Bu gün ölkəmizdə Prezident İlham Əliyevin rəhbərliyi altında həyata keçirilən dövlət siyasətinin əsasında vətəndaşlara göstərilən qayğı, vətəndaş məmnunluğunun təmin edilməsi dayanır. Ölkə başçısının rəhbərliyi ilə həyata keçirilən işlər, atılan addımlar, icra olunan layihələr onu söyləməyə əsas verir ki, dövlət hər zaman öz vətəndaşının yanında olmağı əsas götürür. Dövlət başçısının verdiyi tapşırıq və tövsiyələr vətəndaşların sosial rifah halının yaxşılaşdırılmasına, qaldırılan məsələlərin, edilən müraciətlərin müsbət həllini tapmasına yönəldilib.

Ölkə Prezidenti İlham Əliyev tərəfindən vətəndaşlara göstərilən diqqət və qayğı Qazaxda da hər zaman hiss olunur. Rayon rəhbərliyi tərəfindən sakinlərə olan səmimi münasibət, vətəndaşlara göstərilən qayğı, edilən müraciətlərə operativ şəkildə cavab verilməsi, vətəndaşların yaşadığı ünvandan asılı olmayaraq yerində baxış keçirilməsi, qaldırılan məsələlərin həlli istiqamətində yerindəcə tapşırıq verilməsi Qazaxda vətəndaş amilinin daim diqqət mərkəzində olması deməkdir. Vətəndaşlara olan qayğının nəticəsidir ki, bu gün hər bir sakin Rayon İcra Hakimiyyətinə ünvanlanmış müraciətə, yazılan məktuba dəqiq şəkildə baxılacağına, həssaslıqla yanaşılacağına inanır.

GOYEZEN.AZ internet portalının feysbuk səhifəsinə edilən müraciətin qısa bir vaxtda müsbət həllini tapması bu dediklərimizin əyani sübutudur. Ötən gün Ağstafa rayonunun Aşağı Göycəli kənd sakini Rəhimov Ruslan Zakir oğlunun Qazax rayonunun Xanlıqlar kəndindəki yolla bağlı müraciətinə rayon rəhbərliyi tərəfindən münasibət bildirilməsi, qeyd edilən məsələnin qısa zamanda aradan qaldırılması vətəndaş məmnunluğunun təmin olunmasına xidmət edir.