr Heydər Əliyevin adı və onun
titanik fəaliyyəti ilə bağlıdır. Azərbaycanın tarixi iki böhranlı mərhələsi Heydər Əliyevin aktiv siyasi
dövrünə təsadüf edir. Hər iki dövrdə xalqın və ölkənin xilası, inkişafının
əsasının qoyulması Heydər Əliyevin möhtəşəm tarixi xidməti kimi dəyərləndirilir
və tarixdə şəxsiyyətin rolunun böyük əhəmiyyət daşıdığını sübut edir. XX əsrin
70-ci illərindən etibarən Azərbaycanın siyasi həyatı, bütövlükdə cəmiyyətimiz
Heydər Əliyevin sayəsində yeni mərhələyə qədəm qoydu. O zamandan başlayan böyük
tarixi mərhələdə Heydər Əliyev ideyaları inkişafımızın təməl daşı oldu. Həmin
dövr tariximizin sürətli və hərtərəfli inkişafı illəri kimi yaddaşlara yazıldı.
Məhz Heydər Əliyevin rəhbərliyi dövründə Azərbaycan malik olduğu böyük
intellektual və insan potensialı, təbii resursları, bir sözlə milli gücü cəmləyib sıçrayış
xarakterli yeniləşmə periodu yaşadı və 1993-cü ildə yeni tarixi mərhələyə başqa
siyasi reallıqlar çərçivəsində daxil olması artıq milli intibahın davamı oldu.
Azərbaycan öz dövlət müstəqilliyini bərpa etdikdən sonra ilk illərdə ölkədə
hakimiyyət uğrunda başlanan silahlı mübarizə, hakimiyyətlərin bir-birini əvəz
etməsi və çoxhakimiyyətliliyin hökm sürməsi müstəqil dövlətçiliyə ağır zərbələr
vurmuşdu. Ölkədə yaranmış ictimai-siyasi xaos, anarxiya, zorakılıq halları,
milli və vətəndaş qarşıdurmasının kəskinləşməsinə və hakimiyyətin tam iflasına
rəvac verirdi. Nəticədə, 1993-cü ilin yayında Azərbaycan dövlətçiliyi böhran və
məhv olmaq təhlükəsi qarşısında qalmış, ölkə vətəndaş müharibəsi və parçalanma
həddinə gətirilmişdi. Belə bir vəziyyətdə xalqın təkidli tələbi ilə hakimiyyətə
qayıdan Ulu Öndər öz böyük siyasi təcrübəsi və müdrikliyi ilə Azərbaycanı bu
təhlükəli vəziyyətdən çıxarmaq üçün gərgin işə başlamışdır. İlk növbədə,
hakimiyyət vakuumu aradan qaldırılmış, respublikanın müxtəlif bölgələrində baş
qaldırmış destruktiv qüvvələr xalqın fəal köməyi ilə zərərsizləşdirilmiş,
vətəndaş müharibəsinin qarşısı alınmışdır. Azərbaycanın dövlətçiliyinə,
müstəqilliyinə, ərazi bütövlüyünə qəsdlər təşkil edən cinayətkar ünsürlər
cəmiyyətdən təcrid edilmişdir. Xalqın mütləq əksəriyyətinin səsini qazanaraq Azərbaycan Respublikasının
Prezidenti seçilən Ulu Öndər 1993-cü il oktyabrın 10-da dövlətə və xalqa
sədaqət andı içərək Azərbaycanı böyük bəlalardan, faciələrdən hifz etmiş,
ölkəni sabitlik, iqtisadi inkişaf və tərəqqi yoluna çıxarmış, qlobal
enerji-kommunikasiya layihələrini reallaşdırmaqla Vətənə sədaqətlə xidmətin
əyani nümunəsini yaratmışdır. Qısa müddət ərzində Azərbaycan sabitlik diyarına, iqtisadi möcüzələr
ölkəsinə, dünya birliyinin layiqli üzvünə çevrilmiş, ən əsası Azərbaycanın
gələcəyi üçün baza formalaşmışdır. Ulu Öndərin idarəetmə fəlsəfəsinin başlıca ideya-siyasi istiqaməti xalqın
milli özünüifadəsinin bütün forma və vasitələrinin geniş vüsət alması, milli
qürur hissinin güclənməsi və milli şüurun yüksəlişinə təkan verən sürətli
inkişaf strategiyasının gerçəkləşdirilməsi ilə səciyyələnmişdir. Xalqın tarixi
yaddaşının özünə qaytarılması onun qəlbində illərdən bəri sıxılıb qalmış milli
dövlətçilik ideyasının gələcəkdə böyük hərəkətverici qüvvəyə çevrilməsi,
müstəqil dövlətçilik ideyalarının gerçəkləşməsi üçün zəmin yaratmışdır. Heydər Əliyev yolunun Prezident İlham Əliyev tərəfindən uğurla davam
etdirilməsi Azərbaycanın müstəqilliyinin əbədi, sarsılmaz olmasının və möhtəşəm
uğurlar qazanmasının qarantı oldu. Günü-gündən tariximizə bir-birindən
əhəmiyyətli uğurlar yazıldı, bunların ümumiləşdirilmiş ifadəsi isə Azərbaycanın
Zəfəridir. Son 18 ildə Heydər Əliyev siyasətini uğurla davam etdirən Prezident
İlham Əliyev Azərbaycana ən yüksək zirvələri fəth etdirir. İmzalar içərisində imzasını görməkdən qürur duyduğumuz Azərbaycanın
üçrəngli bayrağı işğaldan azad edilmiş ərazilərdə dalğalanır. Bu, isə o deməkdir ki, illər əvvəl dirçəliş
hərəkatının arzuları məhz İlham Əliyev tərəfindən tam reallığa çevrildi.
Prezident İlham Əliyev Qələbə ilə Qalib Azərbaycanı dünyaya təqdim etdi. Ceyhunə HÜSEYNOVA, Qazax Rayon
Heydər Əliyev Mərkəzinin direktoru
Facebook-da paylaş