Pandemiya ilə mübarizədə Azərbaycan Prezidentinin təşəbbüsü
BMT-yə üzv olan 193 ölkədən 130-nun
Azərbaycanın, onun Prezidentinin təşəbbüsünü dəstəkləməsi tarixi hadisədir. Bu
təşəbbüsün dəstəklənməsi dünya miqyaslı hadisə kimi qiymətləndirilməlidir.
Çünki cənab Prezidentin təşəbbüsünün hər bir ölkə üçün böyük faydası var.
Prezident İlham Əliyevin təşəbbüsü ilə ilk olaraq Türk Şurasının onlayn
formatda Zirvə görüşü keçirildi. Pandemiyaya qarşı mübarizədə bu görüş
türkdilli ölkələr üçün çox faydalı bir platforma oldu. Bundan əlavə, Prezident İlham Əliyevin təşəbbüsü
ilə Qoşulmama Hərəkatının Təmas Qrupunun onlayn formada Zirvə görüşünün
keçirilməsi də pandemiyaya qarşı birgə əməkdaşlığa böyük töhfə oldu. Qoşulmama
Hərəkatının üzvü olan elə ölkələr var ki, öz aralarında münasibətləri elə də
yaxşı deyil. Amma Zirvə görüşündə bir yerdə oldular və birgə müzakirə
apardılar. Yəni onları COVID-19 pandemiyasına qarşı mübarizə birləşdirir. Bu o
deməkdir ki, Azərbaycan Prezidenti İlham Əliyev pandemiya ilə mübarizəni
regional səviyyədən beynəlxalq səviyyəyə, sonra da ümumbəşəri səviyyəyə
qaldırıb. Belə bir şəraitdə cənab Prezidentin
təşəbbüsü ölkələri öz aralarında olanrəqabəti kənara qoyaraq əməkdaşlıq etməyə sövq edib. Yəni, bir-biri ilə rəqabətdə, ziddiyyətdə olan
ölkələr Azərbaycan Prezidentinin təşəbbüsü ilə pandemiyaya qarşı mübarizədə
birləşib. Bu təşəbbüsün beynəlxalq birlik tərəfindən qəbul olunması Azərbaycan
Prezidenti İlham Əliyevin dünyada böyük nüfuza sahib olduğunu bir daha
təsdiqləyir. Beləliklə, Azərbaycan birləşdirici
siyasət həyata keçirir və cənab Prezidentin təşəbbüsü dünya miqyasında yüksək
dəyərləndirilir. Pandemiyaya qarşı mübarizə və
Azərbaycan Prezidentinin təşəbbüsü humanitar məsələdir. Azərbaycan dünyanı
narahat edən humanitar məsələ ilə bağlı mühüm təşəbbüs irəli sürüb. Azərbaycan
həmişə xoşməramlıdır, heç vaxt nahaq addımlar atmaz. Bunun əksini iddia edənlər
isə ölkəmizə qarşı qərəzli münasibətdə olanlardır. Ona görə də, bu hadisənin Azərbaycan
üçün çox böyük əhəmiyyəti var. Cənab Prezidentin məlum təşəbbüsü dünyada
imicimizi daha da artırır, ölkəmizin nüfuzunu yüksəldir, dünya dövlətləri
içərisində hörmətimizi çox gücləndirir. Bu təşəbbüs həmçinin, Azərbaycanın
dünya ölkələri ilə əlaqələrini genişləndirir. İşğalçı Ermənistan çalışdı ki,
Azərbaycanın xoşməramlı təşəbbüsünün reallaşmasına əngəl törətsin. Amma bacara
bilmədi. Bununla da, özü özünü ifşa etdi. Eyni zamanda, xoşməramlı, mühüm bir
humanitar təşəbbüsə etiraz etməklə Ermənistan özü özünü inkar etdi. Bunun da
məntiqi əsası var. Çünki Ermənistan heç vaxt dövlət olmayıb, onun dövlətçilik
ənənəsi yoxdur. Ermənistan monoetnik ölkədir və beynəlxalq münasibətlər səviyyəsində özünü pandemiya
ilə beynəlxalq mübarizədən təcrid etdi. Bütün bunlar Qarabağ məsələsinin
ədalətli həllində üstünlüyümüzü artırır. Bu təşəbbüs həm də Azərbaycanı daha
yaxşı tanımaq üçün gözəl fürsətdir. Bütövlükdə, cənab Prezidentin təşəbbüsünün dünya səviyyəsində
qəbul olunması, BMT-nin özünün məsələsi kimi gündəmə gəlməsi böyük hadisədir. Prezident İlham Əliyevin həyata
keçirdiyi diplomatiya çoxşaxəlidir. Ona görə də, biz sabah yeni təşəbbüslərin
də şahidi ola bilərik. Hazırki təşəbbüs Azərbaycanın olsa da, onun həyata
keçirilməsi dünyanın işidir. Bütün hallarda tarix yazacaq ki, pandemiyaya qarşı
mübarizədə BMT Baş Assambleyasının keçirilməsi təşəbbüsü Azərbaycana və onun
Prezidenti cənab İlham Əliyevə məxsusdur. Ümumdünya Səhiyyə Təşkilatının əsas
qərarverici orqanı olan Ümumdünya Səhiyyə Assambleyasının "Pandemiyaya son
qoyaraq növbəti pandemiya təhlükəsinin qarşısının alınması: birlikdə daha
sağlam, təhlükəsiz və ədalətli dünyanın qurulması” mövzusuna həsr edilmiş 74-cü
sessiyasında Azərbaycan Prezidenti İlham Əliyevin xüsusi qonaq qismində
videoformatda çıxışında ölkəmizin pandemiya ilə mübarizə çərçivəsində gördüyü
işlər, eləcə də beynəlxalq müstəvidə təşəbbüsləri diqqətə çatdırılıb. Dövlət
başçısının dediyi kimi, pandemiya ilə mübarizənin hazırkı mərhələsində əsas
prioritet əhalinin vaksinasiyasıdır. Ölkəmizdə görülmüş müfəssəl tədbirlər
nəticəsində karantin rejimi tədricən yumşaldılıb. Cari ilin yanvar ayının
ortalarından etibarən peyvənd kampaniyası başlanıb və artıq 99,94 faizi
"Sinovak”, qalanı isə "AstraZeneca” və "Sputnik” olmaqla, 2 milyon doza peyvənd
istifadə edilib. Bu rəqəm əhalinin 20 faizini təşkil edir. 18 yaşdan yuxarı
bütün vətəndaşlar könüllü şəkildə peyvənd oluna bilərlər. Peyvənd olunanlara
COVID-19 pasportları təqdim edilir. Pandemiya
ilə mübarizədə Azərbaycan Ümumdünya Səhiyyə Təşkilatı ilə səmərəli əməkdaşlıq
edir. Təsadüfi deyil ki, bu müstəvidə təşkilat Azərbaycanı nümunəvi ölkə hesab
edir. Eyni zamanda, Azərbaycan Ümumdünya Səhiyyə Təşkilatına 10 milyon ABŞ
dolları həcmində könüllü maliyyə dəstəyi verib. Bununla yanaşı, koronavirusla
əlaqədar 30-dan çox ölkəyə humanitar və maliyyə yardımı göstərib. Bütün bunlar,
ölkəmizin pandemiyaya qarşı qlobal mübarizədə verdiyi töhfələrin nümunəsidir.
Möhtərəm Prezidentimiz bildirdiyi kimi, Azərbaycan dünya əhalisinin vaksinlə ədalətli şəkildə
təmin olunmasının tərəfdarıdır. Azərbaycan Ümumdünya Səhiyyə
Təşkilatının pandemiyaya qarşı qlobal mübarizənin əlaqələndirilməsi də daxil
olmaqla, qlobal səhiyyə sahəsində idarəçiliklə bağlı aparıcı rolunu və
səylərini dəstəkləyir. Pandemiyanın lap ilk günlərindən
Azərbaycanda COVID-19-un əhaliyə mənfi təsirinin minimuma endirilməsi və
vəziyyətin nəzarətdə saxlanılması ilə bağlı praktiki tədbirlər həyata
keçirilmişdir. Qısa zaman ərzində 13 modul tipli və 1 daimi xəstəxana inşa
edilmişdir. Ölkədə COVID xəstələrinin müalicəsi üçün müəyyən edilmiş xəstəxana
çarpayılarının toplam sayı 10 mindən artıqdır. Bununla yanaşı, COVID-in mənfi təsirinə
məruz qalmış ölkə vətəndaşlarını və sahibkarlıq subyektlərini dəstəkləmək
məqsədilə təxminən 2 milyard ABŞ dolları həcmində sosial-iqtisadi təşviq paketi
təqdim edilmişdir. Ölkə Prezidenti İlham Əliyevin rəhbərliyi altında dünyanı
cənginə alan COVID-19 pandemiyası ilə mübarizə sahəsində görülmüş bütün işlər,
atılan addımlar bir daha onu söyləməyə əsas verir ki, Azərbaycan bu çətin
sınaqdan da uğurla çıxacaq. Azərbaycan xalqı 44 günlük Vətən müharibəsində ölkə
başçısının "Dəmir yumruğ”u ətrafında necə sıx birləşib qalib gəldisə, COVID-19
pandemiyası ilə mübarizədə də o cür birləşərək sonda uğur əldə edəcək. Bunun
üçün də biz vətəndaşların üzərinə böyük məsuliyyət düşür. Xüsusilə də dövlətimizin
əhalinin vaksinasiyası sahəsində gördüyü işlərə birmənalı şəkildə dəstək olmalı,
ölkəmizin bu bəladan tez bir zamanda xilas olması üçün əlimizdən gələni
əsirgəməməliyik. Koronavirusa qarşı peyvənd olunmaqla görülən işlərə öz
töhfəmizi verməliyik. Elvira
ƏFƏNDİYEVA,
Qazax Dövlət Sosial-İqtisadi Kollecinin
Monitorinq və
Qiymətləndirmə Şöbəsinin müdiri, Tələbə
Gənclər Təşkilatının sədri
Facebook-da paylaş