Vasitəçilərin ətaləti və ya ədalətsiz vasitəçilik…
Artıq tarixin arxivinə qovuşan Dağlıq Qarabağ münaqişəsinin yaranma
tarixi, səbəbləri barədə çoxsaylı kitablar, məqalələr yazılmış, araşdırmalar
aparılmışdır. Münaqişənin tarixinə nəzər yetirərkən görmək mümkündür ki, ATƏT –
Avropada Təhlükəsizlik və Əməkdaşlıq Təşkilatının (əvvəlki adı ATƏM – Avropada
Təhlükəsizlik və Əməkdaşlıq Müqaviləsi) təşkilatçılığı ilə Minsk qrupu adlı
qurum yaradılmış və vasitəçilik təsisatını formalaşdırmışdır. Qrupun tarixi ATƏM-in Xarici
İşlər Nazirləri Şurasının 1992-ci ilin 24
martında Helsinkidə keçirilmiş görüşündən başlayır. Belə ki, həmin
görüşdə Dağlıq Qarabağda vəziyyət müzakirə olunmuş, ATƏM-in
Ermənistan-Azərbaycan münaqişəsinin sülh yolu ilə həll edilməsinə dair Minsk
konfransının çağırılması haqqında qərar qəbul edilmişdir. 1994-cü il dekabrın 5-6-da
ATƏM-in Budapeştdə keçirilən Zirvə toplantısında həmsədrlik institutu
təsis edilmişdir. Minsk konfransına iki həmsədrin təyin olunması və Minsk
qrupunun iclaslarının onların birgə həmsədrliyi ilə keçiriləcəyi barədə qərar
qəbul edilmişdir. Minsk prosesinin həmsədrlik institutu təsis olunarkən, ona
əvvəlcə Finlandiya ilə Rusiya, daha sonra isə 1995-1996-cı illər
ərzində İsveç və Rusiya başçılıq etmişdir. 1
yanvar 1997-ci ildən ATƏT-in Minsk Prosesinə Həmsədrlər
qismində ABŞ, Rusiya və Fransa başçılıq edirlər. Bəs bu qurum bu illər ərzində nə etdi?
Niyə münaqişənin həlli yolunda irəliləyiş əldə olunmadı? Səbəb çox sadədir.
Çünki hər üç dövlət erməni lobbisinin çox güclü olduğu ölkələr olmaqla yanaşı, Ermənistana
hərtərəfli yardım edən ölkələrdir və regionda Azərbaycanın, ümumiyyətlə
türk-islam gücünün möhkəmlənməsindən ehtiyat edirlər. Bunun üçün isə Qarabağ
münaqişəsinin həll edilməməsi ən yaxşı variant idi. Zaman-zaman fərqli həll yolları
təklif etdilər: "Mərhələli həll variantı”, "Paket həll variantı” və "Ümumi
dövlət formatı”. Bunlardan bəziləri bizim tərəfimizdən müəyyən qədər məqbul
sayılsa da, əsas etibarilə qaneedici deyildi. Qane edən müddəalar isə
Ermənistan tərəfindən qəbul edilmirdi. Çoxunun da nəticəsində "status” məsələsi
dayanırdı, hansı ki, 44 günlük müharibədən sonra "cəhənnəmə getdi”. 20 ildən çox aşağı-yuxarı eyni
müddəalar ətrafında bölgəyə turistik səfərlər edilir, yeyib-içmək ziyafətləri
qurulur, müsahibələrdə isə "münaqişənin həlli istiqamətində müəyyən müsbət
qığılcımlar var” deyərək keçirdilər. Vasitəçilərin əsas məqsədi isə, cənab
Prezidentin də qeyd etdiyi kimi, münaqişənin həll prosesini mümkün qədər
uzatmaq, bir növ, işğal faktını qanuniləşdirmək, yaddaşlardan bu məsələni
silməyə çalışmaq olmuşdur. Bu illər ərzində vasitəçilər nəinki münaqişənin
həlli yolunda radikal addımlar atmadı, həmçinin ermənilərin qanunsuz
məskunlaşdırma siyasətinə, tarixi və mədəni abidələrimizi məhv etməsinə, təmas
xəttində möhkəm mühəndis-istehkam qurğularının yaradılmasına göz yumdular. 44 günlük Vətən müharibəsi zamanı da
hər şey tam çılpaqlığı ilə ortaya çıxdı: guya vasitəçilik etməli olan ölkələr
bizim haqq işimizə mane olmaq üçün səfərbər oldular. Hər bir vəchlə zəfər
yürüşümüzü dayandırmağa çalışdılar, "məzlum” erməni xalqının hüquqlarını
müdafiə etmək missiyasına üstləndilər. Amma xeyri yox idi, artıq meydanda Minsk
qrupuna ehtiyac qalmamışdı. İllərlə yerinə yetirilməyən BMT Təhlükəsizlik
Şurasının məlum 4 qətnaməsinin şərtlərini Azərbaycan Ordusu yerinə yetirirdi. Nəhayət, 44 gün ərzində Ali Baş
Komandanın iradəsi və Azərbaycan əsgər və zabitinin "dəmir yumruğu” ilə haqq-ədalət
bərqərar olundu. İşğal olunmuş torpaqlarımızın böyük hissəsi güc yolu, ondan da
böyük hissəsi isə qansız-bəlasız azad olundu. Bu əsnada Minsk qrupunu da tarixin
rəflərinə qoymağın vaxtıdır. Artıq nə üçün lazımdırlar? Nəyi müzakirə
edəcəklər? Nəyə və ya kimə vasitəçilik edəcəklər? Masa ətrafında Azərbaycan,
Rusiya və Türkiyə var. Minsk qrupunun həmsədrlərinə ən gözəl
cavabı Ali Baş Komandan vermişdir. Müharibə bitər-bitməz tələsik Bakıya (daha
sonra İrəvana) səfər edən həmsədrlərə cənab Prezidentdən sillə kimi dəyən
sözlərdən sonra özünə hörmət edən qurumun özü-özünü buraxması daha yaxşı
olardı. "Mən sizi dəvət etməmişəm, özünüz xahiş etdiniz və gəldiniz. Nə sözünüz
varsa deyin, hamı eşitsin” sözlərindən sonra pərt olmuş, çaşqınlıq içərisində
qalan ifadəsiz simaları görməyə dəyərdi... Son olaraq, bir daha vurğulamaq
istərdim ki, münaqişənin bitdiyi yerdə vasitəçilik mənasızdır. Çünki sözün
bitdiyi yerdə silahlar danışdı və illərlə açılmayan "Qordi düyünü” bir zərbə
ilə qırıldı. Tükəzban SÜLEYMANOVA, Qazax Dövlət Sosial-İqtisadi Kollecinin
müəllimi, "Öyrədərək Öyrənirik” Gənclərin İntellektual İnkişafına Dəstək
İctimai Birliyinin sədri
Facebook-da paylaş