Prezident İlham Əliyevin təşəbbüsü ilə Qoşulmama Hərəkatının Təmas Qrupu formatında keçirilən Zirvə görüşü ölkəmizə və Prezidentimizə olan inamın, etibarın və etimadın göstəricisi oldu
Ölkəmiz 2011-ci ildən Qoşulmama Hərəkatına
tam hüquqlu üzv qəbul olunub. Sözügedən hərəkata üzv ölkələrin 2016-cı ildə
Venesuelada keçirilmiş zirvə görüşündə 2019-2022-ci illər üzrə sədrliyin Azərbaycana
həvalə edilməsi barədə yekdil qərar qəbul olunaraq ölkəmizə ev sahibliyi
statusu verilib. BMT-nin Baş Assambleyasından sonra ikinci ən böyük beynəlxalq
təşkilat olan və 120 dövlətin təmsil olunduğu Qoşulmama Hərəkatına üzvlükdən
qısa müddət sonra ölkəmizin sədrlik etməsi üzv dövlətlərin Azərbaycana olan hörmət
və etimadının əyani təzahürüdür. Bu, eyni zamanda ölkəmizin beynəlxalq
nüfuzunun artmasının, eləcə də Azərbaycanın qlobal səylərinin beynəlxalq
ictimaiyyət tərəfindən dəstəklənməsinin parlaq nümunəsidir. Azərbaycan Respublikasının Prezidenti və
Qoşulmama Hərəkatının sədri cənab İlham Əliyevin təşəbbüsü ilə 2020-ci il mayın
4-də Qoşulmama Hərəkatının koronavirusa qarşı mübarizə üzrə Təmas Qrupunun
videokonfrans vasitəsilə Zirvə görüşü keçirildi. Azərbaycan Prezidentinin Zirvə görüşünün keçirilməsi ilə əlaqədar
təşəbbüsü adıçəkilən beynəlxalq təşkilata üzv dövlətlər tərəfindən yekdilliklə
dəstəkləndi. Təmas Qrupunun coğrafi təmsilçilik və könüllülük əsasında bütün
regional qruplardan olan ölkələrin qatıldıqları tədbirdə 40-a yaxın ölkənin
dövlət və hökumət başçıları, xarici işlər nazirləri iştirak etdi.Sözügedən tədbir bir daha ölkəmizə və Prezidentimizə olan inamın, etibarın və
etimadın göstəricisi oldu. Zirvə görüşündə Əfqanıstan, Əlcəzair, Misir,
İndoneziya, İran, Kuba, Nigeriya, Pakistan, Cənubi Afrika Respublikası, Fələstin,
Türkmənistan, Venesuela, Nikaraqua,
Efiopiya, Hindistan, Malayziya, Vyetnam, Qana, Küveyt, Mərakeş, Səudiyyə Ərəbistanı
və digər ölkələrin prezidentləri, baş nazirləri və xarici işlər nazirləri çıxış
etdilər. Habelə, BMT-nin Baş Assambleyasının Prezidenti və Ümumdünya Səhiyyə Təşkilatının
Baş direktoru videokonfransda çıxış etdilər. Eləcə də, BMT-nin Baş katibi və
Avropa Komissiyasının ali nümayəndəsi/vitse-prezidentinin videomüraciətləri səsləndirildi.
Təəsüflər olsun ki, qlobal əməkdaşlığa güclü
ehtiyac duyulduğu bir şəraitdə dövlətlər, eləcə də bir sıra beynəlxalq və
regional institutlar çaşqınlıq içərisində qalaraq beynəlxalq həmrəyliyi nümayiş
etdirə bilmədilər. Bununla
belə, Prezident İlham Əliyevin şəxsi nüfuzu, siyasi təcrübəsi və iradəsi sayəsində
qlobal liderliyə ehtiyac yarandığı hazırkı dövrdə dünyanın hər yanından müxtəlif
siyasi və ideoloji quruluşlara malik ölkələri bir araya gətirmək mümkün oldu. Hazırda
qlobal liderliyə ehtiyac duyulduğu bir şəraitdə cənab Prezident İlham Əliyev irəli
sürdüyü təşəbbüslə "özünəqapanma sindromu”nun heç kəsə xeyir gətirməyəcəyini
nümayiş etdirdi. Həmin görüşdə biz əyani şəkildə Qoşulmama Hərəkatının fikir
mübadiləsi, qlobal həmrəylik və əməkdaşlıq üçün səmərəli platformaya
çevrildiyinin şahidi olduq. Qoşulmama Hərəkatının sədri olan Azərbaycanın
fəal surətdə çoxtərəfli diplomatiyanı və multilateralizmi təşviq etməsi dünya
birliyi tərəfindən təqdir olundu. Habelə, Zirvə görüşündə bu qədər ölkənin
iştirakı Azərbaycan Prezidentinin şəxsi nüfuzunun, siyasi təcrübəsinin və
uğurlu siyasətinin nəticəsidir. Qəbul olunmuş bəyannamədə dəyərli və vaxtında
irəli sürülmüş təşəbbüsə görə Prezidentimizə təşəkkürün öz əksini tapması bunun
bariz göstəricisidir. Təsadüfi deyil ki, BMT-nin Baş katibi video
müraciəti zamanı qeyd olunan problemə yeganə cavabın cəsarətli, uzaqgörən və
birgə rəhbərlik olduğunu bildirdi. Eyni zamanda, o, Azərbaycan Prezidentinin
belə bir görüşü təşkil etdiyinə görə təşəkkürünü bildirərək BMT-nin
Prezidentimizin səylərini dəstəklədiyini xüsusilə vurğuladı. Azərbaycan bundan əvvəl də videokonfrans formatında
zirvə görüşü keçirmişdir. Belə ki, Azərbaycan Respublikasının Prezidenti,
Türkdilli Dövlətlərin Əməkdaşlıq Şurasının sədri İlham Əliyevin təşəbbüsü ilə
aprelin 10-da Türk Şurasının videokonfrans vasitəsilə fövqəladə Zirvə görüşü
keçirilmişdir. Türk Şurası dünya miqyasında ilk beynəlxalq təşkilatdır ki, dövlət
başçıları səviyyəsində koronavirus pandemiyasına həsr olunmuş Zirvə görüşünü
keçirmişdir. Artıq Türk Şurası çərçivəsində 3 istiqamət üzrə - səhiyyə, nəqliyyat
və iqtisadiyyat üzrə əməkdaşlıq mövcuddur.
Türk Şurasının Zirvə Görüşündə çıxış zamanı cənab
Prezident haqlı olaraq vurğuladı ki, "pandemiyanın ilk günlərindən etibarən bəzi
ölkələr və beynəlxalq təşkilatların koronavirus qarşısında çaşqın qalmasının,
özünəqapanma yolunu seçməsinin şahidi olduq”. Belə bir təhlükənin hər kəsin
qapısını döydüyü və multilateralizmin demək olar ki can verdiyi şəraitdə belə,
Prezident İlham Əliyev nümunəvi addım ataraq pandemiyaya yalnız qlobal əməkdaşlıq
və həmrəylik sayəsində qalib gəlməyin mümkünlüyünü dünyaya sübut etdi. Dünya birliyinin məsuliyyətli və etibarlı
üzvü kimi Azərbaycan koronovirus təhlükəsinin ilk günlərindən etibarən qlobal həmrəylik
çağırışlarına dəstək verdi. Azərbaycan koronavirusa qarşı qlobal mübarizəyə dəstək
olaraq Ümumdünya Səhiyyə Təşkilatına könüllü maliyyə yardımı ayırdı. Koronavirus infeksiyası hər bir dövləti ciddi
sınaq qarşısında qoymuşdur. Bəzisi bu sınaqdan layiqincə çıxmaqdadır, bəzisi isə
çoxsaylı insan itkisi ilə. Ümumdünya Səhiyyə Təşkilatının Baş direktoru Tedros
Adhanom Qebreyesus tərəfindən mart ayının 23-də Prezidentimizə ünvanlanmış məktubda
Azərbaycanda görülmüş işlərə yüksək qiymət verildi. Azərbaycan pandemiyaya
qarşı görülmüş tədbirlərə görə nümunəvi ölkə kimi dəyərləndirildi. Prezident
İlham Əliyevin gördüyü qabaqlayıcı tədbirlər sayəsində bu gün koronavirusa
qarşı ən effektiv mübarizə aparan ölkələrdən söz açdıqda Azərbaycanın adı
birincilər cərgəsində gəlir. Eləcə də, effektiv nəticələrə görə Azərbaycanda
koronavirusa qarşı aparılan mübarizə beynəlxalq səviyyədə qiymətləndirilir. Azərbaycan
Prezidentinin yaranmış vəziyyətin sosial-iqtisadi sferaya çətinlik yaratmaması
ilə bağlı verdiyi qərarlar da Avropa Yenidənqurma və İnkişaf Bankı tərəfindən təqdir
olunur.
Avropa İttifaqının rəsmisinin Zirvə görüşündə
iştirakı və çıxışı Qoşulmama Hərəkatının tarixində ilk dəfə baş vermiş hadisədir.
Qeyd olunmalıdır ki, məhz Azərbaycan daim bir-biri ilə əks qütblərdə olan
Qoşulmama Hərəkatı ilə Avropa İttifaqını koronavirus təhlükəsi zamanı bir araya
gətirməyə müvəffəq oldu. Respublika Prezidenti və Qoşulmama Hərəkatının
sədri cənab İlham Əliyevin təşəbbüsü ilə 2020-ci il mayın 4-də Qoşulmama Hərəkatının
koronavirusa qarşı mübarizə üzrə Təmas Qrupunun videokonfrans vasitəsilə
keçirilən Zirvə görüşü Prezident İlham Əliyevin rəhbərlik etdiyi Azərbaycanın
dünya miqyasında nüfuzunun artdığının bir daha göstəricisi oldu. GOYEZEN.AZ
Facebook-da paylaş