Vətən Sizə oğul dedi... - YENİLƏNİB
Şəhidlərimizi tanıyaq
və tanıdaq--------------------------- Azərbaycan xalqı bu gün də şanlı
Ordumuzun qazandığı tarixi Qələbəni böyük qürur hissi ilə söyləyir və həmin qələbə
ilə fəxr edir. Hər kəs müzəffər Ali Baş Komandan İlham Əliyevin rəhbərliyi ilə
Azərbaycan Ordusunun sentyabrın 27-də Qarabağda başladığı uğurlu əks-həmlə əməliyyatı
nəticəsində 44 gündən sonra Azərbaycanın böyük tarixi Zəfərə, Qələbəyə imza
atmasının şahidi oldu. Dövlət və xalq olaraq Qarabağ adlı haqq savaşına çıxdıq
və bu yolda haqq-ədalət Ali Baş Komandan İlham Əliyevin
yorulmaz, məntiqli, cəsarətli, uzaqgörən və dəyanətli iradəsi nəticəsində bərpa
olundu. Şanlı Azərbaycan Ordusunun gücünü,
qüdrətini görən Ermənistan məğlubiyyət sənədinə imza atmağa məcbur qaldı. Düşmənin
ağır məğlubiyyəti rayon və şəhərlərimizin azad olunması, Azərbaycanın ərazi
bütövlüyünün bərpası ilə nəticələndi. Bu gün hər birimiz fəxarətlə söylədiyimiz, qürurlandığımız
o tarixi Qələbəni bizlərə bəxş edən Ali Baş Komandana, şəhidlərimizə,
hərbçilərimizə borclu və minnətdarıq. İllər ötsə belə bizlərə 44 günlük haqq
savaşında hər gün qələbə sevinci yaşadan şanlı Azərbaycan Ordusunun əsgər və
zabitləri, hərbçiləri, ruhları qarşısında bir ömür boyu baş əydiyimiz
şəhidlərimiz heç vaxt unudulmayacaq. Azərbaycanın İkinci Qarabağ müharibəsində
qəhrəmancasına şəhid olan igid Vətən oğullarından biri də gizir Abdullayev Sərxan Elxan oğludur. O,
2 noyabr 1988-ci ildə Qazax rayonunda anadan olmuşdur. 1995-ci ildə Qazax şəhər Mehdi Hüseyn
adına humanitar və təbiət fənləri üzrə məktəb-liseyin I sinfinə daxil olmuş, 2006-cı ildə həmin
məktəbin XI sinfini bitirmişdir. 2006-cı ildə Səfərbərlik və Hərbi Xidmətə Çağırış üzrə Dövlət Xidmətinin
Qazax Rayon Şöbəsi tərəfindən həqiqi hərbi xidmətə çağırılmışdır.
2008-ci ildə hərbi xidməti başa vurduqdan sonra Daxili Qoşunlarda gizir rütbəsində xidmətə başlamışdır. 28.09.2020-ci
il tarixdə Göygöl rayonu istiqamətində gedən döyüşlərdə şəhid olmuşdur. Sərxan
Abdullayev 28.09.2020-ci ildə Qazax rayonunun Ağköynək kənd qəbiristanlığında
izdihamla dəfn edilmişdir. Evli olan şəhid gizirimizin Orxan və Turan adlı iki
azyaşlı oğul övladı yadigar qalıb. Bütün
şəhidlərimiz kimi gizir Sərxan Abdullayevin də xatirəsi hər zaman əziz tutulur.
Şəhid gizirimizin göstərdiyi igidlik cənab Prezident İlham Əliyev tərəfindən də
yüksək qiymətləndirilmişdir. O, ölümündən sonra ölkə Prezidentinin 15 dekabr 2020-ci il tarixli
Sərəncamına əsasən "Vətən uğrunda”, 29 dekabr 2020-ci il tarixli Sərəncamına əsasən "Kəlbəcərin azad olunmasına
görə” medalları ilə təltif olunmuşdur. Şəhidimizi
yad etmək hər birimizin vəzifə borcudur. Bizlər də şəhidimizin əziz xatirəsini
dərin ehtiramla yad edərək ailəsinə və yaxınlarına başsağlığı verir, səbir diləyirik.
Ruhu qarşısında baş əyirik. Məlumat
üçün qeyd edək ki, şəhidin qardaşı Elman Abullayev də cənab Prezident İlham
Əliyevin 15 dekabr 2020-ci il tarixli Sərəncamına əsasən "Azərbaycan bayrağı” ordeni ilə təltif edilmişdir.
GOYEZEN.AZ
Facebook-da paylaş