"Müasir xeyriyyəçilik institutunun əsası Heydər Əliyev Fondu tərəfindən qoyulub"
Xeyriyyəçilik, xeyirxah işlər görmək Azərbaycan
xalqının ən mühüm həyati dəyərlərindəndir. XIX əsrin sonu XX əsrin əvvəllərində
daha geniş vüsət alaraq əhalinin zəif sosial təbəqəsinin üzvlərinə, ehtiyacı
olanlara müxtəlif yönlü koməkliklərlə əsl insanlıq kodeksinə çevrilmişdir. Bu
gün də Azərbaycanda xeyriyyəçilik ənənələri davam etdirilir, müasir dövrün
reallıqları və tələblərinə uyğun olaraq daha da inkişaf etdirilir. Tarixi ənənələrimizi dirçəldən, inkişaf etdirən,
sosial-mənəvi tərəqqi üçün səmərəli vasitə yaradan müasir xeyriyyəçilik
institutunun əsası Heydər Əliyev Fondu və fondun Prezidenti, YUNESKO və İSESKO-nun xoşməramlı
səfiri Mehriban xanım Əliyeva tərəfindən qoyulub. Xeyriyyəçilik sahəsində
Cənubi Qafqazda ən böyük təsisat olan Heydər Əliyev Fondu 20 ilə yaxındır ki,
yaradılıb və bu illər ərzində Fondun əsas məqsədi, vəzifəsi insanlara kömək
göstərmək, Azərbaycanı və mədəniyyətimizi dünyaya tanıtmaq, təbliğ etmək,
təhsil, səhiyyə, mədəniyyət, incəsənət, elm sahələrinə töhfə verməkdir.
İnsanların ümidlərini doğrultmaq və xeyriyyəçilik etmək Fondun bütün
fəaliyyətinin aparıcı istiqamətidir. Qarşısına
qoyduğu bütün layihələri uğurla gerçəkləşdirən Heydər Əliyev Fondu milli-mənəvi
dəyərlərimizin qorunması istiqamətində əzmkar fəaliyyəti, təhsil, səhiyyə,
idmanın inkişafı sahəsində dövlətin yürütdüyü siyasətə dəstək verməsi ilə ən
ali ideallara xidmət etdiyini təsdiqləyir. Azərbaycanın hər bölgəsində Ulu Öndər
Heydər Əliyevin saysız-hesabsız yadigarı, quruculuq izləri var. Ümummilli Liderinə
sonsuz məhəbbət bəsləyən xalqımız Heydər Əliyev Fondunu mərhəmət və nicat rəmzi
olmaqla yanaşı, Onun ideyalarını yaşadan möhtəşəm irs məbədi kimi qəbul edir. Fond
ictimai həyatın müxtəlif sahələrində fundamental layihələr həyata keçirir, hər
bir vətəndaşın zəruri istək və arzularının gerçəkləşməsinə, problemlərinin
həllinə maddi-mənəvi dəstək verir, öz fəaliyyətində Ümummilli Liderin humanist
ideyalarını rəhbər tutaraq hər bir vətəndaşın müraciətinə həssaslıqla yanaşır,
ölkəmizdə fəaliyyət göstərən digər qeyri-hökumət təşkilatlarına və bütün
strukturlara nümunə olur. Cəmiyyətin sosial qayğılarına daim diqqət yetirən
Heydər Əliyev Fondunun xətti ilə indiyədək minlərlə insan müayinə olunub,
müalicə kursu keçib, minlərlə xəstə respublikanın müxtəlif tibb müəssisələrində
cərrahiyyə əməliyyatı olunub, yüzlərlə xəstənin əməliyyat və müayinəsi xarici
ölkələrdə aparılıb. Heydər
Əliyev Fondu 2004-cü ildən "Diabetli uşaqlara ən yüksək qayğı” layihəsi
çərçivəsində bu xəstəliyə düçar olmuş 14 yaşınadək uşaqları müntəzəm olaraq insulin
preparatları və şpris-qələmlərlə təmin edir. Artıq istifadəyə verilən
Talassemiya Mərkəzi ölkədə qan xəstəliklərinin müalicə və profilaktikasında
əhəmiyyətli irəliləyişə təkan verəcək. Bu mərkəz ən müasir avadanlıqla
təchiz edilib. Heydər Əliyev Fondu tibb ocaqlarının, uşaq müalicə-profilaktika
müəssisələrinin yenidən qurulmasında, müasir avadanlıqla təchizatında iştirak
edir. "Fresenius Medical Care”, "Karl-Storz”, "Servier” kimi nüfuzlu şirkətlər
tərəfindən Fonda bağışlanmış hemodializ və endoskopik aparatlar və dərman
preparatları ölkənin müvafiq tibb müəssisələrində istifadə olunur. Fond hər il Yeni il və Novruz
bayramlarında uşaq evləri və internat məktəbləri, şəhid, məcburi köçkün
ailələrindən olan uşaqlar üçün möhtəşəm bayram şənlikləri, xüsusi tədbirlər
təşkil edir. Bütün işlər birbaşa Fondun prezidenti Mehriban xanım Əliyevanın
nəzarəti ilə həyata keçirilir. Təhsil
sisteminin inkişaf etdirilməsi məqsədilə Heydər Əliyev Fondu "Uşaq evləri
və internat məktəblərinin inkişafı" proqramını, "Yeniləşən
Azərbaycana yeni məktəb" və "Təhsilə dəstək" layihələrini həyata
keçirir. 2005–2014-cü illər ərzində "Uşaq evləri və
internat məktəblərinin inkişafı" proqramı çərçivəsində respublika üzrə
uşaq müəssisələri əsaslı şəkildə təmir edilmişdir. "Yeniləşən Azərbaycana
yeni məktəb" proqramı çərçivəsində ölkənin müxtəlif bölgələrində 100
mindən çox şagirdin təhsil aldığı yüzlərlə məktəb binası inşa olunmuş və
yenidən qurulmuş, "Təhsilə dəstək" layihəsi çərçivəsində isə
respublika üzrə uşaq bağçaları əsaslı təmir olunaraq müasir avadanlıqla təchiz
edilmişdir. Ölkə Prezidentinin və Birinci vitse-prezidentin
respublikamızda təhsil sahəsinə göstərdikləri qayğı Qazaxda da yüksək səviyyədə
hiss olunur. Rayonda dövlət tərəfindən təhsil sahəsinə olan qayğının əyani
göstəricisi "Azərbaycan Respublikası regionlarının 2019–2023-cü illərdə
sosial-iqtisadi inkişafı Dövlət Proqramı”nın həyata keçirilməsi üzrə
hazırlanmış tədbirlər planına Qazax rayonu üzrə 11 məktəb binasının əsaslı
təmirinin və ya tikintisinin salınmasıdır. Heydər Əliyev Fondu tərəfindən
reallaşan "Yeniləşən Azərbaycana yeni məktəb” layihəsi çərçivəsində Qazaxda da yeni məktəb
binaları inşa olunur. Heydər Əliyev Fondu tərəfindən Xalq yazıçısı İsmayıl
Şıxlının adını daşıyan 1176 şagird yerlik Kosalar kənd tam orta məktəbin əsaslı
şəkildə yenidən qurularaq müəllim və şagirdlərin istifadəsinə verilməsi, Təhsil
Nazirliyi tərəfindən Aydın Məmmədov adına Qaymaqlı kənd tam orta məktəb üçün
180 şagird yerlik yeni binanın inşa olunması, ölkə başçısı tərəfindən Mehdi Hüseyn
adına humanitar və təbiət fənləri üzrə məktəb-lisey binasının sökülərək yenidən
tikilməsi haqqında imzalanan 4 avqust 2020-ci il tarixli Sərəncama əsasən bu
gün yeni məktəbin inşa olunması dövlətin Qazaxda təhsil sahəsinə olan yüksək
diqqət və qayğısıdır. Dövlət Proqramında tikintisi nəzərdə tutulan
məktəblərdən biri də Qazax rayon Şahnabad Nəsibova adına Sarıvəlli kənd tam
orta məktəbi idi. Məktəbin əvvəlki binası 1966-cı ildə inşa edildiyindən fiziki
köhnəlmiş və istifadəyə yararsız vəziyyətə düşmüşdü. "Yeniləşən Azərbaycana
yeni məktəb” layihəsiçərçivəsində Heydər Əliyev Fondunun təşəbbüsü ilə həmin məktəb üçün 220 şagird
yerlik yeni bina inşa olunub. Yanvarın 17-də Heydər Əliyev Fondunun təşəbbüsü
ilə tikilən yeni məktəb binasının açılışı olub. Azərbaycanın multikultural dövlət kimi, müasir dövlət
kimi dünyada tanıdılmasında Heydər Əliyev Fondunun müstəsna xidmətləri vardır.
Məhz Fondun fəaliyyəti nəticəsində Azərbaycan daha çox tanınır və məhz bu amil
bizə İkinci Qarabağ müharibəsi dövründə kömək göstərdi. Uzun illər ərzində
Heydər Əliyev Fondunun müxtəlif ölkələrdə fəaliyyəti və Azərbaycanın müasir,
mütərəqqi dövlət kimi tanıdılması bu təbliğatı alt-üst etmişdir. Bu gün Heydər
Əliyev Fondu qarşısında yeni vəzifələr dayanır. Ənənəvi fəaliyyətlə yanaşı, bu
gün Fond azad edilmiş torpaqlarda geniş fəaliyyətə başlamışdır. Fondun
təşəbbüsü ilə azad edilmiş torpaqlarda hazırda dini abidələrimizin əsaslı
təmiri, bərpa edilməsi və inşası prosesinə start verilib. Şuşa şəhərində Yuxarı
Gövhərağa, Aşağı Gövhərağa, Saatlı məscidləri, Ağdam şəhər məscidi Heydər
Əliyev Fondu tərəfindən əsaslı bərpa edilir, Zəngilan şəhər məscidi də
həmçinin. Eyni zamanda, Daşaltıda, Hadrutda və Şuşa şəhərində yeni məscidlərin
tikintisi də məhz Heydər Əliyev Fondunun təşəbbüsü ilə həyata keçirilir.
Məcburi köçkünlər üçün yeni evlərin yaradılması da Heydər Əliyev Fondunun
təşəbbüsü ilə geniş vüsət almışdır. Müharibədən sonra yaradılmış Qarabağ Dirçəliş Fondu və
"YAŞAT” Fondu Azərbaycanda xeyriyyəçilik ənənələrin inkişafına xidmət edir.
Xeyriyyəçilik ənənələri davam edir və cəmiyyətdə çox yüksək qiymətləndirilir.
Azərbaycan vətəndaşları, eyni zamanda, şirkətlər könüllü olaraq həm Qarabağ
Dirçəliş Fonduna, həm "YAŞAT” Fonduna vəsait təqdim edirlər və bu vəsait
hesabına bu gün yüzlərlə qazi həm Azərbaycanda, həm də xaricdə müalicə alır, həyata qayıdır, öz sağlamlığını
bərpa edir. Ceyhunə HÜSEYNOVA, Qazax
Rayon Heydər Əliyev Mərkəzinin direktoru
Facebook-da paylaş