Qazax şəhər 1 nömrəli Uşaq Musiqi Məktəbində işlər sürətlə davam etdirilir
Son
illər Respublika Prezidenti cənab İlham Əliyevin diqqət və qayğısı sayəsində
bütün sahələrdə olduğu kimi, mədəniyyət sahəsinin inkişafı istiqamətində də
məqsədyönlü işlər görülür. Son dövlər respublikamızda xeyli sayda yeni mədəniyyət
müəssisələrinin inşa edilməsi, neçə-neçə mədəniyyət obyektlərinin əsaslı təmir
olunması, müasir İncəsənət Mərkəzlərinin istifadəyə verilməsi mədəniyyət
sahəsinə göstərilən qayğının əyani göstəricisidir. Ölkəmizdə mədəniyyətin
tərəqqisində Birinci vitse-prezident, Heydər Əliyev
Fondunun prezidenti, YUNESKO və İSESKO-nun xoşməramlı səfiri Mehriban xanım
Əliyevanın xidmətləri də olduqca böyük əhəmiyyət daşıyır. Bu qayğının
göstəricisi olaraq istər paytaxt Bakıda, istər ölkənin böyük şəhərlərində, istərsə
də rayon mərkəzlərində əsaslı təmir olunan mədəniyyət obyektlərinin sayı
ildən-ilə artırılır. Sevindirici
haldır ki, respublikamızın hər yerində olduğu kimi, Qərbin qapısı sayılan, hər
zaman ziyalıları, saz-söz adamları ilə tanınan Qazaxda da mədəniyyət sahəsi
daim diqqət mərkəzində saxlanılır. İstər ölkə başçısının, istərsə də rayon
rəhbərliyinin bu sahəyə göstərdiyi diqqət və qayğı rayon sakinləri tərəfindən
də minnətdarlıq hissi ilə qarşılanır. Ötən
yazımızda da qeyd etdiyimiz kimi, Azərbaycan Respublikası Mədəniyyət Nazirliyi
tərəfindən rayonda fəaliyyət göstərən və qəzalı vəziyyətdə olan şəhər 1 nömrəli
Uşaq Musiqi Məktəbində əsaslı təmir və yenidənqurma işlərinin aparılması da
dövlətin qazaxlılara, ziyalılarımıza, xüsusilə də musiqi sahəsində çalışan
insanlara, bu sahə ilə məşğul olan gənclərimizə verdiyi böyük dəyər, göstərdiyi
diqqət və qayğıdır. İş icraçısı Hüseyn Hüseynov xeyli vaxtdır ki, başlanılan
yenidənqurma işlərinin sürətlə davam etdiyini bildirir. İşlərin 60 faizinin
yerinə yetirildiyini bildirən iş icraçısı binanın dam örtüyünün vurulması
işinin, eləcə də lazım olan hissələrdə aparılan hörgü işinin tam başa çatdığını
qeyd edir. Binanın xarici fasadında suvaq işinin yekunlaşdığını, otaqlarda isə yaxın
vaxtlarda başlanılacağını söyləyir. Bundan əlavə, otaqlarda beton döşəmənin
tökülməsi üçün alt hissənin hazırlandığını bildirir. Məlumat üçün bildirək ki, Qazax şəhər 1 nömrəli
Uşaq Musiqi Məktəbi XIX əsrdə tikilmiş, 1960-cı ildən uyğunlaşdırılmış binada
fəaliyyət göstərir. Qazax şəhəri, M.P.Vaqif küçəsi 24-də yerləşən məktəbin
ümumi sahəsi 310 kv.m-dir. Ağstafa Regional Mədəniyyət İdarəsinin balansındadır.
Məktəbdə 27 sinif otağı, 1 direktor, 1 tədris hissə müdiri otağı, 1 kitabxana
olmuşdur. Məktəbdə 6 şöbə: fortepiano, skiripka, tar, kamança, qarmon, saz
şöbələri fəaliyyət göstərir. Musiqi məktəbində 65 nəfər müəllim və 7 texniki
işçi çalışır. 253 nəfər şagird Azərbaycan və dünya musiqisi incilərinin
sirlərini dərindən öyrənir. Məktəbdə 22 piano, 1 skiripka, 1 qarmon, 1 tar, 2
kamança, 2 saz, 1 nağara musiqi alətlərindən istifadə olunur. GOYEZEN.AZ
Facebook-da paylaş