Prezident İlham Əliyev: “Heç kim bizi bundan sonra bu torpaqlardan tərpədə bilməz. Qarabağ bizimdir! Qarabağ Azərbaycandır!”
Yola saldığımız
2020-ci il müstəqil Azərbaycanın hərb tarixinə qızıl hərflərlə şanlı səhifə
kimi yazıldı. Müdrik Prezidentimiz, Silahlı
Qüvvələrin Müzəffər Ali Baş Komandanı İlham Əliyevin rəhbərliyi ilə rəşadətli Azərbaycan Ordusu 30 ilə yaxın işğal altında
olan torpaqlarımızı erməni qəsbkarlarından təmizlədi. 44 günlük Vətən
müharibəsində Qarabağ işğaldan azad edildi, xalqımızın 30 illik yurd həsrətinə
son qoyuldu. Bu gün işğaldan azad
olunmuş həmin torpaqların bərpası prosesinə başlanılıb. Prezident
İlham Əliyevin və birinci xanım Mehriban Əliyevanın fevralın 14-də Füzuli, Zəngilan,
Laçın və Cəbrayıl rayonlarına səfərləri zamanı ölkə başçısının xalqa müraciətində
də qeyd etdiyi kimi, torpaqların bərpası prosesi artıq başlamışdır. Dağılmış bütün
kəndlər bərpa ediləcək. Azad edilmiş torpaqlarda bütün bərpa işləri ən yüksək səviyyədə
təşkil olunacaq. Prezidentin göstərişi ilə azad olunmuş bütün şəhərlərin baş
planlarının hazırlanması bir daha onu sübut edir ki, tez bir zamanda Qarabağ və
ətraf ərazilərimiz cənnətə çevriləcəkdir. Erməni işğalından azad olunmuş ərazilərdə
dövlətimizin başçısının birbaşa təşəbbüsü və tapşırıqları ilə "ağıllı şəhər” və
"ağıllı kənd” konsepsiyalarının reallaşdırılması nəzərdə tutulur. İlk "ağıllı kənd”
layihəsinin Zəngilan rayonunun Ağalı kəndində icra edilməsi bunun bariz nümunəsidir.
Kənddə layihənin icrası əsasən 5 komponent üzrə aparılacaq. Onlar yaşayış,
istehsal, sosial xidmətlər, "ağıllı kənd təsərrüfatı”, alternativ enerji sahələridir. Laçın rayonu işğaldan
azad olunandan iki ay keçməmiş Güləbird kəndində su elektrik stansiyası inşa
edilib. Şuşa şəhərini elektrik enerjisi ilə təchiz etmək üçün əməli addımlara
start verilib və birinci mərhələ başa çatıb. Minalardan təmizləmə işləri qısa
müddət ərzində başa çatdırılacaq, dəymiş ziyan qiymətləndiriləcək. Artıq
infrastruktur layihələrinə start verilib. Evlər də, təbiət də bərpa ediləcək. Azad
edilmiş torpaqların kənd təsərrüfatı potensialı da çox böyükdür. Həmin
torpaqlarda bitkiçilik, meyvəçilik, heyvandarlıq sürətlə inkişaf edəcək. Bu günə
qədər suvarılmayan 100 min hektar torpaq sahələrinə su veriləcək. Beləliklə,
6-7 rayonun kənd təsərrüfatı sahəsi daha sürətlə inkişaf edəcək, məhsuldarlıq
artacaq. Qısa müddət ərzində bütün imkanlar, texnika, işçi qüvvəsi səfərbər
edilib və 7 min hektarda əkin işləri aparılıb. Əlavə əkin sahələri müəyyən
olunduqca yenilənmiş təkliflər veriləcəkdir. Həyata keçirilən tədbirlərin məqsədi
azad olunmuş torpaqları tezliklə bərpa etməklə insanların öz doğma
yurd-yuvalarına qısa müddətə qayıdışına nail olmaqdır. İşğaldan azad edilmiş
həmin torpaqlara nəzər yetirərkən bir daha erməni vandalizminin şahidi oluruq. Dağıdılmış evlər erməni
faşizminin törətdiyi əməllərdir. Ermənistan kapitulyasiyadan sonra 20 gün ərzində
- dekabrın 1-nə qədər demək olar ki, bütün su elektrik stansiyalarını - Laçın rayonu ərazisində 5, Kəlbəcər rayonu ərazisində
12 su elektrik stansiyasını dağıdıb, avadanlığı çıxarıb, stansiyaların
binalarını da dağıdıb. Erməni silahlı qüvvələri
tərəfindən işğal altında saxlanıldığı vaxtlar Azərbaycan kəndləri ermənilər tərəfindən
qanunsuz məskunlaşdırılsa da, onlar üçün yaradılan şərait Prezidentin də ifadə
etdiyi kimi, it damından fərqli olmayıb. Hazırda həmin evlərin tam yararsız vəziyyətdə
olduğu görüntülərdən də aydın şəkildə görünür. Köçürülmüş ermənilərin
həmin evlərdə məskunlaşması məqsədilə xaricdə yaşayan erməni diasporundan, müxtəlif
fondlardan alınan yardımlar qondarma rejimin rəhbərliyi tərəfindən mənimsənilmiş,
orada məskunalşdırılmış ermənilər səfalətə məhkum edilmişlər. Mənfur niyyətini
aşkar şəkildə nümayiş etdirən işğalçı rejim Azərbaycana qarşı ekoloji terror da
törətmişdir. Mənfur düşmən işğal dövründə Tərtərçayın da suyunun qabağını kəsmiş
və bir neçə rayonumuzda yüz min hektardan çox torpaq susuz qalmışdır. 1974-cü
ildə Ulu Öndər Heydər Əliyevin tapşırığı ilə yaradılmış Bəsitçay qoruğunda 100
hektardan çox sahədə nadir çinar ağacları dövlət tərəfindən qorunurdu. İşğaldan
sonra mənfur düşmən yaşı təqribən 200-300 ilə bərabər olan çinarların böyük
hissəsini acımadan kəsib, doğrayıb, talayıb və yandırıb. Bu gün ölkə Prezidentinin
göstərişilə azad edilmiş bütün torpaqlarda bərpaolunan enerji növləri və yerləri
müəyyənləşdirilir, "Yaşıl enerji” zonası yaradılır. Prezident İlham Əliyev də çıxışlarında
azad olunmuş ərazilərin "yaşıl enerji” zonasına çevriləcəyini dəfələrlə
bildirib. Azad edilmiş bütün torpaqlarda su, günəş, külək enerjisindən istifadə
olunacaq. Ölkə baçısının da vurğuladığı kimi, azad edilmiş torpaqlar "yaşıl
enerji” zonası olacaq. Zəngilan rayonunda birinci pilot "ağıllı kənd” layihəsi
də məhz bərpaolunan enerji ilə təchiz ediləcəkdir. "Yaşıl enerji”nin inkişafı
investisiya cəlbinin əsas istiqamətlərindən biridir. Kəlbəcər və Laçın
rayonlarında külək enerjisinin, Zəngilan, Cəbrayıl rayonlarında daha çox günəş
enerjisinin böyük potensialı vardır. Kəlbəcər və Laçında ermənilər tərəfindən
uzun illər ərzində qanunsuz istismar edilmiş, onlar tərəfindən dağıdılmış bütün
su elektrik stansiyaları bərpa ediləcək. Yalnız Kəlbəcər və Laçın rayonlarında
bərpa ediləcək stansiyaların generasiya gücü 120 meqavat olacaqdır. "Xudafərin”
və "Qız qalası” su elektrik stansiyalarından da əlavə 120 meqavat güc alınacaqdır. Bu gün tam əminliklə
söyləyə bilərik ki, Vətən müharibəsində əldə etdiyimiz tarixi zəfər və Azərbaycanın
təşəbbüsləri işğaldan azad edilmiş bölgələrimizi inkişaf etdirir. Düşmən tapdağından azad olunmuş
torpaqlarda bu gün yeni yollar çəkilir, infrastruktur lahiyələri icra olunur. Prezident İlham Əliyevin
təməlini qoyduğu, uzunluğu 100 kilometr olan Horadiz-Ağbənd dəmir yolu xəttinin
strateji əhəmiyyəti olduqca böyükdür. Bu nəqliyyat infrastrukturu vətəndaşlarımızın
azad olunmuş torpaqlara gediş-gəlişini asanlaşdıracaq. Noyabrın 10-da imzalanmış Birgə Bəyanatda
Naxçıvan dəhlizinin yaradılması ilə bağlı xüsusi müddəa vardır. Bu müddəa Azərbaycanın
əsas hissəsi ilə Naxçıvan arasında birbaşa dəmir yolu nəqliyyat əlaqəsinin
yaranmasına böyük töhfə verəcək. Bütün bunlar isə yalnız İkinci Qarabağ müharibəsində
ordumuzun şanlı qələbəsindən sonra bərpa olunmağa başlamışdır. Ən əsası da Pandemiya
şəraitində dünya iqtisadiyyatında böyük problemlərin yarandığı bir dövrdə Azərbaycan
Prezidentinin təşəbbüsü ilə aparılan genişmiqyaslı işlər dövlətimizin güc və
qüdrətini nümayiş etdirir. Bu gün hər bir Azərbaycan
vətəndaşı Vətən müharibəsinin çoxşaxəli əhəmiyyətindən qürur hissi ilə danışır.
Məhz bu şanlı Qələbənin nəticəsidir ki, doğma torpaqlarımız işğalçılardan azad
edildi, düşmən torpaqlarımızdan qovuldu. Ölkəmizin ərazi bütövlüyü bərpa
olundu. Bütün dünyaya dövlətimizin qüdrəti, xalqımızın əyilməz ruhu nümayiş
olundu. Ölkəmizin gələcəyi ilə bağlı strateji hədəflərə çatmaq üçün önəmli sənədlər
imzalandı. Qurulan dəmir yolu infrastrukturu Türkiyəyə qədər uzanacaq və beləliklə,
Azərbaycanı Türkiyə ilə birləşdirən ikinci dəmir yolu şəbəkəsi yaradılacaqdır.
Ölkə Prezidentinin də qeyd etdiyi kimi, bölgə ölkələri də bu yolun tikintisinə
böyük maraqla yanaşırlar. Dəmir yol infrastrukturunun bərpasının, nəqliyyat
layihələrinin bölgə üçün xüsusi əhəmiyyəti vardır. Belə ki, bütün bölgə ölkələri
ancaq xeyir götürür. Bölgəmizin uzunmüddətli inkişafı, sabitliyi təmin edilir və
müharibə riskləri sıfra endirilir. Azərbaycan Naxçıvanla, Türkiyə ilə birləşir.
Rusiyadan Ermənistana dəmir yolu xətti yalnız Azərbaycan ərazisindən keçə bilər.
Rusiya ilə İran arasında Naxçıvan ərazisi ilə dəmir yolu bağlantısı yaranır. İran
ilə Ermənistan, eləcə də Türkiyə ilə Rusiya arasında dəmir yolu bağlantısı
olacaq. Bakı-Tbilisi-Qars dəmir yolunun istismara verilməsi nəticəsində artıq
Rusiya ilə Türkiyə arasında bu dəmir yolundan istifadə edərək yüklər daşınmağa
başlamışdır. Bu layihə Prezident İlham Əliyevin böyük uzaqgörənliyi və iradəsi,
Azərbaycan dövlətinin maliyyəsi ilə reallaşıb. Ölkə Prezidentinin də
söylədiyi kimi, Bakı-Tbilisi-Qars dəmir
yolu ölkəmizin geosiyasi əhəmiyyətini, iqtisadi gücünü artırır. Azərbaycan
etibarlı tranzit ölkəsi kimi tranzit layihələrdən böyük maliyyə gəliri əldə edəcək,
bölgədə sabitlik və sülh təmin olunacaq. Bu gün işğaldan azad
olunmuş ərazilərimizdə aparılan yenidənqurma, bərpa-quruculuq işləri mənfur
düşmən tərəfindən qısqanclıq hissi ilə qarşılanır. Bu gün də Ermənistanda revanşist qüvvələr baş qaldırmağa, Azərbaycanı
növbəti təxribatlarla müharibəyə təhrik etməyə çalışırlar. Dövlətimizin
başçısının da vurğuladığı kimi, biz
hər şeyə nəzarət edirik və heç vaxt imkan verə bilmərik ki, erməni faşizmi bir
daha başını qaldırsın. Biz erməni faşizmini məhv etmişik. Düşməni öz doğma
torpaqlarımızdan qovmuşuq. Ermənistan ordusu demək olar ki, məhv edilib. Həm
texnika dağılıb, həm canlı qüvvə dağılıb. Müharibə zamanı düşmən ordusunun 10
min fərarisi olubdur. Azərbaycan Ordusunda bir nəfər də fərari olmayıbdır. Bu,
xalqımızın, Ordumuzun yüksək mənəvi ruhunun təzahürüdür. Ölkə Prezidentinin də
qeyd etdiyi kimi, biz döyüş meydanında Qələbə qazandıq, torpaqları vuruşaraq
işğalçılardan azad etdik. Ən əsası da Ermənistan noyabrın 10-da kapitulyasiya
aktına imza atmağa və Laçın, Kəlbəcər, Ağdam rayonlarını qaytarmağa məcbur oldu. Ermənistanın və onun
bəzi xarici havadarları yalnız beş rayonu Azərbaycana qaytarmaq, Dağlıq
Qarabağa nə vaxtsa müstəqillik verilməsini, Kəlbəcər və Laçın rayonlarını Ermənistanın
əbədi nəzarəti altında qalmasını istəyirdilər. Lakin Azərbaycan Prezidenti
milli maraqlardan çıxış edərək bu təklifləri rədd etdi, Vətən müharibəsi
modelini seçdi, ölkəmizi addım-addım qələbəyə hazırladı və "dəmir yumruq əməliyyatı”
ilə düşmənə sarsıdıcı zərbəsini vurdu. Ölkə Prezidentinin bildirdiyi kimi, 44
günlük Vətən müharibəsində biz güc, iradə, cəsarət göstərərək istədiyimizə nail
olduq. Bu gün qazandığımız Qələbə,
Zəfərlə yanaşı, biz keçmişdə buraxılan səhvləri də unutmamalıyıq. Yetişməkdə
olan gələcək nəsillər bilməlidir ki, Laçın rayonunun işğal altına düşməsi
faktiki olaraq Ermənistanla Dağlıq Qarabağ arasında coğrafi bağlantı
yaratmışdır. 1992-ci il mayın 8-də Şuşanın işğalından 10 gün keçəndən sonra strateji
nöqteyi-nəzərdən çox böyük məğlubiyyət sayılan Laçın rayonu da işğal altına
düşdü. Ölkə başçısının da
söylədiyi kimi, Laçın rayonunu və
Şuşanı satanlar eyni adamlardır. AXC-Müsavat mənfur cütlüyü hakimiyyətə gəlmək
üçün bu torpaqları düşmənə satıb, bu xəyanəti edib, bu cinayəti törədib. AXC-nin
nəzarəti altında qüvvələr olsa da, Şuşanı boşaltmışdılar. Şuşa ermənilər oraya
girəndə, faktiki olaraq, boş idi, müdafiə olunmurdu. Sonra Laçın rayonunu da
satmış, ondan sonra heç bir ay keçməmiş hakimiyyətə gəlmişdilər. 1993-cü ilin
aprelində Kəlbəcər də işğal altına düşəndən sonra qorxaqcasına qaçıb gizlənib,
fərarilik etmişlər. Prezident İlham Əliyevin də qeyd etdiyi kimi, Azərbaycan
xalqı bu tarixi, bu satqınları, bu xainləri, bu düşmənləri unutmamalıdır! Ən əsası isə bu gün fəxrlə
söyləyə bilərik ki, AXC-Müsavat
cütlüyünün satdığı torpaqları biz döyüşərək azad etmişik. Torpaqları düşməndən
azad edən Müzəffər Ordunun Ali Baş Komandanı kimi cənab Prezident İlham Əliyev Azərbaycan
bayrağını həmin torpaqlarda qaldırdı. Əldə etdiyimiz şanlı Zəfərlə bütün
dünyaya sübut etdik ki, bizim Qələbəmiz tarixi Qələbədir. Biz tarixi ədaləti bərpa
etdik. Biz öz haqlarımızı bərpa etdik, biz şəhidlərimizin qanını aldıq, biz
düşməndən qisas aldıq və qayıtdıq. Heç kim bizi bundan sonra bu torpaqlardan tərpədə
bilməz. Qarabağ bizimdir! Qarabağ Azərbaycandır! GOYEZEN.AZ
Facebook-da paylaş