BDU Qazax filialının tarix fakültəsinin I kurs tələbələri Qazax Tarix-Diyarşünaslıq Muzeyinin qonağı olub
Hər
bir vətəndaşın ən ümdə borcu, vəzifəsi Vətənini, yaşadığı ərazinin, şəhərin,
rayonun tarixini, dünənini, bu gününü bilmək və gələcək nəsillərə ötürməkdir. Bütün
bunların öyrənilməsində isə bizlərə hər zaman yardımçı olan muzeylərimizdir.
2016-cı ilin 19 oktyabrında Prezident İlham Əliyevin açılışını etdiyi Qazax
Tarix-Diyarşünaslıq Muzeyi rayonumuzun tarixinin öyrənilməsində böyük əhəmiyyət
daşıyır. Muzey fəaliyyətə başladığı ilk gündən rayonun ali təhsil ocaqları,
ümumtəhsil məktəbləri, eləcə də müxtəlif təbəqədən olan insanlar, qonaqlar bu
gözəl məkana ekskursiya edir. Muzeyin bugünkü qonaqları isə Bakı Dövlət Universitetinin Qazax filialının tarix fakültəsinin I
kurs tələbələri olub. Ekskursiya
zamanı tələbələr muzeydə olan eksponatlarla yaxından tanış
olaraq rayon haqqında ətraflı məlumat əldə ediblər. Muzeyin direktoru Gülnaz Alişanova respublikamızın müxtəlif bölgələrindən
olan tələbələrə məlumat verərək bildirib ki, 1984-cü ildə yaradılan muzey müasir
tələblərə cavab verməyən birmərtəbəli binada fəaliyyət göstərirdi. Muzeyin yeni
binasının inşasına 2015-ci ilin noyabr ayında başlanılıb və 2016-cı ilin
oktyabrında tikinti işləri başa çatdırılıb. Respublika Prezidenti İlham Əliyev
2016-cı il oktyabrın 19-da Muzeyin yeni binasının açılışını edib. Tələbələrə ilk
olaraq 1-ci mərtəbədə yerləşən bölmələr haqqında məlumat verilib. Qazax
rayonunun tarixi, dünəni və bu günü haqqında olan ətraflı məlumat, eləcə də, 34
kəndini özündə əks etdirən xəritə gənclər tərəfindən maraqla qarşılanıb. Bundan
əlavə, Qazaxın tarixi mədəniyyət abidələri, təbiət görüntüləri, "Qazax zaman
kəsiyində: faktlar, şəxsiyyətlər” guşəsində qədim daş dövründən müstəqillik
dövrünə kimi olan tarixi inkişaf haqqında ətraflı məlumat verilib. Qazaxın
faunası, bitki örtüyü və torpaq növləri, təbiət guşələri gənclərin böyük
marağına səbəb olub. Qədim
daş dövrünə aid bölmə ilə tanış olan tələbələrə rayonun Daş Salahlı kəndində
yerləşən Damcılı mağarası, mezolit, neolit, tunc dövrünə aid olan eksponatlar
barədə ətraflı məlumat verilərək onları maraqlandıran suallar cavablandırılıb.
Dəmir dövrünə aid olan bölmədə rayonun son tunc və ilk dəmir dövrünə aid
nümunələr, tunc dövrünə aid kəmər, alban dövrünə aid olan gil qablar, qılınc və
qadın qolbaqları gənclərdə böyük maraq doğurub. Gənclər "Sınıq Körpü” başlıqlı
bölmədə İkinci Şıxlı kəndində yerləşən Sınıq Körpünün şəkli və maketi ilə tanış
olublar. Bundan
əlavə, gənclər "Qazax sultanlığı” adlı bölmədə o dövrdə yaşamış sultanlar,
bəylər, dövlət adamları, şairlər, "Bəy otağı”nda o dövrün xanlarına, bəylərinə
məxsus olan həyat tərzi haqqında ətraflı məlumat alıblar. Daha
sonra ekskursiyaçılar muzeyin 2-ci mərtəbəsində olan "Alaçığa” baxıblar.
Məlumat verilib ki, bu alaçıqlar yaz və yay aylarında qurularmış. "Qazax
xalça məktəbi” adlı bölmədə gənclərin diqqətini çəkən Qazax xalçaları haqqında
məlumatların monitor vasitəsilə nümayiş edilməsi olub. Onlar bir toxunuşla istədikləri
xalça haqqında məlumat əldə edib, tarixən qədim, yundan hazırlanmış xurcuna
baxıblar. "Etnoqrafiya
və folklor” bölməsində Qazax bölgəsinə aid qədim toy adət-ənənələri, bir çox
özəllikləri ilə seçilən "Şax qaldırdı” mərasimi, milli bayramımız olan Novruz
bayramı haqqında olan ətraflı məlumatları tələbələr maraqla qarşılayıblar. Eyni
zamanda bədii və etnoqrafik özəlliklərə malik Qazax geyimləri, 1867-ci ildə
ümum Rusiya at sərgisində mükafat almış "Uzelok” ləqəbli məşhur Dilboz atları
haqqında da gənclərə məlumat verilib. "Səməd
Vurğun” adlı bölmədə Xalq şairinin həyat və yaradıcılığı, Azərbaycan
ədəbiyyatına bəxş etdiyi əvəzolunmaz şeirləri haqqında məlumat alan gənclərə Qazaxın
şairləri, saz, söz adamları ilə tanınması bir daha vurğulanıb.
"Aşıq sənəti” bölməsində ən qədim sənət növü olan aşıq sənəti,
aşıqlarımızdan Cəlal Qəhrəmanov, Məmmədyar Eminov, Avdı Avdıyev, Ədalət Nəsibov
və başqalarının həyatı, yaradıcılığı haqqında, onların aşıq sənətinin inkişafı
naminə gördüyü işlər barədə ətraflı məlumat verilib. "Qazax qəzası” adlı
bölmədə tariximizi yaxından öyrənib, Əliağa Şıxlıniskinin, Nigar
Şıxlıniskayanın, İbrahim ağa Vəkilovun, Fərrux Ağa Qayıbovun və başqa tarixi
şəxsiyyətlərin həyatı, fəaliyyəti barədə maraqlı məlumatlar öyrəniblər. Muzeydə Qazaxın qədimdən bugünədək keçdiyi inkişaf yolu, təbiəti,
mədəniyyəti, adət-ənənəsi, məişəti, tanınmış insanları haqqında geniş məlumat
alan tələbələr buradan xoş təəssüratlarla ayrılıblar. Tarixi məlumatların elektron vasitələrlə çatdırılmasını böyük maraqla
qarşılayıblar. Bu cür ekskursiyaların təşkil olunmasını yüksək qiymətləndiriblər.
GOYEZEN.AZ
"Qazax Müəllimlər Seminariyası”, "Görkəmli şəxsiyyətlər”, "Qazax 1920-1990-cı
illərdə”, "Qazax Dövlət Dram Teatrı”, "1941-1945: II Dünya müharibəsi”, "Müasir
dövr”, "Azərbaycan XXI əsrdə” adlı bölmələrlə tanış olan gənclərə hər bölməyə
aid maraqlı faktlar çatdırılıb. Şəhidlərimizin, Milli Qəhrəmanlarımızın, işğal
altında olan kəndlərimizin adlarını özündə əks etdirən "Ermənistan-Dağlıq
Qarabağ münaqişəsi” adlı bölmədə tələbələrə müharibənin törətdiyi bəlalar,
açdığı yaralar haqqında ətraflı məlumatlar verilib. Bu gün Vətən torpaqlarının
azadlığı uğrunda Qazaxın 287 nəfər şəhid verdiyi diqqətə çatdırılıb.
Facebook-da paylaş