Azərbaycan NATO ilə etibarlı tərəfaşdır
Azərbaycan dövlət müstəqilliyinə
nail olduqdan sonra ilk illərdə dövlət idarəçiliyindəki rəhbərlərin
səriştəsizliyi səbəbindən beynəlxalq təşkilatlarla əməkdaşlıq istiqamətində heç
bir iş görülməmişdi. Dahi siyasətçi Heydər Əliyevin xalqın təkidli tələbi ilə
hakimiyyətə qayıdışından sonra nüfuzlu beynəlxalq təşkilatlarla əlaqələrin
inkişafı prioritet vəzifə kimi dövlətçiliyin inkişafı məqsədilə qarşıya
qoyuldu. 1993-cü ildən başlayaraq Azərbaycan ilə Birləşmiş Millətlər Təşkilatı,
Avropa Təhlükəsizlik və Əməkdaşlıq Təşkilatı, Avropa Şurası, İslam Konfransı
Təşkilatı, Müstəqil Dövlətlər Birliyi, NATO, Avropa Birliyi və digər beynəlxalq
təşkilatlara üzv olaraq regional təşəbbüslərdə iştirakı ilə öz milli
maraqlarını qorumaqla etibarlı tərəfdaşlığa başladı. 1949-cu ildə yaradılmış və sülhün
qorunmasını, azadlıqların müdafiəsini siyasi həmrəylik yolu ilə təmin edən,
üzvlərinə qarşı yönəlmiş istənilən aqressiyanın dəf edilməsini, lazım gəldikdə
hərbi gücdən istifadə edilməsini nəzərdə tutan NATO ilə Azərbaycan Respublikası
arasında ilk təmasların tarixi ölkəmizin 1992-ci ildə NATO- nun yeni yaradılmış
məşvərətçi Forumuna-Şimali Atlantika Əməkdaşlıq Şurasına qoşulması ilə
başlanmışdır. NATO ilə ölkəmiz arasında əməkdaşlığın əsası isə Azərbaycan
Respublikasının Ümummilli Lideri
Heydər Əliyev tərəfindən 1994-cü il 4 may tarixində "Sülh Naminə Tərəfdaşlıq”
çərçivə sənədinin imzalanması ilə qoyulmuşdur. Müstəqilliyini yenicə bərpa edən
dövlətimiz üçün NATO ilə əməkdaşlıq xarici siyasət strategiyasının inkişafı
baxımından çox zəruri idi. Çünki müharibə vəziyyətində olan bir ölkə üçün
beynəlxalq aləmlə təmas çox vacib idi. Xüsusilə NATO ilə. Məhz bu səbəbdən Ulu Öndərin uzaqgörən siyasəti
nəticəsində NATO ilə əməkdaşlıq getdikcə möhkəmləndirildi. 1994-cü il mayın 4-də
"Sülh Naminə Tərəfdaşlıq” çərçivə sənədinin Heydər Əliyev tərəfindən
imzalanması ilə Azərbaycanın beynəlxalq aləmdə mövqeyinin möhkəmlənməsi
istiqamətində mühüm addımlar atıldı, Azərbaycan NATO-ya daxil olan Avropa
dövlətləri ilə təhlükəsizlik sisteminin sivil qaydada təmin edilməsi,
Azərbaycan ordusunun NATO hərbi strukturları ilə sülh naminə əməkdaşlıq etmək,
birgə təlimlər keçirmək, ordu quruculuğu təcrübəsini artırmaq, peşəkar
hərbiçilər yetişdirmək sahəsində əhəmiyyətli addımlara yol açıldı. Prezident İlham Əliyevin ölkə
rəhbərliyinə gəlməsindən sonra Azərbaycan beynəlxalq nüfuzlu təşkilatlarla
əməkdaşlıq istiqamətində mühüm işlər görüldü, beynəlxalq aləmə inteqrasiya
yolunda qətiyyətli addımlar atıldı. Azərbaycan Silahlı Qüvvələrinin təkmilləşdirilməsi, NATO standartlarının
tətbiqi, təminat və təchizat sisteminin, maddi- texniki bazanın yenilənməsi və
digər əsaslı islahatlar NATO ilə əməkdaşlığın yeni mərhələsinin əsasını qoydu. Həmin
dövrdən etibarən qarşılıqlı səfərlər ölkəmizin bu təşkilatla əməkdaşlığının
genişləndirilməsi istiqamətində mühüm rol oynadı. Azərbaycan Respublikasının
Prezidenti İlham Əliyevin NATO-nun mənzil-qərargahına 2004-cü ildən bu günə
qədər yeddi dəfə işgüzar səfərdə olması əməkdaşlığın dinamizmini göstərir.
Artıq Azərbaycan ilə NATO arasında müxtəlif sahələrdə uğurlu əməkdaşlıq həyata
keçirilir. NATO rəsmiləri Azərbaycanla əməkdaşlığa yüksək önəm verdiklərini
etiraf edirlər, ölkəmizin terrorizmlə mübarizədə iştirakını, sülhməramlı
fəaliyyətini yüksək qiymətləndirirlər. Həmçinin NATO və üzv dövlətlər
Azərbaycanın ərazi bütövlüyünə, suverenliyinə, siyasi müstəqilliyinə,
beynəlxalq səviyyədə tanınmış sərhədlərinin toxunulmazlığına dair hər zaman
davamlı dəstək nümayiş etdirirlər. Azərbaycan da NATO-nun etibarlı tərəfdaşı
olduğunu sübuta yetirib. Azərbaycan Silahlı Qüvvələrinin Əfqanıstanda
"Qətiyyətli dəstək” əməliyyatlarındakı xidməti beynəlxalq təşkilatlar
tərəfindən yüksək qiyməyləndirilir. Azərbaycan Əfqanıstandakı sülhməramlı
missiyasına 2002-ci ildə başladı və cari ilin avqustun sonunda onu bitirdi.
Azərbaycan hərbçiləri Kabul hava limanı vasitəsilə 120 mindən çox mülki şəxsin
təxliyəsində müstəsna rol oynayıb və Əfqanıstanı sonuncu tərk edən koalisiya
qüvvələrinin hərbçiləri arasında idi. Azərbaycan NATO-nun hərbi təlimlərində
mütəmadi iştirak edir. NATO-nun aparıcı üzvlərindən biri olan Türkiyə ilə
yalnız cari ildə yeddi birgə hərbi təlim keçirilib. Sözügedən təcrübə regionda
sülh və sabitlik işinə xidmət edir. Həmçinin Avropanın enerji
təhlükəsizliyin təmin olunmasında Azərbaycanın müstəsna rolu vardır.
NATO-nun 20-yə yaxın ölkəsi Azərbaycandan neft idxal edir. Alyansın 4 ölkəsi, o
cümlədən Türkiyə Azərbaycandan qaz idxal edir və gələcəkdə bu ölkələrin
coğrafiyası genişlənə bilər. Azərbaycan enerji təchizatı sahəsində etibarlı
tərəfdaşdır. Azərbaycanın NATO ilə ortaq maraq
kəsb edən geniş spektrli məsələlər üzrə siyasi dialoq aparması, müxtəlif
formatlarda və səviyyələrdə aparılan siyasi dialoq çərçivəsində tərəfdaşlıq,
regional təhlükəsizlik, əməliyyatlarda iştirak, meydana gələn təhlükəsizlik
təhdidləri və s. kimi aktual məsələlərin müzakirə olunması və onlara dair fikir
mübadiləsi aparılması qarşılıqlı anlayışa əsaslanan, yüksək səviyyəli
əməkdaşlıq sahəsində tərəqqinin və ölkəmizə göstərilən yüksək etimadın açıq
təzahürüdür. Ceyhunə HÜSEYNOVA, Qazax Rayon Heydər Əliyev Mərkəzinin direktoru
Facebook-da paylaş