“PİSA-da uğurumuz STEAM-dan keçir” adlı layihənin icrası davam edir
Azərbaycan Respublikası Təhsil
Nazirliyinin Təhsildə İnkişaf və İnnovasiyalar üzrə V qrant
müsabiqəsinin fərdi kateqoriyası üzrə qalibi olmuş Qazax şəhər
İsmət Qayıbov adına 3 nömrəli tam orta məktəbin biologiya müəllimi Şəlalə
Məhərrəmovanın "PİSA-da uğurumuz STEAM-dan keçir” adlı
layihəsi uğurla icra olunur. Layihənin məqsədi PİSA-da (Şagirdlərin beynəlxalq
qiymətləndirmə proqramında) daha uğurlu nəticə əldə etmək məqsədilə regionlarda
(Qazaxda) STEAM mərkəzi açmaq, şagirdlərdə 10 il bundan sonrakı cəmiyyətdə
vacib olan kompetensiyaları formalaşdırmağa nail olmaq və həmin
kompetensiyaların səviyyəsini yerli şəraitdə əvvəlki illərin PİSA tapşırıqları
əsasında aprobasiya edərək STEAM yanaşmasının tətbiqinin PİSA nəticələrinə
təsirini müəyyənləşdirməkdir. Sözügedən layihənin icrasına 15 sentyabr 2021-ci il
tarixdən başlanıb. Cari ilin 1 oktyabrında isə layihə ictimaiyyətə təqdim
olunub. Təqdimat zamanı layihənin əsas məqsədi və fəaliyyəti
haqqında məlumatlar verilib. Məktəb direktoru Ruslan Rzayev tərəfindən STEAM
laboratoriyasının təşkili üçün sinif ayrılıb, STEAM laboratoriyası noutbuklar
və internet təminatı ilə təchiz edilib. Laboratoriyada kiçik STEAM kitabxanası
da mövcuddur. Layihə əsasında növbəti hədəf məktəbin valideyn
kontingenti olub. Oktyabrın 6-da valideynlər üçün onlayn seminar təşkil
olunaraq onlara 2030-cu ildə əsas vacib olan kompetensiyalar və peşələr
haqqında ətraflı məlumat verilib. İzah olunub ki, əgər övladları indi bu STEAM
bacarıqlarına yiyələnməsələr onların yaşadıqları gələcəkdə iş tapmaları çətin
olacaq. STEAM dərslərinin mahiyyəti izah olunduqdan sonra
layihənin eksperti məktəbin xarici dil müəllimi, Əməkdar müəllim Tahirə
Xasməmmədova tərəfindən şagirdlər arasında sorğu keçirilərək ilkin mərhələ üçün
dərslərdə iştirak edəcək şagirdlər seçilib. Seçimin ikinci mərhələsində (7-8 oktyabrda) şagirdlərə
əvvəlki illərin PİSA qiymətləndirilməsində istifadə olunan tapşırıqlar
verilərək həmin tapşırıqların cavablarına əsasən 2 STEAM qrupu formalaşdırılıb.
Hər STEAM sinifinə 20 nəfər şagird seçilib. 14-15 oktyabr tarixlərindən ilk STEAM dərsləri
başlayıb. Şagirdlər dərslərə xüsusi maraq göstərirlər, hətta könüllü olaraq çox
sayda şagird müracət edir. Hər həftənin cümə axşamı və cümə günləri keçirilən
STEAM dərslərində şagirdlər makecode.microbit.org saytında proqramlaşdırma
işləri aparırlar. Hazırda layihə
uğurla davam edir. Noyabr-dekabr aylarında STEAMçı şagirdlər makecode.microbit.org saytından istifadə edərək proqramlaşdırma bacarıqlarına asanlıqla yiyələniblər.
Hazırladıqları kodları mikrobitlərə yükləyərək müxtəlif layihələrdə tətbiq ediblər.
Şagirdlər addımölçən, termometr, damcı suvarma kimi vacib proqramları asanlıqla
kodlaşdırmaq bacarığını mənimsəyiblər. Komandanın
strateji əhəmiyyətli bir təcrübəsi də olub. Belə ki, iki həftəlik araşdırma və
sınaq nəticəsində Qazax şəhər İsmət Qayıbov adına 3 nömrəli tam orta məktəbin
şagirdləri öz mini raketlərini uçurda biliblər. Raketin mühəndis-konstruktoru 6-cı
sinif şagirdi Fərid Yusifov pilotsuz raketini həmkarlarına təqdim edib. Raketin
hazırlanması layihəsi üç həftə vaxt aparıb. Əvvəlcə raketin konstruksiyası və
yanacaq növü araşdırılıb, daha sonra ilk prototip sınanıb. Sınaq vaxtı üç cəhddən
sonra sahədə prototipin 2-ci sınaq uçuşu uğurlu olub. Raket 3 metr hündürlüyə
qalxıb. Hazırda F.Yusifov mini reaktiv mühərrikli raketin sxemi üzərində işləyir
və aprel ayında sınaq uçuşunu planlaşdırır. Bundan əlavə, 5-ci və 7-ci sinifdə
oxuyan STEAMçılar 9-cu sinif səviyyəsində olan məlumata qrafik dizayn verərək
maraqlı bir şəhərsalma işi aparıblar. Tapşırığın mahiyyətinə əsasən şagirdlərə
hüceyrə orqanoidləri haqqında mətn verilib. Məktəblilər arxitektor kimi təxəyyüllərini
işə salaraq şəhər planı çəkiblər. Şagirdlər əldə etdikləri biliklər əsasında çox
fərqli dizaynlara malik hüceyrə şəhər yaradıblar. Eyni zamanda şəhərin tikililərinin
(hüceyrə orqanoidlərinin) adlarını və quruluşunu tam öyrəniblər. Şagirdlər dərslərə
xüsusi maraq göstərirlər, hətta, könüllü olaraq digər məktəbdən ibtidai sinif
şagirdi də müraciət edib. Təbii ki, onun marağı nəzərə alınaraq komandaya daxil
edilib. Onu da qeyd edək
ki, STEAM dərsləri davam edir. Dərs prosesi tamamilə şagirdlərin maraq və həvəslərinə
köklənib. Dərs prosesini şagirdlər özləri idarə etməyə davam edirlər, artıq
komandada işləmək bacarıqları tam formalaşıb. Onlar birlikdə layihələr üzərində
fikirləşirlər, problemlərin həlli yollarını birlikdə tapırlar. Əməkdaşlıqları hətta
dərsdən sonra da davam edir. Çətin layihə olanda evlərdə toplaşırlar. Əminliklə
deyə bilərik ki, bu bacarıqlar STEAMçıların gələcək peşə fəaliyyətlərində əvəzsiz
rol oynayacaq. Onlar düşdükləri mühitə digərlərindən nisbətdə daha tez
uyğunlaşacaqlar, problemlər qarşısında aciz qalmayacaq, əksinə komanda şəklində
birləşərək hər şeyin öhdəsindən gələcəklər. 5-ci və 6-cı
sinif şagirdləri qısa müddətdə mütəxəssis kimi formalaşıblar. Dərslər davam
edir. Qarşıda daha maraqlı fəaliyyətlər var.
GOYEZEN.AZ
Facebook-da paylaş