Qazaxda “Heydər Əliyev və Azərbaycan qadın siyasəti” mövzusunda videokonfrans keçirilib
Müasir dövrdə qadınların cəmiyyətin bütün
sferalarında fəal təmsilçiliyi, gender bərabərliyi dünya dövlətləri üçün aktual
məsələdir. Azərbaycan dövlətinin də bu istiqamətdə atdığı addımlar və əldə
etdiyi nailiyyətlər danılmazdır. Əsası ulu öndər Heydər Əliyev tərəfindən
qoyulmuş Azərbaycan qadın siyasəti cənab Prezident İlham Əliyev və Azərbaycan
Respublikasının Birinci vitse-prezidenti Mehriban xanım Əliyeva tərəfindən
uğurla davam etdirilir. Mehriban xanım Əliyevanın dövlət qadın siyasətinin
inkişafı istiqamətində çoxşaxəli və səmərəli fəaliyyəti həm ölkəmizdə, həm də
dünyada böyük rəğbətlə qarşılanır.
Bu gün bu fikirlər Qazax Rayon Heydər Əliyev Mərkəzinin,
Qazax Rayon İcra Hakimiyyətinin, Yeni Azərbaycan Partiyası (YAP) Qazax Rayon Təşkilatı
Qadınlar Şurasının və Azərbaycan Respublikası Milli Məclisinin deputatı Səməd
Seyidovun köməkçisi Akif Əmirovun birgə təşkilatçılığı ilə "Heydər Əliyev və Azərbaycan
qadın siyasəti” mövzusunda keçirilən videokonfransda səslənib. Videokonfransda Azərbaycan Respublikası Milli Məclisinin
deputatı Ülviyyə Ağayeva, Azərbaycan Respublikası Gənclər Təşkilatları Milli
Şurasının sədri Məryəm Məcidova, Qazax Rayon İcra Hakimiyyəti başçısı aparatında İctimai-siyasi və humanitar məsələlər
şöbəsinin baş məsləhətçisi Gülnar Quluyeva, YAP Qazax Rayon Təşkilatı
Qadınlar Şurasının sədri Yeganə Göyüşlü, Ağstafa Regional Mədəniyyət İdarəsinin
məsləhətçisi Pəri Məmmədova, Qazax Dövlət Sosial-İqtisadi Kollecinin Qiymətləndirmə
və Monitorinq Şöbəsinin müdiri, Tələbə Gənclər Təşkilatının (TGT) sədri Elvira
Əfəndiyeva, rayonda fəaliyyət göstərən mədəniyyət müəssisələrinin müdirləri və əməkdaşları
iştirak ediblər.
Azərbaycan Respublikası Milli Məclisinin deputatı
Səməd Seyidovun köməkçisi Akif Əmirov videokonfransı giriş sözü ilə açaraq
iştirak edən qonaqları və mədəniyyət işçilərini salamlayıb, videokonfransın məqsəd
və əhəmiyyətindən danışıb. A.Əmirov qeyd edib ki, Ümummilli Lider qadınlarla
bağlı məsələlərə böyük diqqət yetirirdi. O, qadınların problemlərini dövlət səviyyəsində
həll etmək məqsədilə xüsusi fərmanla Azərbaycanda "Qadın problemləri üzrə Dövlət
Komitəsi”ni yaratdı, Komitə yarandıqdan sonra Azərbaycan Respublikasının Qadın
Problemləri üzrə Milli Fəaliyyət Planı tərtib edildi.
Azərbaycan Respublikası Milli Məclisinin deputatı
Ülviyyə Ağayeva çıxış edərək bildirib ki, müasir dövrdə qadınların cəmiyyətdə fəal
təmsil edilməsi, gender bərabərliyi kimi məsələlər bütün bəşəriyyət üçün
aktuallıq kəsb edir. Azərbaycan dövlətinin də bu istiqamətdə atdığı addımlar və
əldə etdiyi nailiyyətlər danılmazdır. Azərbaycanda qadın siyasətinin əsası ulu
öndər Heydər Əliyev tərəfindən qoyulmuşdur. Heydər Əliyev xalqın tələbi ilə ikinci
dəfə hakimiyyətə gəldikdən sonra qadın siyasəti geniş vüsət almış, qadınların
ictimai-siyasi həyata transformasiyası, onların dövlət idarəçiliyində təmsilçiliyi,
bütün sahələrdə kişilərlə bərabər hüquqa malik olması yeni qurulmuş müstəqil Azərbaycan
dövlətinin prioritet istiqamətlərindən biri olmuşdur.
Azərbaycan Respublikası Gənclər Təşkilatları Milli
Şurasının sədri Məryəm Məcidova çıxış edərək dünyada olduğu kimi, ölkəmizdə də
qadın problemlərinin, qadına qarşı zorakılıq və şiddət hallarının mövcud
olmasından danışıb. O, bildirib ki, Azərbaycanda qadınların hüquqları dövlət səviyyəsində
qorunur və qadına qarşı zorakılıq halları hüquqi müstəvidə tənzimlənir.
Qazax Rayon İcra Hakimiyyəti başçısı aparatında İctimai-siyasi və humanitar məsələlər
şöbəsinin baş məsləhətçisi Gülnar Quluyeva çıxışı zamanı qeyd
edib ki, dahi şəxsiyyət Heydər Əliyev Azərbaycanda hakimiyyətinin ilk dönəmlərindən
qadınlarla bağlı məsələləri daim önə çəkmiş, qadınları yüksək vəzifələrə təyin
etmişdir. Bir çox rayonlara rəhbərliyi qadınlara tapşırmış, nazir müavinləri vəzifəsinə
neçə-neçə qadını təyin etmişdir. Əsası Ulu Öndər tərəfindən qoyulan qadın siyasəti
bu gün Heydər Əliyev kursunun layiqli yetirməsi ölkə Prezidenti İlham Əliyev tərəfindən
də çox uğurla davam etdirilir. İlham Əliyev ölkənin ictimai-siyasi həyatında fərqlənən
qadınların fəaliyyətini yüksək mükafat və fəxri adlarla qiymətləndirir.
Qazax Rayon Heydər Əliyev Mərkəzinin direktoru
Ceyhunə Hüseynova çıxış edərək bildirib ki, ümummilli lider Heydər Əliyevin
siyasi kursunun davamçısı olaraq ölkə rəhbəri İlham Əliyev tərəfindən aparılan
islahatlar nəticəsində hazırda Azərbaycan Respublikasının Birinci vitse-prezidenti
və Milli Məclisin sədri vəzifələri də xanımlara etibar edilib. Azərbaycan
Respublikasının Birinci vitse-prezidenti Mehriban Əliyevanın dövlət qadın siyasətinin
inkişafı istiqamətində çoxşaxəli və səmərəli fəaliyyəti bütün dünya üçün parlaq
nümunədir. Azərbaycan qadınının ümumiləşdirilmiş siması olan Mehriban xanım
Əliyeva dünya miqyasında Azərbaycan qadınının simvoluna çevrilib. YAP Qazax Rayon
Təşkilatı Qadınlar Şurasının sədri Yeganə Göyüşlü qeyd edib ki, Mehriban xanım
Əliyevanın fəaliyyətindən danışarkən onun rəhbərlik etdiyi Heydər Əliyev
Fondunun ölkəmizə verdiyi töhfələrə diqqət yetirmək lazımdır. Heydər Əliyev
Fondu Ulu Öndərin ideyalarını böyük əzm və sədaqətlə həyata keçirir. Mehriban
xanım həm də Azərbaycanda xeyriyyəçilik institutunun yenidən bərpa edilməsində
də böyük işlər görmüşdür. Onun rəhbərliyi ilə "Yeniləşən Azərbaycana yeni məktəb”,
"Təhsilə dəstək” layihələri ilə ölkəmizin təhsilinə böyük töhfələr verilir. Ağstafa Regional Mədəniyyət İdarəsinin məsləhətçisi
Pəri Məmmədova, Qazax Dövlət Sosial-İqtisadi Kollecinin Qiymətləndirmə və
Monitorinq Şöbəsinin müdiri, TGT-nın sədri Elvira Əfəndiyeva, Qazax Tarix
Diyarşünaslıq Muzeyinin direktoru Gülnaz Alişanova, Qazax Dövlət Rəsm Qalereyasının
müdiri Münəvvər Xəlilova Azərbaycanda əsası Ulu Öndər tərəfindən qoyulan qadın
siyasətinin bu gün ölkəmizdə çox uğurla davam etdirilməsindən və qadınların cəmiyyətin
bütün sahələrində kişilərlə çiyin-çiyinə mübarizə aparmasından, müstəqillik
uğrunda başlamış ümumxalq hərəkatında ön sıralarda olmalarından və Azərbaycanın
ərazi bütövlüyü uğrunda fədakarlıq rəmzinə çevrilmələrindən danışıblar. GOYEZEN.AZ
Facebook-da paylaş