Tarixi həqiqətlər olduğu kimi yadda saxlanılmalıdır
Dağlıq Qarabağ münaqişəsi artıq başa çatmış, tarixə çevrilmişdir. Bu gün
bizim yaşadığımız bu tarix olduğu kimi, təhrif olunmadan xalqın yaddaşında
qalmalı, gələcək nəsillərə çatdırılmalıdır. Biz münaqişədən
sonrakı mərhələ barədə danışmazdan əvvəl başa düşməliyik ki, bu ərazilər 30 il
işğal altında olub. Bu illər ərzində insanlar min bir əziyyət çəkmiş, günahsız
insanlar qurban getmiş, müsibət dolu bir zaman yaşanmışdır. Biz xatirələri, ailə
üzvlərini itirən insanların və həmin ərazilərdə fundamental yaşamaq hüququ olan
insanların bu hüquqdan məhrum edilməsini yaddaşlardan silə bilmərik. Bu tarix
olduğu kimi qalmalı, baş vermiş hadisələr gələcək nəsillərə olduğu kimi
çatdırılmalıdır.
Aprelin 13-də ADA
Universitetində keçirilən "Cənubi Qafqaza yeni baxış: münaqişədən sonra
inkişaf və əməkdaşlıq" adlı beynəlxalq konfransda Prezident İlham Əliyev
dünyanın aparıcı beyin mərkəzləri nümayəndələrinin vasitəsilə həqiqətlərimizi
bir daha dünyaya çatdırdı.
Azərbaycan 44 gündə BMT
Təhlükəsizlik Şurasının qərar və qətnamələrini icra edərək haqqı, ədaləti bərpa
etdi, işğala son qoydu, işğalçı Ermənistanın və ona havadarlıq edən dövlətlərin
taktikasını açıqladı. Tarixi ədalətin bərpa olunması istiqamətində Azərbaycan
Ordusunun rəşadəti, qələbə əzmi bu günədək ölkəmizə qarşı dövlətlərin hansı
mövqedə dayandıqlarına, ən əsası kimin münasibətlərdə səmimi və ədalətli
olduğuna işıq saldı. Dövlətimizin başçısının istər İkinci Qarabağ müharibəsi
dövründə xarici mətbuata müsahibələrinə, istər yerli və xarici media
nümayəndələri üçün keçirdiyi mətbuat konfrasına, istərsə də ADA Universitetində
keçirilən "Cənubi Qafqaza yeni baxış: münaqişədən sonra inkişaf və
əməkdaşlıq" adlı beynəlxalq konfransa diqqət yetirmək kifayətdir. Müxtəlif
dövlətləri təmsil edən televiziya kanallarının suallarını diplomatik şəkildə,
səbr və təmkinlə, tarixi faktların dili ilə cavablandıran Prezident İlham
Əliyevin tarix və hüquq dərsləri Azərbaycanın nəinki döyüş meydanında, eyni zamanda,
informasiya cəbhəsində üstünlüyünü bir daha təsdiqləyir. Ölkə Prezidenti bir
daha müharibənin nə zamanadək davam edəcəyini, ATƏT-in Minsk qrupu
həmsədrlərinin vasitəçilik missiyalarını yerinə yetirərkən neytrallığı
qorumamalarını, ən əsası Rusiya, Fransa və ABŞ-ın təşəbbüsü ilə əldə edilən
atəşkəs razılaşmasının üç dəfə Ermənistan baş nazirinin əmrinə uyğun olaraq
sərhəddən xeyli uzaqda olan yaşayış məntəqələrimizin, iki dəfə Gəncənin, üçüncü
dəfə Bərdənin raket atəşinə tutulması nəticəsində kobud şəkildə pozulmasını,
həmçinin Azərbaycan və Ermənistan Xarici İşlər nazirlərinin ATƏT-in Minsk qrupu
həmsədrlərinin iştirakı ilə görüşündən sonra işğaldan azad edilən
torpaqlarımızın atəşə tutulmasını və sair məqamları bir daha xatırladaraq,
işğalçı dövlətin taktikasının nədən ibarət olduğunu geniş auditoriyaya
çatdırdı. İşğalçı Ermənistan illərdir
dünyaya münaqişə ilə bağlı yalan informasiya yayırdı, həqiqətləri özünün yalan
təbliğatının arxasında gizlətməyə çalışırdı. Münaqişənin diplomatik yolla
həllinin mümkün olmadığını bildirən Ermənistanın baş naziri Nikol Paşinyanın bu
sərsəmliyinin əksinə olaraq havadarları hərb yolunun mümkünsüzlüyünü qeyd
edirdilər. Tarixi ədaləti bərpa edən Azərbaycan Ordusu münaqişənin hərb yolu
ilə həlli variantının mümkünlüyünü nümayiş etdirir. 6 şəhər, 5 qəsəbə, 300-ə
yaxın yaşayış məntəqələrimiz işğaldan azad edildi.
Mayasında yalan, hiylə və
xəyanət olan ermənilər törətdikləri müharibə cinayətlərini, vəhşilikləri
ört-basdır etmək üçün total yalan və feyklərdən istifadə edirlər. Bu günə qədər
ermənipərəst siyasəti ilə diqqətdə olan, Azərbaycanın əleyhinə təbliğat aparan
bir qrup beynəlxalq hüquq müdafiə təşkilatlarının bu gün ölkəmizin, ordumuzun
ədaləti bərpa etməsinə öz dəstəyini göstərərək Ermənistan silahlı qüvvələrinin
beynəlxalq hüquq tərəfindən qadağan edilmiş silahlardan istifadə etdiklərini
təsdiqləməsi də diplomatik uğurlarımızın tərkib hissəsidir. 30 ilə yaxın
müddətdə dünya dövlətlərinin, nüfuzlu beynəlxalq təşkilatların bəyanatlardan
konkret əməli işə keçəcəyinə inam nümayiş etdirən Azərbaycan dövləti, xalqı
səbrinin tükənməz olmadığını göstərərək Dağlıq Qarabağ probleminin ədalət,
milli qürur məsələsi olduğunu döyüş meydanında bir daha işğalçı Ermənistana və
havadarlarına çatdırdı. Ermənilərin feyk xəbərləri fiaskoya
uğradı.
Saxta tarix yazmaq çıxış yolu
deyil. Bu saxtalıq gec-tez həqiqət qarşısında aciz duruma düşür. Necə ki,
Ermənistan 44 günlük İkinci Qarabağ müharibəsində diz çökdü, kapitulyasiya
aktına imza atdı. Azərbaycanın üstünlüyünü şərtləndirən əsas amillərdən biri də
məhz öz gücünə, beynəlxalq hüquqa, tarixi faktlara söykənməsidir.
Azərbaycan tarixinə zaman-zaman
başqa don geyindirilmiş, saxtalaşdırılmasına təşəbbüs göstərilmişdir. Xalqımıza
qarşı cinayət törədənlər qəhrəman kimi təqdim olunmuşdur. Azərbaycanlıları qətləyetirən, soyqırımı törədən Şaumyan və onun kimi digər
cinayətkarlar ifşa olunmalı, əsl simaları və törətdikləri qanlı əməllər xalqa
olduğu kimi çatdırılmalıdır. Gələcək gənc nəsillər Zəngəzurun tarixi Azərbaycan
ərazisi olmasını bilməlidir. Bilməlidir ki, Zəngəzur 1920-ci ildə, 101 il
bundan öncə Ermənistana verilib. Ondan əvvəl bu ərazi Azərbaycana məxsus olub. Bunu
təsdiq etmək üçün XX əsrin əvvəllərindəki xəritəyə baxmaq kifayətdir. Həmin xəritədə
Göyçə gölü var. Həmin xəritədə Sevan gölü yoxdur. Gənc nəsil həqiqətləri bilməli, tarixi hadisələri olduğu kimi yadda
saxlamalıdır.
Elçin İSMAYIL,
"Göyəzən” qəzetinin
baş redaktoru
Dövlətimizin başçısı İlham Əliyevin informasiya cəbhəsində Azərbaycanın
qalibiyyətini təmin etmək üçün atdığı addımlar bəzən bilərəkdən, bəzən isə
bilməyərəkdən, daha çox isə Ermənistana dəstəkdən həqiqətlərimizi inkar yolunu
tutan beynəlxalq hüquq müdafiə təşkilatlarının mövqelərində də dəyişikliklərə
yol açmışdır. Ermənistan silahlı qüvvələrinin qadağan edilmiş silahlardan
istifadə etdiyi beynəlxalq hüquq təşkilatlar tərəfindən də təsdiqlənir. "Amnesty
International" və "Human Rights Watch" beynəlxalq hüquq
təşkilatlarının hesabatları bu baxımdan diqqətçəkən oldu. Bu qurumların daim
Azərbaycana qarşı qərəzli mövqedə dayanmaları, Ermənistanı müdafiə edən
təşkilatlar kimi imic qazanmaları hər kəsə məlumdur. Bu qurumların hesabatları
göstərdi ki, artıq həqiqəti gizlətmək çətinləşir.
Facebook-da paylaş