Qazaxda Vətən müharibəsi şəhidi həkim tibb xidməti leytenantı Adil Əfəndiyevin xatirəsini əbədiləşdirən bulaq inşa olunacaq
2020-ci
ilin 27 sentyabrı Azərbaycan xalqının yaddaşına bizi böyük Qələbəyə, Zəfərə
aparan yolun başlanğıc tarixi kimi yazıldı. Qarabağ adlı haqq savaşımıza məhz o
gündən başladıq və 44 gün davam edən Vətən müharibəsində şanlı Azərbaycan
Ordusu Silahlı Qüvvələrin Ali Baş Komandanı İlham Əliyevin rəhbərliyi altında
Qələbə qazandı. 30 ilə yaxın işğal altında qalan torpaqlarımız müzəffər
ordumuzun, əsgər və zabitlərimizin şücaəti, qəhrəmanlığı sayəsində azad edildi.
10 noyabr tarixi yaddaşlara Zəfər Günü kimi yazıldı. Bu gün hər birimiz fəxarətlə
söylədiyimiz, qürurlandığımız o tarixi Qələbəni bizlərə bəxş edən Ali Baş
Komandana, şəhidlərimizə, qazilərimizə, hərbçilərimizə borclu və minnətdarıq.
İllər ötsə belə bizlərə 44 günlük haqq savaşında hər gün qələbə sevinci yaşadan
şanlı Azərbaycan Ordusunun əsgər və zabitləri, hərbçiləri, sağlamlığını itirən
qazilərimiz, ruhları qarşısında bir ömür boyu baş əydiyimiz şəhidlərimiz heç
vaxt unudulmayacaq. Vətən
müharibəsində Şəhidlik zirvəsinə ucalan qəhrəman oğullarımızdan biri də şəhid
həkim tibb xidməti leytenantı Əfəndiyev Adil Qədir oğludur. Bütün şəhidlərimiz kimi həkim şəhidimizin də xatirəsi əbədiləşdiriləcək.
Şəhərin mərkəzində Rayon Mərkəzi Xəstəxanasının qarşısında igid Vətən oğlunun
xatirəsini əbədiləşdirən bulaq inşa olunacaq. İyunun 11-də Qazax Rayon İcra Hakimiyyətinin başçısı Rəcəb Babaşov icra aparatının məsul şəxsləri və şəhidin atası Qədir
Əfəndiyevlə birlikdə bulağın inşa olunacağı ərazidə olub, yerində
baxış keçirib.
İgid Vətən oğlunun əziz xatirəsini dərin ehtiramla yad edən icra
başçısı Adil kimi qəhrəman, cəsur oğullarımızın daim qəlblərdə
yaşayacaqlarını söyləyib. Azərbaycan xalqının qüruru, fəxri olan bütün
şəhidlərimizin, o cümlədən də Adilin xatirəsinin daim əziz tutulacağını
bildirib. Şəhərin mərkəzində şəhid həkimimizin adını daşıyacaq bulağın suyundan içən hər kəsin şəhidin
ruhuna dua oxumaqla bərabər həm də onun haqqında məlumat əldə edəcəyini
bildirib. Tikiləcək bulağın Adilin
xatirəsini əbədiləşdirməklə yanaşı, gələcək nəsillərin vətənpərvər ruhda
böyüməsi istiqamətində atılan uğurlu addım kimi qiymətləndirib. Şəhid atası Qədir Əfəndiyev şəhid ailəsi kimi hər zaman onlara
göstərilən diqqət və qayğıya görə razılığını ifadə edib və buna görə Prezident,
Ali Baş Komandan İlham Əliyevə minnətdarlığını bildirib. Övladı Adil və onun
kimi igid Vətən oğulları ilə hər zaman fəxr edəcəyini, qürur duyacağını
söyləyib. Bulağın tikilməsində əsas məqsədin Adil və onun kimi qəhrəman oğullarımızın
adını yaşatmaq, gələcək nəsillərə ötürmək olduğunu qeyd edib. Tibb
xidməti leytenantı Əfəndiyev Adil Qədir oğlu
Şəhid Adil Əfəndiyev 12 avqust 1995-ci ildə Qazax şəhərində anadan
olmuşdur. 2001-ci ildə Qazax şəhər Mehdi Hüseyn adına
humanitar və təbiət fənləri üzrə məktəb-liseyin 1-ci sinfinə daxil olmuş, 2012-ci ildə həmin məktəb-liseyin 11-ci sinfini
bitirmişdir. 2012-ci ildə Azərbaycan Tibb Universitetinə daxil olmuşdur.
2018-ci ildə Azərbaycan Tibb Universitetinin Hərbi Tibb fakültəsinin "Hərbi
həkim işi” ixtisasını bitirmişdir. Təyinatla Naxçıvan Muxtar Respublikasının
Culfa rayonunda həkim kimi hərbi xidmətə başlamışdır. "N” saylı hərbi hissənin
qərargah və təchizat bölüyünün tibb məntəqəsinin rəisi, tibb xidməti leytenantı
Adil Əfəndiyev 22.10.2020-ci il tarixdə Füzuli-Cəbrayıl-Xocavənd
rayonları istiqamətində gedən döyüşlərdə qəhrəmancasına şəhid olmuşdur. Qəhrəman şəhidimiz 25.10.2020-ci ildə Qazax şəhər qəbiristanlığında izdihamla dəfn
edilmişdir. Subay idi. 25 yaşında Şəhidlik zirvəsinə yüksələn tibb xidməti leytenantı Adil Əfəndiyevin döyüş
meydanında göstərdiyi igidlik ölkə Prezidenti tərəfindən də yüksək
qiymətləndirildi. O, ölümündən sonra cənab Prezident İlham Əliyevin 15 dekabr 2020-ci
il tarixli Sərəncamına əsasən "Vətən uğrunda” və 29
dekabr 2020-ci il tarixli Sərəncamına əsasən "Şuşanın
azad olunmasına görə”, 30 dekabr 2020-ci il tarixli
Sərəncamına əsasən "Hərbi
xidmətlərə görə” medalları ilə
təltif olunmuşdur. 44 günlük Vətən müharibəsində Azərbaycanın hərb
tarixinə böyük Qələbəni, Zəfəri qızıl hərflərlə yazdıran igid Vətən oğullarının
xatirələrini əziz tutmaq hər birimizin ən ümdə işidir. Vətən uğrunda canından
keçən bütün şəhidlərimizin, o cümlədən Adil Əfəndiyevin əziz xatirəsini dərin ehtiramla yad edir, ruhu
qarşısında baş əyirik. Ruhu şad, məkanı cənnət olan Şəhidim!.
GOYEZEN.AZ
Facebook-da paylaş