Şuşada keçirilən “Xarıbülbül” festivalı bütün dünyaya göstərdi ki, biz artıq Şuşadayıq
Yola saldığımız 2020-ci il müstəqil Azərbaycanın
hərb tarixinə və xalqımızın yaddaşına qızıl hərflərlə yazıldı. Müdrik
Prezidentimiz, Silahlı Qüvvələrin Müzəffər Ali Baş Komandanı İlham Əliyevin rəhbərliyi
ilə rəşadətli Azərbaycan Ordusu 30 illik həsrətə son qoyaraq işğal altında olan
torpaqlarımızı erməni qəsbkarlarından təmizlədi. 44 günlük Vətən müharibəsində
Qarabağ və ətraf ərazilərimiz işğaldan azad edildi. 44 günlük Vətən müharibəsində
rəşadətli Azərbaycan Ordusunun əsgər və zabitləri, hərbçiləri, igid Vətən
oğulları düşmən tapdağında olan torpaqlarımızı işğaldan azad etməklə bütün
dünyaya bir daha sübut etdilər ki, Ali Baş Komandanın da söylədiyi kimi,
"Qarabağ Azərbaycandır!”, "Qarabağ bizimdir!”. 8 noyabr 2020-ci il!
Bu tarix də xalqımız üçün əziz və müqəddəsdir. Bu, o tarixdir ki, həmin gün
Qarabağın göz bəbəyi sayılan Şuşa işğaldan azad olundu. Xalqımızın üzü güldü,
könüllərini fərəh və sevinc hissi bürüdü. Və nə xoşbəxt xalqıq ki, Şuşamızla
bağlı fərəh, qürur, sevinc dolu anları bu gün də yaşayırıq. Necə ki,
Azərbaycanın mədəniyyət paytaxtı Şuşa 12-13 may tarixlərində "Xarıbülbül”
musiqi festivalına ev sahibliyi etdi. Qürur dolu anları izləyib ürəyimiz bir
daha dağa döndü. Bu gün fəxrlə
söyləyə bilərik ki, Prezident İlham Əliyevin tapşırığına uyğun olaraq Heydər
Əliyev Fondunun təşkil etdiyi möhtəşəm "Xarıbülbül” musiqi festivalının
keçirilməsi Qarabağın tarixi simasının, Şuşanın mədəniyyət mərkəzi statusunun
bərpasını təcəssüm etdirdi. Həmin
festivalı izləyən hər bir Azərbaycan vətəndaşı heç şübhəsiz ki, qazandığımız Qələbəyə,
Zəfərə, izlədiyimiz qürur dolu anlara görə Ali Baş Komandana, Azərbaycan
Ordusunun əsgər və zabitlərinə, hərbçilərinə, Vətən uğrunda canından keçən şəhidlərimizə,
sağlamlığını torpaq üçün fəda edən yaralı qazilərimizə minnətdardır. 30 illik fasilədən sonra bu il birinci dəfə keçirilən
"Xarıbülbül” musiqi festivalının şəhidlərimizin əziz xatirəsinə həsr olunması da böyük əhəmiyyətə malikdir və igid Vətən
oğullarına olan hörmət və ehtiramın təcəssümüdür. Eyni zamanda, 44 günlük Vətən
müharibəsində qazanılmış Zəfərin mədəniyyət sahəsində davamıdır. "Biz bu günü bizim
qəhrəman hərbçilərimizə borcluyuq, Azərbaycan xalqına borcluyuq”, - deyən Prezident
İlham Əliyevin çıxışı zamanı bunu bir daha vurğulaması bir vətəndaş olaraq
bizim də üzərimizə böyük bir məsuliyyət qoydu. O məsuliyyət ki, hər zaman
şəhidlərimizi yad etməli, onların xatirəsini daim əziz tutmalıyıq. Ölkə Prezidentinin
də qeyd etdiyi kimi, bu ildən başlayaraq hər il Şuşada "Xarıbülbül” musiqi
festivalı keçiriləcək, eləcə də gələn il Şuşanın 270 illik yubileyi təntənəli
şəkildə qeyd olunacaq. Bu, düşmənlə yanaşı, bütün dünyaya verilən bir mesajdır
ki, Şuşa bundan sonra da özündə ənənələri yaşadacaq. Prezident İlham
Əliyevin də vurğuladığı kimi, Şuşa Azərbaycan xalqının milli sərvətidir. Bu
yaxınlarda Şuşanın Azərbaycanın mədəniyyət paytaxtı elan edilməsi də bunu bir
daha göstərdi. Keçirilən festivalla
bütün dünyaya nümayiş etdirdik ki, ermənilər nə qədər çalışsalar da, Şuşadan
Azərbaycan ruhunu silə bilmədilər. 30 ildən sonra
bərpa edilən festival sözün əsl mənasında milli birlik, qürur, zəfər, ləyaqət
bayramına çevrildi. 2 günlük festival Azərbaycan tarixinə və xalqın yaddaşına
uzun illər arzusunda olduğu, həsrətini çəkdiyi bir bayram kimi yazıldı. Bu gün Azərbaycan
Şuşa şəhərini yenidən bərpa edir, dirçəldir, əvvəlki şöhrətinin qaytarılması
üçün var qüvvəsi ilə çalışır və Şuşa üçün yeni dövr başlayır. Bu dövr milli
qürur, milli ləyaqət və inkişaf, dirçəliş dövrüdür. Hələ illər öncə ölkə Prezidenti İlham Əliyev öz çıxışlarında dəfələrlə
vurğulayırdı ki, bu vəziyyətlə biz
heç vaxt barışmayacağıq, nəyin bahasına olursa-olsun öz doğma torpaqlarımızı
işğalçılardan azad edəcəyik və bunu etdik. Ölkə başçısının da
söylədiyi kimi, bəllidir ki, Ermənistanın rəsmi təbliğatı, xüsusi qurumları
münaqişənin ilk günlərindən etibarən Azərbaycanda müxtəlif dini, etnik,
linqvistik icmalar arasında təfriqə yaratmaq, Azərbaycan dövlətçiliyini
zəiflətmək, parçalamaq üçün davamlı iş aparmış, bu məqsədlə mərkəzlər,
təşkilatlar, KİV-lər qurulmuş, milyonlarla vəsait xərclənmişdir. Bu işdə
xaricdəki erməni lobbisi, onların havadarları da kifayət qədər fəaliyyət
göstərmişlər. 2020-ci ilin 27
sentyabrında başlayıb 10 noyabrında böyük tarixi Qələbə ilə başa çatan haqq
savaşımız bütün dünyaya sübut etdi ki, Ermənistanın illərdir ki, xəyal etdiyi
Dağlıq Qarabağ adlı ikinci bir qondarma dövlət heç vaxt qurula bilməzdi və
bilmədi də. Biz bu qalibiyyətimizə 44 gün ərzində torpaqlarımızın işğaldan azad
olunması üçün bütün etnik və dini icmaların nümayəndələrinin vahid amal, vahid
bayraq altında birləşərək çiyin-çiyinə döyüşməsi nəticəsində nail olduq. Əldə
etdiyimiz tarixi Zəfərlə bu təbliğatın, bu fəaliyyətin öz hədəfinə çatmadığını,
mənasızlığını ortaya qoyduq. Eyni zamanda, Azərbaycanda əsrlərlə mövcud olmuş
tolerant mühitin, multikulturalizm ənənələrinin qorunmasına Prezident İlham
Əliyevin hakimiyyəti illərində bu qədər diqqət ayrılmasının da nə qədər düzgün
siyasət olmasını sübut etdik. Bu gün tam
əminliklə deyə bilərik ki, Vətən müharibəsindəki Qələbədə bütün icmaların payı,
töhfəsi vardır. Ölkə Prezidentinin tövsiyəsi ilə
keçirilən builki "Xarıbülbül” festivalı həm də Azərbaycan multikulturalizm
ənənələrinin simvoluna çevrildi. Dövlətimizin
başçısının da qeyd etdiyi kimi, Vətən müharibəsi bir daha onu göstərdi
ki, Azərbaycanda bütün xalqlar dostluq, qardaşlıq, həmrəylik şəraitində
yaşayır, ölkəmizdə milli birlik, milli həmrəylik vardır. Builki "Xarıbülbül”
festivalında bu, bütün dünyaya Şuşadan, qədim torpağımızdan verilən mesaj idi. Prezident İlham Əliyevin dediyi kimi, ölkələr
belə inkişaf etməlidir, ancaq çoxkonfessiyalı, çoxmillətli ölkələrdə,
cəmiyyətlərdə inkişaf olur, birlik olur, milli həmrəylik olur, sülh olur. Necə
ki, Azərbaycan bunu illərdir bütün dünyaya nümayiş etdirir. İkinci Qarabağ
müharibəsi düşmənin, eləcə də onun havadarlarının sinəsinə elə bir dağ çəkdi
ki, illər ötsə belə nə tarix, nə də onlar bu məğlubiyyəti heç vaxt unutmayacaq.
Azərbaycan xalqı isə bu gün fəxrlə söyləyir ki, 44 günlük müharibə bizim şanlı
tariximizdir. 44 günün hər bir günü, xüsusən də alınmaz qala hesab etdiyimiz Şuşanın
azad olunması ayrıca bir qəhrəmanlıq dastanıdır. Və illər ötəcək, həmin
qəhrəmanlıq dastanı dillər əzbəri olacaq, gələcək nəsillərə ötürüləcək.
"Xarıbülbül”
festivalında gənc muğam ifaçısı tərəfindən "Bayatı Şiraz” muğamı üstündə Abbas
Səhhətin "Vətən” şeirinin ifa olunması bir daha onu göstərdi ki, Vətənin hər
parçası, daşı, qayası, hər qarışı bizim üçün əzizdir, doğmadır. Hər şeydən pay
vermək olar, bir tək Vətəndən pay vermək olmaz. Heç şübhəsiz ki, muğam üstündə
"Vətən” şeirinin ifa edilməsi təsadüfi deyil. Hər kəs yaxşı bilir ki, bu parça
illər əvvəl "Qarabağ bülbülləri” ansamblı tərəfindən hazırlanaraq ifa edilmiş,
filmlərimizdə, tədbirlərdə dəfələrlə səsləndirilmiş və işğal illərində
azərbaycanlılar üçün xüsusi rəmzi əhəmiyyətə malik olmuşdur. Və illər ötsə belə
biz öz milli-mənəvi dəyərlərimizi, adət-ənənələrimizi unutmadıq, unutdurmadıq.
Necə ki, Şuşa bunu niskilli qəlbində illər boyu yaşatdı və festival günü şuşasevərlərə
təqdim etdi. Həmin ifa Şuşaya Azərbaycan ruhunun, Azərbaycan mədəniyyətinin
böyük qaydışının prelüdü də sayıla bilər. Prezident İlham Əliyevin də bildirdiyi kimi, festival günü Azərbaycan mədəniyyəti, Azərbaycan mədəniyyətinin
görkəmli nümayəndələri Şuşaya qayıtdılar və bu qayıdış reallıqdır, bu reallıqla
hər kəs hesablaşmalıdır. 2 günlük festivalla
bütün dünya bildi və agah oldu ki, bundan sonra azərbaycanlılar Şuşada əbədi
yaşayacaqlar. Festivalın
yaddaqalan məqamlarından, tarixi anlarından biri isə 11 ayın sultanı olan
müqəddəs Ramazan bayramında təşkil olunması idi. Çünki bu qayıdışın digər bir
simvolik başlanğıcı da məhz Ramazan bayramı ilə bağlı Yuxarı Gövhərağa
məscidində bayram namazının qılınması oldu. Nə xoş bizlərə ki, indi Şuşanın
Yuxarı Gövhərağa məscidində, işğaldan azad olunmuş digər ərazilərimizdə azan
səsləri ucalır. Artıq məscidlərdə bayram namazı qılınır. Festivalın məhz
Ramazan bayramı ərəfəsində təşkil edilməsi də böyük əhəmiyyət kəsb edir. Çünki Şuşa Pənahəli xanın dövründən dini
dəyərlərə xüsusi diqqət yetirilən məkan kimi tanınıb. Azərbaycanlıların etnik
təmizlənməsi həmişə tarixi-dini abidələrimizə qarşı vandalizm aktları ilə
müşayiət olunub. İslamın Azərbaycan xalqının milli konsolidasiyasında, milli
mədəniyyətinin qorunmasında müstəsna yeri var. Prezident İlham
Əliyevin çıxışı zamanı söylədiyi kimi, biz öz dini, milli, mənəvi köklərimizə
bağlı olan xalqıq. Əks-təqdirdə, biz heç vaxt işğala son qoya bilməzdik. Hələ beş il bundan
əvvəl Cocuq Mərcanlı işğaldan azad olunandan sonra orada ölkə Prezidentinin göstərişi
ilə Şuşa məscidinin bənzəri olan məscid inşa edilmişdi və həmin məscidin
açılışındakı çıxışında dövlətimizin başçısı demişdi ki, gün gələcək biz Şuşada
məscidləri bərpa edəcəyik və yeni məscidlər tikiləcəkdir. Və budur həmin gün
gəlib yetişdi. 30 illik həsrətdən sonra bütün arzular, xəyallar gerçək oldu.
İndi nəinki Şuşa, eləcə də işğaldan azad olunmuş bütün rayonlarımızda
milli-mənəvi dəyərlərimizi özündə əks etdirən tarixi abidələrimiz,
məscidlərimiz, mədəniyyət obyektlərimiz bərpa edilir. Bizim olan nə varsa,
əvvəlki vəziyyətinə qaytarılır. Ramazan bayramı ərəfəsində Şuşada yeni möhtəşəm
məscidin təməlinin qoyulması da bu istiqamətdə atılan addımlardan biridir.
İllər sonra ermənilər tərəfindən qurudulmuş "Xan qızı Natəvan” bulağından artıq
su gəldi. Bütün bunlar böyük rəmzi məna daşıyır. Düşmən isə hələ də dərk etmir
ki, bax, bizim qayıdışımız budur. Ən əsası da bu gün Azərbaycan xalqı işğaldan
azad olunmuş torpaqlara Yaşasın Şuşa! Yaşasın Qarabağ! Yaşasın Azərbaycan!
söyləyərək ayaq basır, addım atır. Dilimizin ən şirin sözü bu gün Qarabağdır!,
Şuşadır!, Azərbaycandır!. GOYEZEN.AZ
Facebook-da paylaş