Koronavirus pandemiyası ilə bağlı yaranmış vəziyyət digər ölkələrdə olduğu kimi, Azərbaycanın da turizm sahəsinə təsirsiz ötüşmədi
Xəbər
verildiyi kimi, Azərbaycan Respublikasının Prezidenti İlham
Əliyev Rusiya Federasiyasına rəsmi səfəri çərçivəsində fevralın 23-də TASS
agentliyində bu ölkənin aparıcı kütləvi informasiya vasitələrinin rəhbərləri ilə
görüşdü. Görüş zamanı ölkəmizdəki turizm sənayesindən də söz açıldı. Ölkə
Prezidentinin də qeyd etdiyi kimi: "Azərbaycana gələnlərin özlərini evlərində
olduğu kimi hiss etmələri üçün bütün səylər görülür. Pandemiyaya qədər 2019-cu
ildə Rusiyanın bir milyon vətəndaşı Azərbaycanda turist kimi səfərdə olub,
onlar, ilk növbədə, ona görə gedirlər ki, özlərini rahat, öz mühitində, o cümlədən
dil mühitində hiss edirlər. Pandemiyaya qədər hər il təqribən 15-20 faiz turist
artımı müşahidə olunurdu”. Çox təəssüflər olsun ki, koronavirus (COVID-19) pandemiyası ilə bağlı
yaranmış vəziyyət digər ölkələrdə olduğu kimi, Azərbaycanın da turizm sahəsinə
təsirsiz ötüşməmiş, 2020-ci ilin mart ayından başlayaraq bu sahədə də tənəzzül
başlamışdır. Koronavirus infeksiyasının
yayılmasının qarşısını almaq üçün Azərbaycanla qonşu ölkələr arasında dövlət sərhədində
məhdudlaşdırıcı rejimin, eləcə də dünyanın əksər ölkələrində vətəndaşların səfərlərinə
müvəqqəti məhdudiyyətlərin tətbiq edilməsi nəticəsində turizm sahəsində geriləmələr
qaçılmaz olmuşdur. Müqayisə üçün qeyd edək ki, Azərbaycan Respublikasının sərhəd-buraxılış
məntəqələrindən keçən şəxslərin sayı 2019-cu ildə 17464,3 min nəfər olduğu
halda, 2020-ci ildə 4028,3 min nəfər olmuşdur. Azərbaycana gələn əcnəbilər və vətəndaşlığı
olmayan şəxslərin ölkələr üzrə sayı 2019-cu ildə 3170373 nəfər olmuş, bu göstərici
pandemiyanın təsiri nəticəsində 2020-ci ildə 795722 nəfərə qədər azalmışdır.
Pandemiya ilə əlaqədar qapanmalar turizm yollayışlarının sayının kəskin
azalması ilə nəticələnmişdir. 2019-cu ildə səyahət agentlikləri və
turoperatorlar tərəfindən qrup və fərdi halda satılmış turizm yollayışlarının
sayı 63885 ədəd olmuşdursa, 2020-ci ildə bu göstərici 5342 ədəd təşkil etmişdir. Azərbaycan
Respublikası Nazirlər Kabinetinin 2021-ci il 16 yanvar tarixli "Xüsusi karantin
rejiminin müddətinin uzadılması və sərtləşdirilmiş karantin rejimində tətbiq
edilən bəzi məhdudiyyətlərin aradan qaldırılması barədə” qərarına əsasən şəhərlərarası
və rayonlararası hərəkətin bərpa olunması daxili turizm xidmətlərindən istifadəyə
birbaşa təsirini göstərdi. Bölgələrdə yerləşən hotellərə və istirahət mərkəzlərinə
üz tutan vətəndaşların sayı artdı. Təkcə cari ilin mart ayı ilə ötən ilin
müvafiq dövrünün müqayisəsi daxili turist səfərlərinin sayının 21 faizdən daha
çox olmasını deməyə əsas verir. Nazirlər Kabinetinin 26 may 2021-ci il tarixli
"Xüsusi karantin rejiminin müddətinin uzadılması və bəzi məhdudiyyətlərin
aradan qaldırılması ilə bağlı tədbirlər barədə” qərarına əsasən isə 2021-ci il
31 may tarixindən ölkənin şəhər və rayonlarından yerüstü və hava nəqliyyatı ilə
sərnişin daşımalarının bərpa olunması isə daxili turizmin yay mövsümündə daha
da canlanmasına səbəb oldu. Ölkə rəhbərliyinin turizm sahəsinə xüsusi diqqəti və
bu sahədə aparılan düşünülmüş və məqsədyönlü siyasətinin davam etdirilməsi
postpandemiya dövrü üçün də turizmin sürətlə bərpasına nail olunacağını deməyə əsas
verir. Müzəffər Ali Baş Komandanın rəhbərliyi ilə şanlı ordumuzun Böyük Zəfəri,
torpaqlarımızın işğaldan azad edilməsi və ölkənin ərazi bütövlüyünün yenidən bərpa
olunması sözsüz ki, qarşıdakı illərdə iqtisadiyyatla bərabər, turizmin də
inkişafı üçün əlverişli imkanlar yaradır. Çünki düşməndən təmizlənən
torpaqlarda turizm potensialı kifayət qədər böyükdür. Füzuli, Şuşa, Kəlbəcər, Zəngilan
və Laçın rayonları bu baxımdan xüsusi diqqət çəkir. Turizm potensialı kifayət qədər
önəm daşıyan və dünyanın ən qədim insan məskənlərindən sayılan Azıx mağarası isə
Füzuli rayonu ərazisində yerləşir. Bundan başqa, Kəlbəcərin İstisuyu, tarixin
müxtəlif zamanlarında inşa edilən qalalar, kilsə, məscid və digər mədəni-tarixi
abidələr bu rayonların turizm imkanlarını kifayət qədər artırır. Şuşa şəhərinin
isə nəinki Qarabağın, bütövlükdə Azərbaycanın, gələcək illərdə isə islam və
türk dünyasının mədəniyyət mərkəzi statusu qazanacağı heç bir şübhə doğurmur.
Hazırda dünya turistlərinin diqqətini Azərbaycana cəlb etmək üçün müxtəlif
istiqamətdə fəal işlər görülür. Dövlət
Statistika Komitəsinin məlumatına görə, 2021-ci ilin yanvar-iyun ayları ərzində
turistlərin yerləşdirilməsi və ictimai iaşə sahəsində yaradılmış əlavə dəyər
397,1 milyon manat təşkil etmiş, ölkə mehmanxanalarında keçirilmiş gecələmələrin
sayı 2020-ci ilin eyni dövrü ilə müqayisədə 18,6 faiz artaraq 694,7 min
olmuşdur. 2021-ci ilin yanvar-iyun aylarında mehmanxanaların gəlirləri 2020-ci
illin müvafiq dövrü ilə müqayisədə 25,2 % artaraq 90,1 milyon manat təşkil
etmişdir ki, onun da 61,1 %-i nömrələrin (otaqların) təqdim olunması üzrə xidmətlərdən,
28,3 %-i ictimai iaşə xidmətlərindən, 2,0 %-i, 2021 müalicə və sağlamlıq xidmətlərindən,
8,6 %-i isə digər xidmətlərin göstərilməsindən əldə edilmişdir. Şəhla MƏMMƏDOVA, Bakı Dövlət Universitetinin
Qazax filialının müəllimi
Facebook-da paylaş