Bu gün müstəqil ölkəmizdə dövlət siyasətinin əsasında vətəndaş amili, vətəndaş məmnunluğu dayanır ki, bunu bütün sahələrdə görürük. Ən əsası da bu, hər bir dövlət məmurunun iş fəaliyyətinin tərkib hissəsi hesab olunur. Ölkə Prezidenti İlham Əliyevin, Birinci vitse-prezident Mehriban Əliyevanın xalqın, vətəndaşların arasında olmaları, onların müraciətlərini, istəklərini dinləmələri bütün dövlət məmurlarına nümunədir.

Vətəndaş amili, ölkə başçısının rəhbər vəzifəli şəxsləri qəbul edən zaman dövlət məmurlarına daim vətəndaşlarla təmasda olmaları, bütün kəndləri gəzmələri, kənd camaatı ilə görüşmələri, vətəndaşların ərizə və müraciətlərinə, onları narahat edən problemlərə həssaslıqla yanaşılması barədə aidiyyəti üzrə verdiyi tapşırıq və tövsiyələr Qazax rayonunda da hər zaman örnək götürülür. Rayonda həyata keçirilən bütün işlərdə vətəndaş məmnunluğunun təmin edilməsinə üstünlük verilir. Rayon rəhbərinin vətəndaşlara göstərdiyi qayğı, sakinlərin qaldırdıqları hər bir məsələyə daim həssaslıqla yanaşması bu dediklərimizin bariz nümunəsidir. 

Noyabrın 18-də rayon rəhbərliyinin Quşçu Ayrım kəndində yaşayan vətəndaşlarla keçirilən səyyar görüşü zamanı sakinlərin kənd ərazisində 7 km uzunluğunda kəndarası avtomobil yollarının cari təmirinə köməklik göstərilməsi və yaşadığı məhəllədə avtomobil yolunun üzərindən keçən qaz borusunun yerinin dəyişdirilməsi barədə müraciət etdiklərini ötən yazımızda qeyd etmişdik. Sakinlərin müraciətlərini dinləyən rayon rəhbəri səslənən hər bir məsələyə həssaslıqla yanaşılacağını, diqqətlə baxılacağını bildirmiş, edilən hər iki məsələnin həlli istiqamətində aidiyyəti üzrə müvafiq tapşırıqlarını vermişdi. 

Artıq sözügedən hər iki müraciət öz müsbət həllini tapıb. Belə ki, kəndarası yollar qreyder vasitəsilə hamarlanıb, həmçinin yoldan keçən qaz borusunun yeri dəyişdirilib. Sakinlərin etdikləri müraciətin müsbət həllini tapması dövlətin vətəndaşlara olan növbəti qayğısıdır. Ən əsası da bu onu göstərir ki, səyyar görüşlərin keçirilməsinin arxasında vətəndaş məmnunluğu dayanır və bu, bundan sonra da belə olacaq. 

Noyabrın 28-də Qazax Rayon İcra Hakimiyyətinin başçısı Rəcəb Babaşov Quşçu Ayrım kəndində olub, sakinlərlə görüşərək görülmüş işlərin nəticəsi ilə maraqlanıb. 

Sakinlər onlara göstərilən qayğıya və müraciətlərinə baxılmasına görə ölkə Prezidenti İlham Əliyevə, rayon rəhbərliyinə minnətdarlıqlarını bildiriblər.