Hər səfər yeni bir uğur, yeni bir inkişaf müjdəsidir...
Azərbaycan 2020-ci ilin noyabrında 30 illik işğala cəmi 44 gün ərzində son
qoyaraq düşmən üzərində möhtəşəm qələbəyə imza atdı. Bu qələbə Azərbaycanın
şərəfli tarixinə Xalq-Ordu-Lider birliyinin təcəssümü kimi qızıl hərflərlə
yazıldı. Və müharibənin bitməsindən çox qısa bir müddət keçməsinə baxmayaraq
işğaldan azad edilmiş, düşməndən təmizlənmiş ərazilərə qalib xalqın qalib
lideri kimi ölkə başçımızın səfərləri qalibiyyətimizi və eyni zamanda bu 30 il
ərzində necə amansız, necə vəhşi düşmənlə üz-üzə mübarizə apardığımızı dünyaya
sübut etdi. Ölkə başçımızın işğaldan azad edilmiş ərazilərə səfərləri bu gün də
davam edir. Və hər bir səfər daha qürurlu, daha strateji əhəmiyyətlidir. Bu gün Azərbaycanda uğurlu
siyasətin nəticəsi olaraq yaranmış güclü iqtisadiyyat sayəsində azad edilmiş
ərazilər yenidən qurulur və bərpa edilir, tarixi abidələr bərpa olunur, yeni
yol-nəqliyyat infrastrukturu yaradılır, yüksəkgərginlikli elektrik xətləri
çəkilir, yeni yarımstansiyalar inşa olunur. Dövlət başçısının hər səfəri yeni
infrastruktur layihələrin təməlqoyması, açılışı və ya bərpası ilə müşayiət
olunur. İşğaldan azad edilmiş ərazilərin bərpası Prezident İlham Əliyevin 2021-ci il 2 fevral tarixli Sərəncamı ilə təsdiq edilmiş
"Azərbaycan 2030: sosial-iqtisadi inkişafa dair Milli Prioritetlər”də öz əksini
tapmışdır. Bu məsələnin növbəti illərdə ölkənin sosial-iqtisadi inkişafına dair
beş milli prioritetdən biri olaraq müəyyən edilməsi ölkə rəhbərliyinin məsələyə
böyük əhəmiyyət verdiyini təsdiqləyir. Respublika
Prezidenti Ilham Əliyevin 26 iyun 2022-ci il tarixində Kəlbəcər rayonuna
növbəti səfəri də məhz xüsusi əhəmiyyəti ilə seçilir. Səfəri
çərçivəsində dövlətimizin başçısı İşğal və Zəfər muzeylərinin, "İstisu” sanatoriyasının
təməlqoyma mərasimində çıxış etmişdir. Çıxışı zamanı bildirmişdir ki, Kəlbəcər
1993-cü ilin aprel ayında işğal altına düşmüşdü. O vaxt hakimiyyətdə olan
AXC-Müsavat xəyanətkar cütlüyü Kəlbəcəri nəinki müdafiə etmirdi, hətta
Kəlbəcəri qurban verməyə hazır idi, bunu da etdi. Ondan əvvəl Laçın və Şuşa
işğal altına düşdü və Kəlbəcərin işğal altına düşməsi ermənilərin planlarında
idi. AXC-Müsavat hakimiyyəti talançılıqla, soyğunçuluqla məşğul olurdu, orduya,
ordu təchizatına fikir vermirdi, bu bölgədə yaşayan insanlara fikir vermirdi,
onlara biganə yanaşırdı və Kəlbəcər işğal altına düşdü. Bu gün Kəlbəcərdə
quruculuq işləri gedir. Kəlbəcərin infrastrukturu, elektrik təchizatı, su
təchizatı, evlərin tikilməsi - artıq buna start verilir. Qarabağı və Şərqi
Zəngəzuru bərpa edəcəyik. Artıq bu proses başlamışdır və ilk növbədə, bu
bölgədə - Qarabağda və Şərqi Zəngəzurda bizim hərbi gücümüz daim möhkəm
olmalıdır. İstisu qəsəbəsinin inkişafı ilə bağlı artıq konkret addımlar atılır.
İlk növbədə, yeni su zavodunun tikintisi nəzərdə tutulur. Su zavodunun təməli
qoyuldu. Vaxtilə məşhur olan İstisu suyu yenidən buraxılacaq, istehsal
olunacaq, Azərbaycanda istehlak olunacaq və ixrac ediləcək. Prezident həmçinin
qeyd etmişdir ki, Kəlbəcər və Laçın rayonlarının bərpası azad edilmiş digər
rayonlara nisbətən daha çətindir. Hərbi xidmət nöqteyi-nəzərdən Kəlbəcər-Laçın
zonası həm iqlim, həm relyef, həm də təbiət baxımından ən çətin bölgədir.
Kəlbəcər və Laçın rayonlarının inkişafı ilə bağlı lazımi addımlar atılır. Keçən
il 4 su elektrik stansiyası istifadəyə verilib. Bu il isə 5 su elektrik
stansiyasının istifadəyə verilməsi təmin ediləcək. Yollar davamlı olaraq
çəkilir. Kəlbəcər və Laçın rayonlarında 10-dan çox tunel inşa edilir. Onların
arasında ən böyük tunelin uzunluğu təxminən 12 kilometrdir. Bu tunel Murov
dağının altından çəkilir. Bu, həm mülki əhali üçün, həm hərbçilər üçün, həm də
müdafiə nöqteyi-nəzərdən lazımdır. Qarabağ bölgəsində indi 10-dan çox tunel, 9
viaduk, onlarla körpü inşa edilir. Kəlbəcər rayonunun inkişafı ilə bağlı
konsepsiya artıq hazırdır. Kəlbəcərin özünəməxsus füsunkar təbiəti var.
Kəlbəcər şəhərinin Baş planının təsdiq olunması təbii gözəlliyi ehtiva edir.
Artıq ilin sonuna qədər müfəssəl layihələndirmə gedəcək və ondan sonra yaşayış
binaları, məktəb, xəstəxana inşa ediləcəkdir. Hərbi hissələr, ictimai yerlər
artıq fəaliyyət göstərir. Kəlbəcərdə mütləq aşıq mərkəzi və lazım olan digər
tikililər inşa ediləcək. Laçın rayonunda yeni hava limanı inşa edilir. Bu hava
limanının tikintisinin ən çətin tərəfi Laçın rayonunda və Kəlbəcər rayonunda
düz yerin olmamasıdır. Ona görə də dağlar yarılır və kəsilir ki, zolaq üçün
uyğun şərait yaradılsın. 2024-cü ildə Laçın rayonunda beynəlxalq hava limanı
açılacaq və ondan sonra gediş-gəliş daha rahat olacaq. Azərbaycan xalqı
qurub-yaradan xalqdır. Azərbaycan xalqı tamamilə dağılmış 10 min
kvadratkilometr ərazidə yeni həyat qurur. Artıq yeni həyatın təzahürləri
görünməkdədir. Azad edilmiş şəhərlərimizdə, kəndlərimizdə artıq geniş inşaat
işləri gedir. Kəlbəcər şəhərində İşğal və Zəfər muzeylərinin təməli qoyuldu.
Azad edilmiş bütün şəhərlərdə İşğal və Zəfər muzeyləri inşa ediləcək.
Hərtərəfli iş görülür - infrastruktur işləri, xəstəxanalar, məktəblər, yaşayış
binaları, mədəniyyət obyektləri, məscidlərimizin bərpası, muzeylər, hava
limanları, dəmir yolları, tunellər. Cəmi bir il yarım ərzində görülən bütün
işləri sadalamaq mümkün deyil. Bu, onu göstərir ki, biz bu torpaqların
sahibləriyik. Bəli ölkə başçısının dediyi kimi "...biz Qarabağı
cənnətə çevirəcəyik...” Buna iqtisadi gücümüz də, mənəvi gücümüz də yetər. Ceyhunə HÜSEYNOVA, Qazax Rayon Heydər Əliyev
Mərkəzinin direktoru
Facebook-da paylaş