İllər keçir, zaman dəyişir, xalq olaraq Heydər Əliyevin xalqımız qarşısında, dövlətimizin müstəqilliyinin dönməz  və əbədi olması yolunda əvəzsiz xidmətlərini millət olaraq indi daha dərindən dərk edirik.

XX əsr Azərbaycan üçün mürəkkəb ziddiyyətli hadisələrlə zəngin bir dövr olmuşdur. Yenicə müstəqilliyinə qovuşmuş bir ölkə və səriştəsiz, siyasətdən kənar insanlar. Xalq və dövlət bu iki tərəfin ziddiyyətli proseslərinin müşahidəçisinə çevrilmişdi. Dövlətin  müstəqilliyi təhlükə qarşısında olan bir dövrdə Heydər Əliyev şəxsiyyəti xilaskarlıq missiyasına sadiqlik nümayiş etdirdi və idarəçilik sükanı arxasına keçdi. Zəmanəmizin görkəmli siyasi xadimi Heydər Əliyevin səmərəli fəaliyyəti sayəsində Azərbaycanın dövlətçilik ənənələri bərpa edildi, müstəqilliyimizin möhkəmləndirilməsi, ölkəmizin dinamik iqtisadi inkişafı, beynəlxalq nüfuzu ən yüksək mərhələyə çatdı.

Xilaskarlıq missiyasını həyatı və sağlamlığı bahasına yerinə yetirən Heydər Əliyev xalqı və milləti qarşısında xidmətlərinə, var qüvvəsini və bacarığını Azərbayacanın yüksəlişinə və tərəqqisinə sərf etməsinə görə Ümummilli Lider, Ulu Öndər, Millətin atası, Xalqın Böyük oğlu kimi şərəfli adlara layiq görüldü. 1993-cü ildən qədəmlərini atdığı bu məsuliyyətli və çətin missiyanın həyata keçirilməsi heç də hamar, asan olmadı. Çünki Heydər Əliyev son dərəcə çətin və ziddiyyətli bir dövrdə Azərbaycana gəldi və Azərbaycanın müstəqillik tarixində yeni bir mərhələnin başlanğıcını qoydu.

Heydər Əliyevin xalqın təkidli tələbi ilə hakimiyyətə gəlməsi dövrü ölkənin anarxiya, xaos, hərcmərclik dövrləri idi. Bütün bu çatışmamazlıqları yalnız Heydər Əliyev kimi tarixi şəxsiyyət öz siyasi savadı, idarəçilik bacarığı ilə yoluna qoya bilərdi. Öz dərin zəkası, iti ağlı, mətin iradəsi ilə xalqdan güc alaraq ölkənin iqtisadi-siyasi, sosial-iqtisadi, elmi-mədəni həyatını kökündən dəyişdirdi, ölkədə sabitliyi təmin etdi. Azərbaycanın parlaq gələcəyinin bərqərar olması üçün gecə-gündüz bilmədən fəaliyyət göstərən Heydər Əliyev dünya xəritəsinə suveren və müstəqil Azərbaycan dövlətini bəyan etdi.

Heydər Əliyevin xalq arasında nüfuzundan qorxaraq vəsvəsəyə düşən daxili düşmənlər xarici havadarların dəstəyi və məkrli planları ilə dəfələrlə dövlətə qarşı çevrilişlər, silahlı müdaxilələr etməyə cəhd etdilər. Necə ki, Heydər Əliyevin zəkası, uzaqgörənliyi, siyasi iradəsi sayəsində cəmiyyətimizin bütün sahələrini əhatə etmiş siyasi-iqtisadi, hərbi böhrandan ölkə xilas edilmişdisə, bu zaman da "Xalq-Heydər, Heydər–xalq” birliyi, xalq və hakimiyyət həmrəyliyi sarsılmaz gücə çevrilərək dövlətə qarşı hazırlanmış silahlı çevrilişlərin qarşısını  aldı.

Azərbaycanın böyük oğlu, dahi siyasətçi Heydər Əlirza oğlu Əliyev mənsub olduğu xalqı öz ətrafında birləşdirmək, onu öz dövlətinin müstəqilliyinin qorunması uğrunda mübarizədə birgə vahid olmağa səsləmək, xalqla birgə olaraq dövləti hər cür təhlükədən qorumaq kimi şərəfli məsuliyyətli bir işin öhdəsindən çox məharətlə gəlmiş, xalqın hörmətini, ehtiramını qazanmışdır. Xalqı hər zaman ona inanmış, onun bütün çağırışlarına yekdilliklə səs vermişdir.

Bu gün tam əminliklə söyləyə bilərik ki, Ulu Öndər Heydər Əliyev tərəfindən başladılan Azərbaycanın bütövlüyü kimi tarixi missiyanı cənab Prezident, Silahlı Qüvvələrin Müzəffər Ali Baş Komandanı İlham Əliyev uğurla başa çatdırdı. 2020-ci ilin 27 sentyabrından başlayan və 10 noyabrda Azərbaycanın tarixi Qələbəsi ilə başa çatan 44 günlük Vətən müharibəsində, haqq savaşında böyük Zəfər bizim oldu. Öz çıxışlarında hər zaman "Qarabağ Azərbaycandır!” söyləyən Ali Baş Komandan 44 günlük savaş müddətində öz sözləri ilə, dəyərli fikirləri ilə, düşmənə verdiyi layiqli mesajları ilə bunu anbaan çatdırdı. İşğaldan azad olunmuş torpaqlarımıza etdiyi səfərlərlə, səfər zamanı səsləndirdiyi tarixi çıxışları ilə bütün dünyaya sübut etdi ki, Azərbaycanın müstəqilliyi, bütövlüyü Onun üçün tarixi missiya idi və O, bu missiyanın öhdəsindən layiqincə gəldi. Bütün dünya güclü Azərbaycan dövləti ilə yanaşı, güclü lider İlham Əliyevi də bir daha yaxından tanıdı, izlədi.

Ceyhunə HÜSEYNOVA,

Qazax Rayon Heydər Əliyev Mərkəzinin direktoru