Azərbaycan həqiqətlərinin dünyaya çatdırılmasında dövlət başçısının xarici KİV-lərə verdiyi müsahibələr böyük əhəmiyyətə malikdir
Azərbaycan dövlət müstəqilliyini
bərpa etdikdən sonra bütün sahələrdə olduğu kimi söz və mətbuat azadlığının
təmin olunması istiqamətində əsaslı islahatlar aparıldı, mühüm əhəmiyyətli
işlər görüldü. 2003-cü ildən sonra isə bu siyasət Ulu Öndər siyasi kursunun
davamçısı İlham Əliyev tərəfindən davam etdirilir. Demokratik, azad mətbuatın təmin edilməsi hər zaman
diqqət mərkəzində saxlanılır. Çünki ölkə həqiqətlərinin dünyaya çatdırılmasında
mətbuatın gücü böyük əhəmiyyətə malikdir. 44 gün davam edən və Azərbaycanın
qələbəsi ilə nəticələnən Vətən müharibəsi dövründə Azərbaycan Respublikasının
Prezidenti İlham Əliyevinxarici KİV-lərə 30-dan çox müsahibə verməsi dövlət başçısının mediaya olan
yüksək münasibətinin təzahürü idi. Həmçinin xarici ölkələrin media nümayəndələrinə
verdiyi müsahibələrlə Azərbaycan həqiqətlərini dünyaya çatdırmaqla beynəlxalq
aləmin bu məsələyə münasibətdə Azərbaycanın haqlı mövqeyinə dəstəyinə nail
olunmuşdu. İstər müharibə dövründə, istərsə də müharibədən sonra dövlət
başçısının xarici KİV nümayəndələrinə müsahibələri Azərbaycanın ədalətli
mövqeyinin dünyaya bəyan edilməsinə və beynəlxalq aləmin artıq əsl həqiqətləri
dərk etməsinə səbəb olmuşdu. Dövlət başçısının İspaniyanın "El Pais” qəzetinə verdiyi müsahibəsi
Azərbaycan-Ermənistan
münasibətlərinin müharibədən sonrakı vəziyyəti haqqında tam, dolğun təəssüratın
dünyaya çatdırılmasında mühüm əhəmiyyət kəsb edir və bir sıra mesajların
verilməsi ilə yaddaşlarda qalır. "El Pais” qəzetinə müsahibəsində
dövlət başçısı Rusiya sülhməramlı qüvvələrinin Qarabağda daşıdığı məsuliyyət
haqqında danışaraq bildirib ki, həmin ərazilərdə vəziyyət Ermənistan-Azərbaycan
sərhədində olan vəziyyətlə müqayisədə daha çox sabitdir. Prezident həmçinin
bildirib ki,
Ermənistan qisas almaq cəhdlərindən vaz keçmir. İkinci Qarabağ müharibəsində məğlubiyyət onlar üçün çox ağrılı oldu.
Məğlubiyyət onların otuz ildir davam edən "yenilməz ordu”, "əsgər və
komandirlərin cəsarəti” haqqında müharibə təbliğatını və ideoloji zəminini
darmadağın etdi. 44 gün davam edən müharibə zamanı Ermənistan ordusu tamamilə
məhv edildi və onlar ötən il noyabrın 10-da kapitulyasiya aktına imza atmaq
məcburiyyətində qalaraq bizim 44 günlük müharibədə geri almadığımız əraziləri
geri qaytarmağa razılıq bildirdilər. Buna görə də Ermənistan cəmiyyətində,
siyasi spektrində revanşizm əlamətləri görünür. Onlar dövlət sərhədində hərbi
təxribatlar törətməyə cəhd göstərirlər. Prezident İlham Əliyev onu da qeyd
edib ki, Ermənistanın ərazisinə Azərbaycanın hər hansı bir səbəb olmadan
müdaxilə etməsi ilə bağlı rəsmi İrəvanın iddiaları əsassızdır. Azərbaycan və
Ermənistan arasında dövlət sərhədi təyin olunmayıb. Buna səbəb 1990-cı illərin əvvəlində hər iki ölkənin
müstəqilliyinin bərpasından dərhal sonra Azərbaycanın həmin hissəsinin
işğalının baş verməsidir.
Ötən ilin noyabrında İkinci Qarabağ müharibəsi bitəndə ərazidə iqlim şəraiti
əlverişsiz idi. Qar əriməyə cari ilin may ayında başladı və dərhal Azərbaycan
Ordusu dövlət sərhədinə tərəf hərəkət etməyə başladı. Sərhədin haradan keçməsi
ilə bağlı olan anlayışımıza əsasən, ordumuz dövlət sərhədində mövqe tutdu. Azərbaycanın dövlət başçısı bütün
təhdid yarada biləcək cəhdlərin qarşısının alınacağını vurğulayıb və bildirib ki, Azərbaycan
sülhün tərəfdarıdır. Ona görə də Azərbaycan rəsmi İrəvanın manevrlərini, yenidən
qruplaşmalarını və təhlükəli ola biləcək hərbi potensial yaratmaq üçün
cəhdlərini izləyir. Bütün təhlükələr dərhal aradan qaldırılacaqdır. Ölkə rəhbəri öz müsahibəsində qeyd edib ki, Azərbaycan Ermənistanla sülh
danışıqlarına və sülh razılaşması üzərində işləməyə başlamağa hazırdır.
Ermənistan rəhbərliyindən heç bir cavab verilməyib. Bu, onların sülh
istəmədiyini göstərir, çünki imzalandığı təqdirdə sülh razılaşmasının əsas
müddəalarından biri də hər iki ölkənin ərazi bütövlüyünün qarşılıqlı tanınması olacaq
və Ermənistan Azərbaycanın ərazi bütövlüyünü tanımaq istəmir. Bütün dünya Azərbaycanın ərazi
bütövlüyünü və Qarabağı Azərbaycanın ayrılmaz hissəsi kimi tanıyır. Ermənistan
nə ərazi bütövlüyünü tanıdığını, nə də tanımadığını söyləyir. Ermənistan öz əsassız
bəyanatları ilə danışıqlar prosesini məhv etdi. İndi Ermənistanın sanki bu
məsələ ilə bağlı heç bir mövqeyi yoxdur. Ümid edirik ki, Avropa tərəfdaşları
Ermənistanı bu mövqeyinin gələcəyinin olmamasına inandıra biləcəklər. Azərbaycan, Ermənistan və Rusiya Baş
nazirlərinin müavinlərinin rəhbərlik etdiyi üçtərəfli işçi qrup çərçivəsində
görüşlər davam edir. Bu işçi qrupun əsas məqsədi və vəzifəsi kommunikasiyaların
açılmasıdır. Danışıqların bir neçə mərhələsi nisbətən uğurlu olub. İndi
Azərbaycan və Ermənistan arasında dəmir yolu əlaqəsinin açılması ilə bağlı tam
razılıq var. Avtomobil yolunun açılmasının qaçılmaz olduğuna dair aydın
təsəvvürlər mövcuddur. Azərbaycandan keçib Ermənistana gedən və sonra
Azərbaycan Respublikasının Naxçıvan Muxtar Respublikasına gedən Zəngəzur
dəhlizinin hüquqi rejimi müzakirə olunur. Hava məkanı artıq aktivləşib. İndi
Azərbaycan Hava Yollarının Bakıdan Naxçıvana uçan təyyarələri Ermənistan hava
məkanından keçməyə başlayıb. Dağlıq Qarabağın qondarma statusu ilə bağlı və ya
buna bənzər hər hansı müzakirələrə qayıdış yoxdur. Azərbaycanın mövqeyi
tamamilə açıq və aydındır. Biz sülh istəyirik, müharibə istəmirik. Azərbaycan müharibədə qalib gəlib və
bu reallıq nəzərə alınmalıdır. Dağlıq Qarabağ münaqişəsi həll olunub.
Beynəlxalq oyunçular artıq yeni reallığı qəbul edib və gələcəyi bu yeni
reallığa əsaslanaraq qurmağa çalışırlar. Ermənistan Azərbaycana qarşı istənilən
düşmənçilik əməllərindən çəkinməli, Azərbaycana qarşı ərazi iddialarından
çəkinməlidir. Ermənistan hökumətinin azərbaycanlılara qarşı nifrətin
aşılanmasına əsaslanan ictimai rəyin arxasında dayanmaması və normallaşma
prosesində öndə getməsi vacibdir. Ermənistanın inkişafı üçün yeganə yol
Azərbaycan və Türkiyə ilə əlaqələrin normallaşdırılması, qonşu olmaq və ərazi
iddialarından çəkinmək məqsədilə insanları inandırmaq üçün mühüm addımların
atılmasından keçir. Bu istiqamətdə ictimai rəy formalaşdırılmalıdır. Azərbaycan hər zaman sülhü
dəstəkləyib. Bu gün də dəstəkləməkdədir. Ermənistan da qeyri-konstruktiv mövqeyindən əl çəkməli
və sülhə tərəfdar olmalıdır. Belə olarsa ümumilikdə Cənubi Qafqaz regionunda sülh bərqərar olar. Ceyhunə HÜSEYNOVA, Qazax Rayon Heydər Əliyev Mərkəzinin direktoru
Facebook-da paylaş