Azərbaycanın məqsədyönlü və müstəqil enerji siyasətinin müəllifi - İlham Əliyev
Ulu Öndər Heydər Əliyevin siyasi
kursunun layiqli davamçısı İlham Əliyevin rəhbərliyi və şəxsən təşəbbüsü ilə
ölkəmizdə aparılan məqsədyönlü enerji siyasəti Azərbaycanın milli
təhlükəsizliyinin təmin edilməsi və yeni tərəfdaşlıqların təməlinin qoyulmasında
mühüm rol oynayır. Azərbaycanın müstəqil enerji sisteminin formalaşdırılması,
dövlət enerji təhlükəsizliyinin təmin edilməsi İlham Əliyev siyasətinin
prioritetləri sırasındadır. Bu istiqamətdə ölkəmizdə əsaslı islahatlar
aparılmış, enerji sektorunun inkişafında dinamik dəyişikliklər baş vermiş,
dünya dövlətləri ilə yeni səmərəli tərəfdaşlıq və əməkdaşlıqlar qurulmuşdur.
Bütün bunlar dövlət başçısı İlham Əliyevin gərgin əməyi, məqsədyönlü siyasəti
sayəsində reallaşmışdır. Bu gün Azərbaycan regionun lider dövlətidir. Düzgün
müəyyənləşdirilmiş strateji hədəflər Azərbaycanın davamlı inkişafına səbəb
olmuş, etibarlı tərəfdaşa çevrilməsinin əsası olmuş, ölkəmizdə müxtəlif tipli
tədbirlər, sərgilər, görüşlər keçirilməsi üçün sabit məkan yaratmışdır. Belə tədbirlərdən
biri də tanınmış beynəlxalq platforma və regionda neft-qaz sənayesinin əsas
tədbiri olan "Xəzər Neft və Qaz sərgisi”dir. Bu tədbir hər il Xəzər regionunun
əsas neft, qaz layihələrini müzakirə etmək və enerji təhlükəsizliyini təmin
etmək üçün ən yüksək səviyyəli rəhbərləri bir araya toplayır. İlk sərgi 1994-cü
ilin sentyabr ayında "Əsrin müqaviləsi”nin imzalanması ərəfəsində keçirilib və
Ulu Öndər Heydər Əliyev bu tədbiri yüksək qiymətləndirib. Çünki bu sərgi dünya
neft və qaz şirkətlərini Azərbaycanın neft, qaz sahəsinin inkişafına cəlb etmək üçün münasib
platforma idi. I Beynəlxalq sərgi isə 1994-cü ilin 24 may tarixində keçirilib
və Heydər Əliyev tədbirdə iştirak edib. Sərginin keçirilməyə başladığı tarixdən
Azərbaycanda bu sahə yeni mərhələyə qədəm qoyub. Və illər ərzində mütəmadi
olaraq bu sərgilər təşkil edilib, sonuncu 26-cı Beynəlxalq Xəzər Neft və Qaz Sərgisi
pandemiyadan öncə 2019-cu ildə Bakı Ekspo Mərkəzində təşkil olunub, sərgidə
dünyanın 250-dən artıq şirkəti iştirak edib. Hər il baş tutan Xəzər Neft və Qaz Sərgisi
neft, qaz və energetika sahəsində aparıcı peşəkarların görüş yerinə çevrilib və
burada gələcək əməkdaşlığa dair çoxlu sayda memorandumlar, saziş və müqavilələr
imzalanıb. Növbəti 27-ci Beynəlxalq Xəzər Neft və Qaz Sərgisinin açılış mərasimi 2022-ci ilin 1 iyun tarixində keçirilmiş və
Prezident İlham Əliyev tədbirdə iştirak və çıxış etmişdir. 27-ci Beynəlxalq Xəzər Neft və Qaz Sərgisi
təşkilatçılarının rolunun həqiqətən çox vacibliyini qeyd edən ölkə Prezidenti
bu konfransın keçirildiyi ilk ildən etibarən Azərbaycanın dünyaya açıq olduğunu
elan etdiyini bildirib. Dövlət başçısı ölkənin energetika layihələrindən
danışaraq qeyd edib ki, ötən əsrin sonunda Azərbaycandan Gürcüstanın Qara
dənizdəki Supsa limanına gedən birinci neft boru kəmərinin açılışı baş tutdu. Bunun
sayəsində Azərbaycan ixraca başlaya bildi və bir çox ölkələrin tələbatlarını
təmin etdi. Eyni zamanda, ölkəmiz tərəfdaşlarla birgə qaz yataqlarının, xüsusən
də, dünyada ən iri qaz yataqlarından biri sayılan "Şahdəniz” yatağının
kəşfiyyatına başladı. 2006-cı ildə Xəzər dənizini Aralıq dənizi ilə birləşdirən
Bakı-Tbilisi-Ceyhan neft boru kəmərinin tikintisi başa çatdı. Bakı-Tbilisi-Ceyhan və Azərbaycanın bütün digər enerjinin nəql
olunması infrastrukturu hər hansı fasilə olmadan istismar edilir. 2007-ci ildə
Bakı-Tbilisi-Ərzurum qaz boru kəməri istismara verildi, Azərbaycan qazı, ilk
dəfə olaraq, Türkiyənin və Gürcüstanın regional bazarlarına nəql olunmağa
başladı. Avropa qitəsində təbii sərvətlərimizlə bağlı fəaliyyətimizin
genişləndirilməsi həm bizim, həm tərəfdaşlarımız üçün zəruridir. Cənub Qaz
Dəhlizi fərəhlənə biləcəyimiz layihədir. Layihə "Şahdəniz” qaz-kondensat
yatağında hasilatı artırmağa imkan yaradır. Cəmi bir il beş aydır ki,
Azərbaycan həmin tamamilə yeni müasir infrastrukturdan öz qaz ehtiyatlarının
nəqlində istifadə edir. Ötən il Azərbaycan 22 milyard kubmetr təbii qaz ixrac
etmişdir. Bu il gözlənilir ki, bu rəqəm 24 milyard kubmetr olacaq. Çıxışı zamanı Cənub Qaz Dəhlizinin
reallaşmasından danışan Prezidentİlham Əliyev bildirib ki, Cənub Qaz Dəhlizinin icrası zamanı Azərbaycan boru kəməri ərazisindən
keçən ölkələrlə, eləcə də beynəlxalq maliyyə təsisatları, enerji şirkətləri,
aparıcı ölkələrin hökumətləri və Avropa Komissiyası ilə çox sıx əməkdaşlıq
əlaqələri qurub. Cənub Qaz Dəhlizin Məşvərət Şurasının hər ilin fevralında
Bakıda keçirilən illik toplantısı həmin komanda işinin bariz nümunəsidir. Bu il
fevralın 4-də Cənub Qaz Dəhlizi Məşvərət Şurasının illik toplantısı keçirildiyi
zaman bəlli oldu ki, planlarımızın ən böyük hissəsi artıq icra olunub və Cənub
Qaz Dəhlizi artıq işləyir. Öz çıxışında Azərbaycan qazına olan tələbatın
sürətlə artmasından söz açan
Prezident qeyd edib ki, potensial istehlakçılar anlamalıdırlar ki, bir il
ərzində qazı böyük həcmdə hasil etmək mümkün deyil. Bunun üçün bizə müqavilələr
lazımdır. Biz danışıqlara başlamalı və onları sürətləndirməliyik. Biz ənənəvi
tərəfdaşlar və sərmayədarla, eləcə də enerji şirkətləri ilə çalışmalıyıq ki,
hasilat artsın. Həmçinin biz mövcud qurğuları genişləndirməliyik. Birləşmiş
Ştatlar və Birləşmiş Krallıq Azərbaycanın enerji siyasətini hər zaman
dəstəkləyib. Böyük dəstək nəticəsində effektiv nailiyyətlər əldə olunub. Dünya
Bankı, Avropa Yenidənqurma və İnkişaf Bankı, Asiya İnkişaf Bankı, Avropa
İnvestisiya Bankı, Asiyanın İnfrastruktur və İnvestisiya Bankı Cənub Qaz
Dəhlizinin maliyyələşməsində iştirak etmişlər. Azərbaycan etibarlı tərəfdaşdır.
Hasilatın pay bölgüsünə dair 1994-cü ildə xarici şirkətlərlə imzalanmış ilk
sazişdən bu günə qədər müqavilələrdə bir söz belə dəyişdirilməyib. Azərbaycan
öz öhdəliklərinə hörmət edir və tərəfdaşlarından öz öhdəliklərinə hörmət etməyi
gözləyir. Prezident həmçinin bildirib ki, Azərbaycan dünyanın aparıcı
enerji şirkətləri olan "ACWA Power” və "Masdar” şirkətləri ilə əməkdaşlıq edir.
Biri günəş, digəri isə külək olmaqla, iki elektrik stansiyası inşa olunur ki,
onların birgə istehsal gücü 470 meqavatdır. Gələn il bu iki stansiya istifadəyə
veriləcəkdir və bu, yalnız başlanğıcdır. Bu gün artıq Azərbaycan digər ölkələr
üçün vacib tranzit imkanlarını təqdim edir. Bu potensialdan da maksimum
dərəcədə istifadə oluna bilər. Təəssüf ki, bu günədək bu potensialdan tam
istifadə edilməyib. Azərbaycanın mühüm tranzit ölkəsi qismində potensialı
təchizatçılar tərəfindən düzgün qiymətləndirilməmişdir. Azərbaycanın
şaxələndirilmiş ixrac marşrutları var. Müxtəlif istiqamətə uzanan 3 neft boru
kəməri və 4 qaz boru kəməri mövcuddur. Elektrik enerjisi xətlərinə gəldikdə isə
Azərbaycan 4 qonşu ölkəyə elektrik enerjisi ixrac edir və Avropaya elektrik
enerjisi ixrac etməyi planlaşdırılır. Azərbaycan zəruri infrastruktura
malikdir. Dəniz limanı, bütün istiqamətlərlə bizi birləşdirən dəmir yolu,
avtomobil yolları və hava limanları mövcuddur. Azad olunmuş ərazilərdə üç yeni
hava limanı olacaq. Onlardan biri artıq istifadə verilib. Azərbaycan 9
beynəlxalq hava limanına sahib olacaq. SOCAR və BP strateji tərəfdaşdırlar.
Azərbaycan üçün neft və qaz sahəsində BP strateji tərəfdaş və aparıcı
investordur. Hazırda SOCAR və BP azad olunmuş Cəbrayıl rayonunda 200 meqavatdan
artıq gücə malik elektrik enerjisi stansiyasının inşasını müzakirə edir. Enerji
layihələri daxili inkişafımız üçün də çox əhəmiyyətlidir. Enerji amili, enerji
diplomatiyası və bütün layihələr ölkəmizin iqtisadi potensialını gücləndirir.
İqtisadiyyatı güclü olan dövlət isə hər zaman güclüdür. Güclü olan isə hər
zaman qalibdir, liderdir! Ceyhunə HÜSEYNOVA, Qazax Rayon Heydər Əliyev Mərkəzinin direktoru
Facebook-da paylaş