İcra başçısı Qazaxda yeni fəaliyyət göstərən "Massive” mebel fabrikində olub
Bu gün birmənalı şəkildə qeyd edə bilərik ki,
Azərbaycanda ölkənin qeyri-neft sektorunun davamlı inkişafı, ölkə
iqtisadiyyatının ixrac qabiliyyətinin artırılması, ətraf rayonlarda məşğulluğun
tam təmin olunması istiqamətində məqsədyönlü addımlar atılır, genişmiqyaslı
layihələr reallaşdırılır. Ölkə Prezidentinin qayğısı sayəsində respublikamızın
bütün bölgələrində böyük sənaye parklarının yaradılması, fabriklərin inşa olunması
bu sahədə görülən işlərin bariz nümunəsidir. Bunun təməlində isə Ulu Öndər Heydər Əliyevin uğurlu
siyasəti, düzgün qərarları dayanır. Məhz sahibkarlıq sektorunda Ulu Öndərin
əsasını qoyduğu, bu gün isə onun layiqli davamçısı Prezident İlham Əliyev
tərəfindən həyata keçirilən islahatlar nəticəsində ölkədə fəaliyyət göstərən
kiçik və orta sahibkarların sayı artır, böyük sahibkarlığa uğurlu addımın
təməli qoyulur. Respublika Prezidenti İlham Əliyevin rəhbərliyi ilə
ölkədə sahibkarlığın inkişaf etdirilməsi istiqamətində həyata keçirilən həmin
məqsədyönlü tədbirlər Qazax rayonunda da uğurla icra olunur. Rayonda
sahibkarlığın inkişaf etdirilməsinə verilən dəstəyin, sahibkarlar üçün
yaradılan münbit şəraitin və şəffaf mühitin təmin edilməsinin nəticəsidir ki,
bu sahə sürətlə inkişaf edir. Bunu rayonda yaradılan yeni-yeni sahibkarlıq
obyektləri, kənd təsərrüfatı və sənaye məhsulları istehsal edən müəssisələr,
istifadəyə verilən fabriklər, dükanlar, mağazalar, marketlər, otellər və s.
söyləməyə əsas verir. Qazaxda fəaliyyət göstərən "Massive mebel” MMC də bu gün respublikamızda kifayət qədər tanınır. Hazırda Ə.Şıxlinski küçəsində
yerləşən mebel fabrikinin istehsal etdiyi məhsullar da alıcılar tərəfindən
böyük rəğbətlə qarşılanır. Martın 19-da Qazax Rayon İcra Hakimiyyətinin başçısı
Rəcəb Babaşov yeni mebel fabrikinin fəaliyyəti ilə maraqlanıb, burada
çalışan işçilərlə səmimi söhbət edib, onlara işlərində uğurlar arzulayıb. "Massive
mebel” MMC-nin təsisçilərindən biri olan Vüqar İsayev fabrik barədə məlumat verərək hazırda 28 nəfər
işçinin çalışdığını, yaxın günlərdə isə əlavə 10 nəfərin də fabrikdə müvafiq
işlə təmin olunacağını bildirib. Əsasən yumşaq mebellər istehsal edən fabrikdə
qonaq, yataq, mətbəx mebellərinin istehsalının da planlaşdırıldığını qeyd edib.
V.İsayev rayon rəhbərliyinə minnətdarlıq edərək bildirib ki,
Qazax rayonunda özəl sektorun inkişafı üçün yaradılan şərait, göstərilən diqqət
və qayğı biz sahibkarlara böyük stimul verir və yeni istehsal obyektləri açmağa
sövq edir. Qeyd edib ki, bu gün əsas hədəfimiz sahibkarlığın inkişafının
sürətləndirilməsi istiqamətində dövlətimiz tərəfindən həyata keçirilən uğurlu
siyasəti dəstəkləmək və bu yolda öz töhfəmizi verməkdir. Ən əsası da kollektiv olaraq alıcıların etimadını, rəğbətini qazanmaq və
onlara yüksək səviyyədə xidmət göstərməkdir. Fabrik sahibi sonda sahibkarlara
göstərilən diqqət və qayğıya, verilən dəstəyə görə ölkə başçısına və rayon
rəhbərliyinə bir daha minnətdarlığını çatdırıb. Bugünkü ziyarəti sahibkarlara
olan dəstəyin bariz nümunəsi kimi qeyd edib.
GOYEZEN.AZ
Facebook-da paylaş