BDU-nun Qazax filialında “İnamla müstəqilliyə doğru” adlı dəyirmi masa təşkil olunub
Bu gün Qazax Rayon Heydər Əliyev
Mərkəzinin 2019-cu ilin noyabr ayı üçün təsdiqlədiyi Tədbirlər
Planına əsasən Mərkəzin təşkilatçılığı ilə Bakı Dövlət Universitetinin Qazax
filialında 17 Noyabr - Milli Dirçəliş Gününə həsr olunmuş "İnamla
müstəqilliyə doğru” mövzusunda dəyirmi masa təşkil olunub. Filialın Heydər
Əliyev auditoriyasında təşkil edilən dəyirmi masada Qazax Rayon İcra
Hakimiyyəti başçısı aparatının aparıcı məsləhətçi-psixoloqu Kəmalə
Cəfərova, Azərbaycan Rəssamlar İttifaqının üzvü Akif Əmirov, Filialın tədris və elmi işlər üzrə direktor
müavini, dosent Məmməd Yusifov, Tələbələrlə iş və ictimaiyyətlə əlaqələr şöbəsinin müdiri Qasım Əliyev, Mətbuat
Mərkəzinin rəhbəri Elçin İsmayıl, tələbələr və Mərkəzin kollektivi iştirak
ediblər. Filialın tədris və elmi işlər üzrə direktor müavini, dosent Məmməd
Yusifov çıxış edərək tədbir
iştirakçılarını, tələbələri 17 Noyabr – Milli Dirçəliş Günü münasibətilə təbrik
edib, Ümummilli Lider Heydər Əliyevin müstəqillik yollarında keçdiyi şərəfli
ömür və siyasi fəaliyyəti haqqında danışıb.
Mərkəzin direktoru Ceyhunə Hüseynova geniş məruzə ilə çıxış
edərək Azərbaycan milli azadlıq hərəkatının başlanğıcı kimi qiymətləndirilən 17
Noyabr – Milli Dirçəliş Gününün 70 il azadlıqdan məhrum edilən, XX əsrin
əvvəllərində isə istiqlalın ləzzətini dadan xalqın etiraz səsini
ucaltdığı, ölkəmizin müasir tarixində özünəməxsus xüsusi çəkiyə
malik, əlamətdar günlər sırasında olduğunu bildirib. Qeyd edib ki, bu
gün haqqında danışmazdan öncə milyondan çox insanın həmin günlərdə meydanlara
çıxaraq Moskvaya, onun apardığı anti-Azərbaycan siyasətinə qarşı haqlı etiraz
səbəblərinin tarixinə nəzər salmaq yerinə düşərdi. 17 Noyabr - Milli Dirçəliş Günü
dövlətimizin müstəqilliyinin bərpa edilməsində tarixi rol oynamışdır. 1988-ci
il 17 noyabrda Bakının əsas hissəsi sayılan Azadlıq meydanında uzunmüddətli
mitinqlər başlandı. Bu hadisələr milli azadlıq hərəkatı kimi qiymətləndirilərək
respublikanın istiqlaliyyət qazanmasında əsas amil sayılır. 1988-ci ildə xalq
hərəkatının alovlandığı bir vaxtda Azərbaycana rəhbərlik edən siyasi qüvvələr
isə mövcud vəziyyəti qiymətləndirə bilmədilər. Xalqın maraqlarından daha çox
imperiyanın maraqlarını düşünən bu adamların siyasi savadsızlığından 20 Yanvar
faciəsi baş verdi. Bir-birini əvəzləyən hakimiyyətlər xalqın dirçəlişini
mütərəqqi səmtə yönəltmək iqtidarında deyildilər. Həmin o ağır məqamlarda yenə
də Ulu Öndər Heydər Əliyev xalqın istiqlal ruhunu ölməyə qoymadı. 1990-cı il
noyabrın 17-də Naxçıvan Muxtar Respublikasının Ali Sovetinin yeni tərkibdə ilk
sessiyası keçirildi. Muxtar respublikanın adından "Sovet” və "Sosialist”
sözləri çıxarıldı. İmperiyanın hələ tarix səhnəsindən silinmədiyi bir dövrdə
Naxçıvanın adından "Sovet” və "Sosialist” sözlərinin çıxarılması
müstəqilliyimizin qazanılması yolunda çox böyük tarixi addım idi. Bununla
Ümummilli Lider milli dövlətçiliyimizin dirçəlişi istiqamətində ilk böyük addım
atdı. Ulu Öndər Heydər Əliyevin sədrliyi ilə keçirilən həmin tarixi sessiyada
muxtar respublikanın dövlət rəmzləri haqqında məsələ də müzakirə olundu. Xalq
deputatlarının müzakirəsindən sonra üçrəngli bayrağın dövlət rəmzi kimi qəbulu
ilə əlaqədar təklif irəli sürüldü. Azərbaycan Xalq Cümhuriyyətinin üçrəngli
bayrağının bərpa olunması barədə qərar çıxaran sessiya onun dövlət bayrağı kimi
qəbul edilməsi ilə əlaqədar Azərbaycanın Ali Soveti qarşısında vəsatət
qaldırdı. Beləliklə, milli dirçəlişdən milli tərəqqiyə doğru uzanan tarixi
yolun başlanğıcı qoyuldu. Azərbaycanda bu
hadisələr milli azadlıq hərəkatı kimi qiymətləndirilir və Vətənimizin
istiqlaliyyət qazanmasında əsas amil sayılır. 1992-ci ildən 17 noyabr tarixi Milli
Dirçəliş Günü kimi qeyd olunur.
Qazax Rayon İcra Hakimiyyəti başçısı
aparatının aparıcı məsləhətçi-psixoloqu Kəmalə Cəfərova çıxış edərək xalqımızın istiqlal mübarizəsinin əsas mərhələlərindən
biri olan 17 Noyabr – Milli Dirçəliş Günü münasibətilə səmimi təbriklərini
çatdırıb. Hakimiyyətə gəlişi ilə xalqa sağlam ruh və özünüdərk gətirən Ümummilli Lider Heydər Əliyevin sovet ideologiyasının sərt qadağalarına
baxmayaraq, milli mənəvi dəyərlərə, Azərbaycan elminin və mədəniyyətinin dirçəlişinə
xüsusi önəm verdiyini, bütün sahələrdə inkişaf və oyanışın müşahidə olunmağa
başladığını qeyd edib. Azərbaycanın əsl intibah və dirçəliş dövrünə qədəm qoyduğunu
bildirib. Ulu Öndərin bizlərə miras qoyduğu müstəqil Azərbaycanın bu gün onun
layiqli davamçısı İlham Əliyevin yürütdüyü məqsədyönlü siyasət nəticəsində daha
inamla və iti addımlarla zirvələrə doğru getdiyini bildirib. Azərbaycan Rəssamlar İttifaqının üzvü Akif Əmirov,
filialın Riyaziyyat informatika fakültəsinin II kurs tələbəsi Səbinə Camalova da
çıxış edərək tədbir iştirakçılarını 17 Noyabr – Milli Dirçəliş Günü
münasibətilə təbrik ediblər. Ulu Öndərin bütün varlığı ilə
bağlı olduğu Azərbaycanın hərtərəfli inkişafı, müstəqilliyinin qorunub
saxlanılması, əbədi və dönməz olması yolundakı fədakar əməyinin bugünkü gənc nəsilə
böyük örnək olduğunu qeyd ediblər. Bu cür
tədbirlərin keçirilməsində yaratdığı şəraitə görə Qazax Rayon İcra
Hakimiyyətinin başçısı Rəcəb Babaşova və Filialın direktoru Arif Rüstəmova
təşəkkürlər bildiriblər.
GOYEZEN.AZ
17 Noyabr - Milli Dirçəliş Günü 2006-cı
ilədək rəsmi bayram kimi qeyri-iş günü idi. Amma həmin ilin dekabrında
qanunvericiliyə edilmiş müvafiq dəyişikliklərdən sonra 17 noyabr tarixi iş günü
sayılır.
Facebook-da paylaş