Qazax Dövlət Rəsm Qalereyasında Xocalı faciəsinin 28-ci ildönümünə həsr olunmuş tədbir və rəsm sərgisi keçirilib
Xocalı faciəsinin
törədilməsindən 28 il ötür. Respublikamızın hər yerində olduğu kimi, Qazax
rayonunda da faciə ilə bağlı silsilə tədbirlər keçirilir. Qazax
Rayon İcra Hakimiyyətinin başçısı Rəcəb Babaşov "Xocalı soyqırımının
iyirmi səkkizinci ildönümünün keçirilməsinə dair tədbirlər planı”nın
hazırlanması haqqında 13 fevral 2020-ci il tarixli 9-21/18 nömrəli Sərəncam
imzalayıb. Sərəncama əsasən Xocalı soyqırımının iyirmi səkkizinci ildönümünün
keçirilməsi ilə əlaqədar hazırlanmış tədbirlər planına uyğun olaraq rayonda
fəaliyyət göstərən idarə və təşkilatlarda, eləcə də təhsil, səhiyyə və
mədəniyyət müəssisələrində anım tədbirləri təşkil edilir. Qazax Dövlət Rəsm Qalereyasında da Xocalı faciəsinin 28-ci ildönümünə həsr
olunmuş tədbir və rəsm sərgisi keçirilib. Tədbirdə Ağstafa Regional Mədəniyyət İdarəsinin rəisi Vüqar
Qədirov, idarənin Qazax rayonu üzrə nümayəndəsi Valeh Vəliyev, Mədəniyyət İşçiləri
Həmkarlar İttifaqı Qazax rayon Komitəsinin sədri İsgəndər Qurbanov, Qazax Gənclərin
İnkişaf və Karyera Mərkəzinin direktoru İsmayıl Süleymanov, mədəniyyət
işçiləri, dərnək üzvləri, rayon ictimaiyyətinin nümayəndələri iştirak ediblər. Məktəblilərin də iştirak etdiyi tədbirdə Xocalı
faciəsi qurbanlarının və Azərbaycanın ərazi bütövlüyü uğrunda canlarını fəda edən
şəhidlərimizin xatirəsi bir dəqiqəlik sükutla yad olunub. Qazax Dövlət Rəsm Qalereyasının müdiri Münəvvər Xəlilova çıxış edərək
faciənin yaranma səbəblərindən, hadisəni törədənlərin vəhşiliklərindən
danışıb. Xalqımızın qan yaddaşına silinməz izlərlə yazılan Xocalı faciəsinin
bütün bəşəriyyətə, insanlığa qarşı törədilmiş bir faciə olduğunu diqqətə
çatdırıb. Daha sonra çıxış edənlər ermənilər tərəfindən
dinc əhaliyə qarşı törədilən vəhşiliyin təkcə azərbaycanlılara deyil, insanlığa
qarşı törədilən qatı cinayət olduğunu bildiriblər. Diqqətə çatdırılıb ki, 1992-ci il fevralın 25-dən 26-na
keçən gecə Ermənistan silahlı qüvvələri Xocalı şəhərinə hücuma keçmiş, bütün
beynəlxalq hüquq, o cümlədən beynəlxalq humanitar hüquq normalarını pozaraq
oraya zirehli texnika yeritmiş, şəhərin dinc əhalisinə misli görünməmiş qəddarlıqla
divan tutmuşlar. Bu müdhiş
soyqırımı zamanı Ermənistan
silahlı qüvvələrinin mühasirəsində qalmış şəhər sakinlərindən 613 nəfər,
o cümlədən 106 qadın, 63 uşaq və 70 qoca xüsusi qəddarlıqla öldürülüb, 1275
insan əsir və girov götürülərək işgəncələrə məruz qalıb. Onlardan 150 nəfərin,
o cümlədən 68 qadın və 26 uşağın taleyi bu günədək məlum deyil. Qırğın zamanı
487 nəfər müxtəlif dərəcəli bədən xəsarətləri alıb. Həmçinin 8 ailə tamamilə məhv
edilib, 130 uşaq valideynlərindən birini, 25 uşaq isə hər iki valideynini
itirib. Həmin insanlar yalnız etnik mənsubiyyətlərinə - azərbaycanlı
olduqlarına görə amansızcasına öldürülüb, işgəncələrə məruz qalıb və şikəst
ediliblər. Bildirilib ki, Xocalı
haqqında həqiqətlərin dünyaya çatdırılması, bu faciənin xalqımıza qarşı
soyqırımı aktı kimi tanınması üçün Azərbaycan dövləti tərəfindən bütün zəruri
addımlar atılır. Bu sahədə məqsədyönlü fəaliyyətə Ümummilli Lider Heydər Əliyev
Azərbaycanda siyasi hakimiyyətə qayıdandan sonra başlanıldığı, Ulu Öndərin təşəbbüsü
ilə Xocalı soyqırımına siyasi-hüquqi qiymət verildiyi, fevralın 26-nın Xocalı
Soyqırımı Günü elan edildiyi diqqətə çatdırılıb. Qeyd olunub ki, 2008-ci ildə
Heydər Əliyev Fondunun vitse-prezidenti Leyla Əliyevanın təşəbbüsü ilə
başlanmış "Xocalıya ədalət!” beynəlxalq kampaniyası bu istiqamətdə təbliğat
işini daha da fəallaşdırıb. Tədbirdə rəsm dərnəyinin üzvlərinin mövzuya həsr olunmuş əsərləri nümayiş
olunub və tədbir iştirakçıları tərəfindən rəğbətlə qarşılanıb. Məktəblilər faciəyə
həsr olunmuş şeirlər səsləndiriblər.
GOYEZEN.AZ
Facebook-da paylaş