Regionların sosial-iqtisadi inkişafı dövlət proqramlarının uğurlu icrası sayəsində paytaxt Bakı ilə yanaşı, respublikamızın bütün bölgələri gündən-günə abadlaşır. Ölkə Prezidenti İlham Əliyevin qayğısı sayəsində uğurla inkişaf edərək müasir və abad rayonlardan birinə çevrilən Qazax rayonu, rayonda geniş miqyas alan quruculuq işləri söylədiklərimizin bariz nümunəsidir. Özünün intibah dövrünü yaşayan, tərəqqi yolunda uğurla addımlayan Qazaxda elə bir sahə olmaz ki, ötən illər ərzində həmin sahələrdə yeniliyin şahidi olmayasan. Xüsusilə də ölkə başçısının tapşırığına əsasən "Azərsu” ASC tərəfindən Qazax şəhərinin içməli su və tullantı su sistemlərinin yenidən qurulması layihəsinin icrasından sonra küçələrin asfaltlanması, səkilərə yeni tamet, bardür düzülməsi, qaz, elektrik, rabitə xətlərinin səliqəyə salınması, küçələrin işıqlandırılması dediklərimizin bariz nümunəsidir. Şəhərin Heydər Əliyev prospektində, bir neçə küçədə, eləcə də çoxmənzilli yaşayış binalarının həyətinə yeni asfalt örtüyü vurulmuş, abadlıq işləri aparılaraq "Abad məhəllə” kimi sakinlərin istifadəsinə verilib.

Sevindirici haldır ki, rayonda aparılan abadlıq-quruculuq işləri bu il də uğurla davam etdirilir. Rayonda nəqliyyat vasitələrinin hərəkətinin yaxşılaşdırılması, vətəndaşların rahatlığını təmin etmək məqsədilə təqdirəlayiq işlər görülür. Bu günlərdə rayonda daha 4 küçəyə - şəhərin Nəsrəddin Tusi, şəhid Yunis Kazımov (Bakı küçəsindən M.Ə.Rəsulzadə küçəsinin kəsişməsinə kimi), Ağköynək kəndində Çərkəz İsmayılov və Cabir Hüseynov (Mehdi Hüseyn küçəsinin kəsişməsindən magistral yola kimi) küçələrinə yeni asfalt örtüyü döşənib. 

Hazırda isə şəhərin Nəriman Nərimanov yaşayış massivində tikinti-quruculuq işləri həyata keçirilir, yaşıllıqlar salınır. Bu gün şəhərin Nəriman Nərimanov yaşayış massivində yerləşən 1,2,3 və 49 saylı çoxmənzilli yaşayış binalarının qarşısına yaşıllıqlar salınıb.

Görülmüş işləri razılıqla qarşılayan vətəndaşlar ölkəmizdə, eləcə də Qazax rayonunda aparılan abadlıq işlərinə görə ölkə Prezidenti İlham Əliyevə minnətdarlıq edirlər.