Avropa İttifaqı ilə əməkdaşlıq sülhün və rifahın təminatçısıdır
18 iyul 2021-ci il tarixində Avropa
İttifaqı Şurasının Prezidenti Şarl Mişel Azərbaycanda səfərdə olmuşdur. Səfər
zamanı Azərbaycan Respublikasının Prezidenti İlham Əliyevin və Avropa İttifaqı
Şurasının Prezidenti Şarl Mişel arasında geniş tərkibli görüş və birgə mətbuat
konfransı keçirilmiş, əməkdaşlıq, planlar və nailiyyətlər barədə çox səmərəli
müzakirələr aparılmışdır. Azərbaycan Respublikasının Prezidenti İlham Əliyev və
Avropa İttifaqı Şurasının Prezidenti Şarl Mişel əvvəlcə mətbuata bəyanatlarla çıxış
etmişdirlər. Respublika Prezidenti İlham Əliyev çıxışında
bildirmişdir ki, Avropa İttifaqı Şurasının Prezidenti Şarl Mişelin Azərbaycana
səfəri tərəfdaşlığımızın göstərcisidir. Əməkdaşlıq çərçivəsində uzun
illərdir müxtəlif sahələrdə birgə işlər görülür. Eyni zamanda, əməkdaşlığın
şaxələndirilməsi üçün çox yaxşı əsaslar mövcuddur. Şarl Mişelin Qafqazın 3
ölkəsinə səfəri Avropanın iştirakını, Avropa gündəliyini nümayiş etdirir və bu,
ölkəmizin gündəliyinə tam uyğundur. Prezident İlham Əliyev həmçinin
Avropa İttifaqı ilə Azərbaycan arasında iqtisadi tərəfdaşlıqdan danışaraq
bildirmişdir ki, Avropa İttifaqı ölkəmizin əsas ticarət tərəfdaşıdır.
Ticarətimizin 40 faizi Avropa İttifaqı ilə aparılır. Ötənilki ticarət
dövriyyəsi 9,5 milyard ABŞ dolları idi. Azərbaycanın Avropa İttifaqına üzv
dövlətlərlə ixracının həcmi 6,8 milyard ABŞ dolları təşkil edir. Üzv
dövlətlərdən 1700-dən çox şirkət Azərbaycanda fəaliyyət göstərir. Bu, həmçinin
bizim iqtisadi fəaliyyətimizin miqyasını nümayiş etdirir. Azərbaycan üzv
dövlətlərlə ikitərəfli əlaqələrdə çox fəaldır. Azərbaycan Avropa İttifaqının 9
üzv dövləti ilə strateji tərəfdaşlıq haqqında sənədlər imzalayıb və ya qəbul
edib. Beləliklə, Avropa İttifaqına üzv dövlətlərin üçdəbiri Azərbaycanı
strateji tərəfdaş hesab edir. Enerji təhlükəsizliyi ilə bağlı öz
fikirlərini bildirən dövlət başçısı onu da qeyd etmişdir ki, enerji
təhlükəsizliyinin təmin olunması əməkdaşlığın əsas istiqamətlərindən biridir.
Enerji təhlükəsizliyinin təmin olunmasında tarixi nailiyyətlər əldə olunub.
Burada xüsusilə Cənub Qaz Dəhlizi layihəsinin tamamlanması qeyd olunmalıdır.
Ötən ilin sonuncu günündə həqiqətən də tarixi əhəmiyyət kəsb edən hadisə baş
verdi. Cənub Qaz Dəhlizinin sonuncu – dördüncü seqmenti olan Trans-Adriatik
kəməri artıq istismara verilib. Yanvarın 1-dən bu günədək Azərbaycandan Avropa
İttifaqına üzv dövlətlərə, xüsusilə İtaliya, Yunanıstan və Bolqarıstana 3
milyard kubmetrdən çox təbii qaz ixrac olunub. Əlbəttə ki, Avropa bazarına
ixrac olunacaq təbii qazın həcmi artacaq. Azərbaycan Avropa İttifaqı ilə
birlikdə uzun illərdir Cənub Qaz Dəhlizi Məşvərət Şurasına sədrlik edir. Avropa
İttifaqı və Azərbaycanın rəhbərliyi altında Məşvərət Şurası bu layihənin uğurla
həyata keçirilməsinin mühüm amili olub. 3500 kilometr uzunluğunda inteqrə
olunmuş kəmər sistemi və nəhəng "Şahdəniz-2” qaz yataqlarının işlənməsi
ölkələr, şirkətlər və beynəlxalq maliyyə institutları arasında əməkdaşlığın
nadir təcrübəsidir. Cənub Qaz Dəhlizi layihəsinə yatırılmış ümumi
investisiyaların həcmi 33 milyard ABŞ dollarından çoxdur. Eyni zamanda, artıq
15 ildir ki, Azərbaycan Avropa istehlakçılarının etibarlı xam neft
təchizatçısıdır. Qaz təchizatçısı kimi Azərbaycanın potensialı artacaq və bu,
ixracatçı olaraq bizim üçün, tranzit ölkələr üçün və istehlakçılar üçün daha
çox imkanlar yaradacaq. Çünki Azərbaycan qazı təkcə yeni marşrutdan olan qaz
deyil, yeni mənbədən olan qazdır və bu, layihəni həqiqətən də enerji
təhlükəsizliyi layihəsinə çevirir. Nəhəng nəqliyyat infrastruktur
layihələri Avropa İttifaqı ilə Azərbaycan arasında əməkdaşlığın strateji
əhəmiyyətindən xəbər verir -
deyə vurğulayan Prezident İlham Əliyev İkinci Qarabağ müharibəsindən sonra ötən
il 10 noyabr tarixli üçtərəfli razılaşmada əks olunduğu kimi regionda bütün
kommunikasiyaların açılması üçün yeni imkanların yarandığını diqqətə
çatdırmışdır. Bu gün genişmiqyaslı
əməkdaşlıq üçün yeni imkanlar yaranıb. İnnovasiyalara, texnoloji
mübadilələrə və iqtisadi əməkdaşlığa əsaslanan tərəfdaşlıqdan danışan dövlət
başçısı onu da qeyd etmişdir ki, Avropa İttifaqı ilə əməkdaşlıq strateji
əhəmiyyət kəsb edir. Mövcud əlaqələrə əlavə, növbəti təkan verilməlidir. Avropa
İttifaqı ilə Azərbaycan arasında tərəfdaşlıq, əsasən, maliyyə dəstəyinə
əsaslanan işbirliyi deyil. Avropa İttifaqının hesab etdiyi iki prioritet –
iqlim dəyişməsi və rəqəmsal inqilab birgə başlanılan layihələrin əsasında
olmalıdır. Avropa İttifaqı sərhədlərin
delimitasiyasına köməklik göstərməyə hazırdır. Bir sıra öhdəlikləri öz üzərinə
götürməsi Azərbaycanın məsuliyyətli dövlət olmasından xəbər verir. Avropa
İttifaqı müxtəlif məsələlər üzrə irəliləyişə nail olmaq üçün səyləri
dəstəkləməyə hazırdır. Sərhədlərin delimitasiyası məsələsində də Avropa
İttifaqı yaxından iştirak etməyə hazırdır. Avropa İttifaqı regional əməkdaşlıq
səylərində iştirak etmək, həvəsləndirmək
arzusundadır. Dayanıqlı sülh və rifah naminə regionda olan ölkələr arasında
əməkdaşlıq əlaqələri genişlənməlidir. Bu isə dayanaqlı sülh naminə əməkdaşlığa
böyük töhfələr verəcəkdir. Ceyhunə HÜSEYNOVA, Qazax Rayon Heydər Əliyev Mərkəzinin
direktoru
Facebook-da paylaş