Daş Salahlı kənd 1 saylı körpələr evi-uşaq bağçası üçün yeni binanın inşasına start verilib
Son illər ölkə Prezidenti cənab İlham Əliyevin rəhbərliyi
altında respublikamızda genişmiqyaslı tikinti və abadlıq işləri aparılır.
Bölgələrdə yeni sosial obyektlər tikilir, infrastruktur layihələri həyata
keçirilir, çoxmərtəbəli yaşayış binaları və yollar əsaslı təmir olunur, müasir
dizaynda parklar, bağlar salınır. Ölkə başçısının və Birinci vitse-prezident Mehriban
Əliyevanın respublikamızda uşaq və yeniyetmələrə, gənclərə göstərdikləri
diqqət və qayğı da dövlət siyasətinin əsasını təşkil edir. Məhz bu qayğı
sayəsində bölgələrdə yeni-yeni məktəblər, körpələr evi-uşaq bağçaları inşa
edilir və yaxud da əsaslı təmir olunur. Dövlət başçısının diqqət və qayğısı sayəsində Qazaxda
da uşaqların daha yaxşı şəraitdə tərbiyə və
təhsil almaları üçün lazımi tədbirlər görülür. Rayon rəhbərinin uşaqlara
olan qayğısı sayəsində rayonda mövcud olan 25 körpələr evi-uşaq bağçasından
(6-sı şəhər, 19-u kənd üzrə) 20-nin müasir tələblərə cavab verən səviyyəyə
çatdırılması da bu dediklərimizin əyani sübutudur. Ötən yazımızda xəbər verdiyimiz kimi, "Qazax
Sement Zavodu” MMC Azərbaycanın iri sement istehsalçılarından biri olaraq
rayonda görülən işlərə öz töhfəsini verməkdə davam edir. Belə ki, zavod fəaliyyətə
başladığı ilk gündən nəinki tikinti sektorunda fərqlənməyi qarşıya məqsəd
qoyub, bu şirkət eyni zamanda öz xeyirxah əməlləri ilə də hər zaman seçilməyi
bacarır. Zavodun yerləşdiyi Daş Salahlı kəndində həyata keçirdiyi çoxsaylı
işlər hər kəsə məlumdur. Zavod tərəfindən 2017-ci ildə Daş Salahlı kənd 2 saylı
uşaq bağçasının və 3 saylı körpələr evi-uşaq bağçasının əsaslı şəkildə yenidən
qurularaq körpə balaların istifadəsinə verilməsi deyilənlərə bariz nümunədir. Öz
ənənəsinə sadiq qalan "Qazax Sement Zavodu” MMC xeyirxah əməllərini bu il
də davam etdirir. Artıq zavod kənddə təmirə ehtiyacı olan Daş
Salahlı kənd 1 saylı körpələr evi-uşaq bağçası üçün də 55 yerlik
yeni binanın inşasını öz üzərinə götürüb. Bu isə o deməkdir ki, bu xeyirxahlıq
sayəsində kənddə olan üçüncü bağça da tam müasir səviyyəyə çatdırılacaq.
Bu gün Qazax Rayon İcra Hakimiyyətinin
başçısı Rəcəb Babaşov "Qazax Sement Zavodu” MMC-nin İdarə heyətinin üzvü
Hikmət Əliyev və digər aidiyyəti şəxslərlə birlikdə Daş Salahlı kənd 1
saylı körpələr evi-uşaq bağçası üçün yeni tikiləcək binanın yerinə baxış
keçirib, görülən işlərlə tanış olub. Rayon rəhbərliyinə məlumat verilib ki, hazırda inşa
olunacaq binanın özül hissəsinin tökülməsi üçün qazıntı işləri aparılır.
Görülən işlərlə tanış olan rayon rəhbəri lazımi tapşırıq və tövsiyələrini
verib. Bağça müdiri Təranə Sultanova uşaqlara göstərilən
dövlət qayğısına görə ölkə Prezidenti İlham Əliyevə rəhbərlik etdiyi kollektiv və valideynlər adından
minnətdarlığını bildirib. Bağça müdiri qeyd edib ki, bu gün ölkəmizdə
sahibkarlara göstərilən dövlət qayğısının nəticəsidir ki, onlar da öz növbələrində
bu cür xeyirxah əməllərə imza atırlar. Yeni bağça binasının tikintisinə görə bütün
kənd sakinləri adından "Qazax Sement Zavodu” MMC-nin kollektivinə və rayon
rəhbərliyinə bir daha təşəkkürlərini çatdıran bağça müdiri rayonda, eləcə də
Daş Salahlı kəndində görülən işləri yüksək qiymətləndirib.
GOYEZEN.AZ
Facebook-da paylaş