Qazaxdan Şuşaya...
Bir neçə aydır ki, Qazaxımdayam. Bir neçə aydır ki,
anam Qazaxımın təmiz havasından, sərin sularından, isti nəfəsindən, doğma ləhcəsindən
doymaq bilmədən Bakı Dövlət Universitetinin Qazax filialında pedaqoji fəaliyyətimi
davam etdirirəm. İndiyə qədər Bakıda yaşasam, işləsəm də ürəyim həmişə
burayla döyünmüş, fikrim, xəyalım bu yerlərdə dolaşmış, gücü, qüvvəti bu yerlərdən
almışam. 30 il bundan öncə Bakıda yaratdığımız Qazax Xeyriyyə Cəmiyyətinin
(indi "Qazax” Xeyriyyə İctimai Birliyi) tərkibində gəlib-getmişəm və əlimdən gələni
etmişəm bu torpağım, elim-obam üçün. Halal xoşu olsun! Deyirlər, qocalanda daha çox çəkir Vətən insanı. Bu
doğrudan da belədir, tale elə gətirdi ki, çəkdi də, gətirdi də Vətən məni özünə.
İndi müəllimliyimlə bərabər onun xeyrində-şərində, gördüyü işlərində, keçirdiyi
tədbirlərində yaxından iştirak etmək imkanım yaranıb. Bu işlər də ki, maşallah,
bir deyil, beş deyil, saymaqla qurtarmaz. Qazaxda hər bir sahədə çox böyük
işgüzarlıq, fəallıq hökm sürməkdədir. Mən bu barədə hələ 5 il bundan qabaq "Qazax”
Xeyriyyə İctimai Birliyinin "Dəli Kür” qəzetində "Qazaxda gördüklərim, eşitdiklərim, düşündüklərim”
adlı məqaləmdə söhbət açmışdım. Onda çox hörmətli Rəcəb müəllim Babaşov 1il idi
ki, Qazax Rayon İcra Hakimiyyətinə başçı təyin olunmuşdu və bu 1 ildə Qazaxda o
qədər işlər görülmüşdü ki, mən öz heyranlığımı və sevincimi gizlədə bilməmişdim. İndi o vaxtdan 5 il keçib, Qazax tamam dəyişib, gözəlləşib.
Onun girişində Azərbaycanın ilk hərbçi pilotu Fərrux Ağa Qayıbovun şərəfinə
ucalan əfsanəvi təyyarədən, Qazaxın rəmzlərindən biri kimi yüksəklikdə şahə
qalxan Dilboz atından tutmuş uzaq dağ kəndlərinə çəkilmiş yollarına, əkilmiş
ağaclarına, salınmış bulaqlarına qədər hər şey göz oxşayır, könül açır. 7-8 il
bundan qabaqkı rəngi solmuş, üzü bozarmış Qazaxdan heç bir əsər-əlamət qalmamışdır. Bu gün də Qazaxda quruculuq, yaradıcılıq işləri
yüksək səviyyədə davam edir, hər gün, hər saat yeni bir xeyirxah işin, əhəmiyyətli
tədbirin şahidi olursan. Bunu son bir neçə ayda rayon icra aparatının rəhbərliyi
ilə mənim də şahidi və iştirakçısı olduğum bir neçə mühüm əhəmiyyətli işlər,
keçirilən tədbirlər söyləməyə əsas verir. 44 günlük Vətən müharibəsi şəhidlərinin
xatirəsinə salınmış "Qarabağ Azərbaycandır!” adlı Abidə Kompleksinin və ətrafında
salınmış parkın açılışı, Qazax şəhərində və bir neçə kənddə şəhid bulaqlarının
inşası və onların açılışı, Qazax Müəllimlər Seminariyasının binasının bərpası
ilə bağlı aparılan təmir işləri, eyni zamanda vaxtilə özünün 17 otaqlı malikanəsini
Seminariyanın istifadəsinə vermiş Kosalar kənd sakini Məşədi İbrahimin evinin bərpası
Qazaxda görülən işlərin bir qismidir. Qazax bu gün həm də mötəbər qonaqların qarşılandığı,
yüksək səviyyəli tədbirlərin keçirilməsinə ev sahibliyi edən bir ünvana
çevrilib desək, heç də yanılmarıq. Birinci Qarabağ müharibəsi şəhidləri, Azərbaycanın
Milli Qəhrəmanı Rafiq Alıcanovun haqqında çəkilmiş filmin təqdimatı, Azərbaycanın
Milli Qəhrəmanı, jurnalist Alı Mustafayevin 70 illiyinə həsr olunmuş ədəbi-bədii
məclis, Xalq şairi Səməd Vurğun və Aşıq Şəmşir dostluğuna həsr olunmuş "Aşıq sənəti
və yazılı ədəbiyyat” mövzusunda keçirilən Beynəlxalq Elmi konfrans, Qazaxda
Novruz bayramı və həmin gün bir qazinin (Elməddin Yusifovun) ailə qurması, icra
başçısının onları xüsusi təbriki, Azərbaycan Respublikasının Baş
Prokurorluğunun mətbuat xidmətinin təşkilatçılığı ilə "Media və hüquqi maarifləndirmə”
mövzusunda Qazax Rayon İcra Hakimiyyətinin binasında keçirilən regional konfrans,
Qazax Heydər Əliyev Mərkəzində Şuşada keçirilmiş Zəfər Qurultayına həsr olunmuş
tədbir, Ramazan bayramı ərəfəsində rayon ictimaiyyətinin bir çox nümayəndələri,
şəhid valideynləri, qazilər üçün "Qazax” şadlıq sarayında iftar süfrəsinin
açılması və burada şəhid analarına, atalarına oğullarının təltif olunduqları
medalların təqdim olunması mənim iştirak etdiyim tədbirlərdir... Qazaxda
keçirilən tədbirlərin sayı-hesabı isə ölçüyə gəlməz... Bu siyahını uzatmaq da
olar, amma nə mənası, görünən dağa nə bələdçi? Bu gün Qazax Rayon İcra Hakimiyyətinin
hər bir sahədə gördüyü işlərdən, şəhid ailələrinə, qazilərimizə xüsusi qayğıdan
hamı ağızdolusu danışır. Bir vacib məsələni xüsusilə vurğulamaq istəyərdim
ki, bu, rayon rəhbərliyinin, onun hörmətli icra başçısı Rəcəb Babaşovun rayon
ziyalıları, ağsaqqalları ilə, o cümlədən "Qazax” Xeyriyyə İctimai Birliyi ilə
çox yaxın olması, onlarla birgə fəaliyyət göstərməsidir. Buna misal olaraq son
dövrlərdə dünyanı başına alan COVID-19 pandemiyası ilə mübarizə zamanı 9 mindən
çox Qazax əhalisinə yardımların paylanılmasını, 44 günlük Vətən müharibəsində
orduya olunan köməyi, şəhidlərimizin qəbulu və onların dəfn mərasimlərinin təşkilini,
yas mərasimlərində iştirakı, onların hər biri haqda qısametrajlı filmlərin çəkilişini,
xatirələrinin əbədiləşməsini, qazilərimizin problemlərinin birlikdə həll
olunmasını, məşhur ziyalılarımızın yubiley tədbirlərinin və yaxud anım günlərinin
keçirilməsini və s. göstərmək olar. Qazax rayonu yeganə rayondur ki, onun icra
başçısı hər il Bakıda "Qazax” Xeyriyyə İctimai Birliyinin hesabat yığıncağında
iştirak edir və özü də rayonda görülən işlər haqqında məlumat verir. Qazaxda bu gün fəxr edilməli, öyünməli yerlərdən
biri də Bakı Dövlət Universitetinin Qazax filialıdır. Burada rayon və filial rəhbərlərinin
birgə səyi nəticəsində nümunəvi təhsil üçün elə bir şərait yaradılmışdır ki,
bu, respublikanın bütövlükdə digər ali məktəblərinə nümunə ola bilər. Filialda
oxumaq, yaxşı qiymət almaq üçün yeganə meyar tələbələrin biliyi, bacarığıdır, başqa
meyarlardan söhbət gedə bilməz, bu da təhsildə şəffaflığın, halallığın əsas şərtlərindən
biridir. Elə buna görə də bu gün BDU-nun Qazax filialında Azərbaycanın 64
rayonundan 1700-ə yaxın tələbə, magistrant təhsil alır və onlar buradakı
münasibətdən, yaradılmış şəraitdən hər zaman, hər yerdə razılıqla danışırlar. Bütün bunlar onu göstərir ki, Qazax rayonunda dövlətimizin,
Prezidentimizin icra strukturları qarşısında qoyduğu vəzifələr, tapşırıqlar layiqincə
yerinə yetirilir. Son 5-6 ildir ki, Qazax rayonu, mən deyərdim öz intibah
dövrünü yaşayır və onun keçmişdən qazandığı maarif, mədəniyyət, ədəbiyyat, incəsənət
beşiyi kimi statusu özünə qaytarılır. Əziz oxucular! İstəyirəm sizlərə bu yaxınlarda rayon
rəhbərliyinin şəxsən mənə göstərdiyi böyük bir yaxşılıqdan da söhbət açım. Deyəcəksiniz,
görəsən, nə yaxşılıqdır bu, nə veriblər müəllimə? Yox, siz düşünənlərdən deyil
bu yaxşılıq!. Keçən ayın əvvəli idi. Rayon İcra Hakimiyyətindən zəng
edib mənə bildirildi ki, rayon rəhbərinin məsləhəti ilə siz gedirsiniz Şuşaya, hazırlaşın.
Sevincimdən bilmədim nə cavab verim, necə təşəkkür edim... Axı, bu neçə ildə
biz nə qədər Şuşa deyib, Qarabağ deyib ağlamışıq, sızlamışıq, bu yolda nə qədər
qurbanlar vermişik. İndi onlar azaddırlar, 30 illik əsarətdən, əsirlikdən, vəhşilikdən igid oğullarımızın, Ali Baş Komandanımızın, xalqımızın
dəmir yumruq kimi birliyi, qəhrəmanlığı nəticəsində onlar azaddırlar. Həm də bu
azadlıq, bu cihad müharibəsində Goranboydan Şuşaya qədər dəhşətli yollar keçmiş
əsgər oğlum Nəsibin də az-çox payı var. O günlərdə bir ata kimi də nələr çəkdiyimi
yəqin başa düşərsiniz. Allah baş tacımız şəhidlərimizə rəhmət eləsin, qazilərimizə
cansağlığı versin. Mayın 12-də Bakıdan, Heydər Əliyev Mərkəzindən Ulu
Öndərimizin adına fondun dəstəyi ilə yol aldıq Şuşaya, "Xarı bülbül” musiqi
festivalının açılışına 200 nəfərdən çox nümayəndə heyəti, əsasən mədəniyyət, incəsənət
işçilərindən və şəhid övladlarından təşkil olunmuşdu. Avtobuslarımız Daşburundan ötüb Füzulinin Əhmədbəyli,
Aşağı, Yuxarı Kürdmahmudlu, Alxanlı kəndlərinə çatanda, yadıma 1994-cü ildən
2006-cı ilə qədər bu yerlərdə bir hərbçi (baş gizir) kimi can qoymuş, şərəflə
xidmət etmiş Səlim qardaşımın bir neçə dəfə arxasınca gəlməyim, onu yağı düşmənlə
üzbəüz səngərlərdə görməyim, bir dəfə də özümün az qala düşmən əlinə keçməyim
düşdü. O vaxtlar bu kəndlər ermənilər tərəfindən bir dəfə alınmış, sonra Milli
Ordumuz tərəfindən geri qaytarılmışdı. Ancaq Füzulinin Şərab zavodundan o yana,
Oqanyan səddi deyilən ərazidən o tərəfə hər şey məhv olmuş, sanki həyat
sönmüşdü və mənim qardaşım bu yerlərdə düz 12 il Vətənə qulluq etmişdir. İndi yəqin
daha yaxşı anladınız ki, nə üçün "Şuşaya gedirəm” xəbərini eşidəndə mənim
sevincimin həddi-hüdudu olmadı... Bu ərazini keçib təzəcə salınmış Zəfər yolu ilə
Şuşaya gedirdik. Pəncərələrdən bizi bir yandan Qarabağın gözoxşayan, könülaçan,
əsrarəngiz təbiəti, başı dumanlı dağları vəcdə gətirirdisə, digər tərəfdən Füzulinin,
Xocavəndin, Daşaltının darmadağın edilmiş, üzərində ot, kol-kos bitmiş yurd
yerləri, evləri, binaları məyus edir, ürəyimizi parçalayırdı... Artıq Şuşaya çatırdıq, avtobuslar möhtəşəm qala
divarlarına yaxınlaşanda hamının gözləri qarşısına Azərbaycan oğullarının bu əlçatmaz,
ünyetməz divarları bir süngübıçaqla necə dırmaşmaları və yağı düşmənin bağrını
dəlib onları cəhənnəmə vasil eləmələri gəldi. Elə bu an yadıma şair dostum
Barat Vüsalın "Şuşanı alan oğullar!” şeiri düşdü, dik durub avtobusun ortasında
bu şeirdən üç bəndi söylədim! Axır gəlib çıxdıq Şuşa vağzalına, oradan bizi
balaca maşınlarla qaldırdılar birbaşa Cıdır düzünə, əfsanəvi Cıdır düzünə, neçə-neçə tarixi hadisələrin şahidi,
neçə-neçə şəxsiyyətlərin, o cümlədən
Molla Pənah Vaqif babamızın ruhları dolandığı Cıdır düzünə. İndi burada geniş
düzənlikdə 30 ildən sonra ikinci dəfə "Xarı bülbül” festivalının keçirilməsi
üçün səhnə qurulmuş, onun qarşısında isə çoxlu sayda oturacaqlar düzülmüşdü. Hava çox tutqun idi, yavaş-yavaş yağış yağmağa
başlayırdı. Hamı keçib səhnə qarşısındakı skamyalarda öz yerini tutdu. Çox keçmədi
ki, Respublika Prezidenti, Müzəffər Ali Baş Komandanımız İlham Əliyev və Birinci
vitse-prezident Mehriban Əliyeva da gəlib birinci sırada əyləşdilər. Aparıcılar hamını salamlayıb festivalı açıq elan
etdilər. Səhnəyə ilk öncə respublikanın Xalq artisti Polad Bülbüloğlu və Bakı
Xareoqrafiya məktəbinin "Xarı bülbül” rəqs kollektivi dəvət olundu. Polad
Bülbüloğlunun ifasında "Qarabağ” mahnısı səsləndi. Sonra bir-birinin ardınca
dünyanın müxtəlif yerlərindən gəlmiş folklor ansamblları, öz aşıqlarımız, müğənnilərimiz
çox maraqlı musiqi töhfələri ilə çıxış etdilər. Bu da maraqlı idi ki, konsertin başlaması ilə
yağışın güclənməsi bir oldu, hava soyudu, üst paltarlarımız islandı, amma bir kəs
yerindən tərpənmədi. Bir neçə dəqiqədən sonra hamıya çətir və selofan geyimlər
verdilər. Prezidentimizlə bərabər bu tarixi konserti sona qədər izlədik, çünki
həmin gün o torpaqda olmaq, oturmaq və rahat nəfəs almaq xoşbəxtliyi hər şeydən
güclü idi. Biz Şuşada idik! Biz Cıdır
düzündə idik! 3 saat davam edən açılış konserti qurtaranda da
yağış hələ yağırdı. Bizi Cıdır düzünə qaldıran maşınlar yuxarı çıxa bilmədilər,
təxminən 3 kilometr yolu piyada düşdük. Elə bu zaman ərzində də yol boyu
Şuşanın boş qalmış, uçurulmuş, dağıdılmış binalarını, sahibsiz evlərini seyr edə
bildik, ürəyimizdən qara qanlar axdı. Bir az aşağıda - geniş meydanda Xan əminin,
Natəvanın, Bülbülün başı bəlalar çəkmiş heykəllərini yenə də öz yerlərində
görüb az da olsa sevindik. Budur, artıq illərin həsrətindən sonra qovuşduğumuz
Şuşamızdan qayıdırıq, amma ayrıla bilmirik. Çünki Şuşanın gəzməli, görməli yerlərini
görməkdən, təmiz, saf havasını ciyərlərimizə çəkməkdən doymamışıq. "Sağlıq
olsun, qismət olar, bir də gəlib görərik” deyib elə bu arzu ilə cənnət Şuşamızdan
ayrılmalı olduq. Yağış dayanmış, Şuşanın üzərinə bir gün doğulmuşdu ki, gəl görəsən.
Uzun müddətli güclü yağışdan sonra günəş öz al şəfəqlərini sərmişdi mədəniyyət
paytaxtımız, Qarabağımızın tacı olan Şuşamızın üzərinə... Deyirlər su aydınlıqdır. Bir yerə gedənin arxasınca
su səpərlər. Şuşada həmin gün yağan yağış və ondan sonrakı günəş də onu göstərirdi
ki, 30 illik qaranlıqdan sonra Şuşa aydınlığa çıxmışdı. Gözün aydın Şuşa! Gözün
aydın Qarabağ! Gözünüz aydın Azərbaycan xalqı! Sonda isə həyatımın ən gözəl, yaddaqalan gününü mənə
bəxş etdiyi üçün Müzəffər Ali Baş Komandan İlham Əliyevə, şanlı Azərbaycan
Ordusunun əsgər və zabitlərinə, hərbçilərinə minnətdarlığımı bildirirəm.
Xalqımıza, o cümlədən də mənə Şuşada olmaq şansını bəxş edən şəhidlərimizə
Allahdan rəhmət diləyir, ruhu qarşısında baş əyirəm, sağlamlığını itirən qazilərimizə
uca Tanrıdan cansağlığı arzu edirəm. Valeh NƏSİBLİ, Bakı Dövlət
Universitetinin Qazax filialının müəllimi, filologiya üzrə
elmlər doktoru
Atillatək qırmancdılar,
Qayalara dırmaşdılar,
Sıldırımdan yol açdılar,
Qardaşım, balam oğullar,
Şuşanı alan oğullar!
Çaxıb şimşəyə döndülər,
Çıxıb çiçəyə döndülər,
Axır Şuşaya döndülər,
Ölməyib... ölən oğullar,
Şuşanı alan oğullar!
Mizan yox, bu Mizan təki,
Ehsan yox, bu Ehsan təki,
Ay özləri Əzan çəkib,
Namazı qılan oğullar,
Şuşanı alan oğullar!..
Facebook-da paylaş