ƏƏSM Nazirliyi tabeliyində Dövlət Məşğulluq Agentliyi tərəfindən “Peşələr festivalı” keçiriləcək
Bildiyimiz
kimi, müasir dünyada əmək bazarında vəziyyət sürətlə dəyişir, inkişaf edir, ölkəmiz
də qloballaşan dünyanın tərkib hissəsi kimi əmək bazarının cari tendensiya və
çağırışları ilə üzləşir. Hər
zaman yeniliklərə imza atan Azərbaycan Respublikası Əmək və Əhalinin Sosial
Müdafiəsi Nazirliyinin tabeliyində Dövlət Məşğulluq Agentliyinin əsas fəaliyyət
istiqamətlərindən biri də məhz əmək bazarında mövcud vəziyyəti izləmək, peşə və
ixtisaslar üzrə çağırışlara uyğun təkliflər vermək, vətəndaşlar, xüsusilə
yeniyetmə və gənclər arasında müasir əmək bazarının tələbləri, zəruri peşə və
ixtisaslar barədə maarifləndirmə, təbliğat işləri aparmaqdan ibarətdir. Bu
istiqamətdə həyata keçirilən ardıcıl və sistemli fəaliyyətin davamı olaraq 15
may – 2 iyun 2022-ci il tarixlərində ölkənin 10 iqtisadi rayonu üzrə 10
müxtəlif şəhərdə müasir əmək bazarında aktual olan peşə və ixtisasın tanıtım və
təbliğatı məqsədilə "Peşələr festivalı”nın keçirilməsi nəzərdə tutulub. Bakı,
Şamaxı, Sumqayıt, Lənkəran, Şirvan, Şəki, Mingəçevir, Bərdə, Gəncə, Qazax şəhər
və rayonları üzrə təşkil ediləcək festivalın əsas məqsədi vətəndaşların diqqətini
peşəyönümü məsləhət xidmətinə cəlb etmək, müasir əmək bazarında mövcud olan peşələrin
təbliğatını aparmaqdır. Hər
bir iqtisadi rayonun seçilmiş şəhərinin mərkəzi meydanında təşkil olunacaq
festival zamanı iştirakçılara "Öyrən, Əylən, Peşəni seç!” devizi altında müxtəlif
öyrədici məlumatlar və interaktiv oyunlarla zəngin proqram təqdim ediləcək. Həmçinin,
festivalda iştirak edən yeniyetmə və gənclər müasir əmək bazarının tələbləri ilə
tanış olmaq imkanı qazanacaq, təqdim olunan peşənin tanınmış mütəxəssisləri ilə
görüşəcək, əyani şəkildə müvafiq peşə və ixtisasların incəlikləri ilə tanış olacaq,
öz maraq və istəklərinə uyğun peşə seçimində məsləhət xidmətindən faydalana biləcəklər. İyun
ayının 2-də Qazax Gənclər Mərkəzinin qarşısında keçirilməsi nəzərdə tutulan "Peşələr
festivalı” rayon gəncləri üçün gələcəkdə peşə seçmələrində geniş imkanlar
açacaq. Aprelin
26-da Qazax Rayon İcra Hakimiyyətinin başçısı Rəcəb Babaşov icra
aparatının məsul şəxsləri, Əmək və Əhalinin Sosial Müdafiəsi
Nazirliyinin tabeliyində Dövlət Məşğulluq Agentliyinin Qazax-Tovuz
Regional Məşğulluq filialının müdiri Elçin Nəsibov və digər aidiyyəti şəxslərlə
birlikdə Qazaxda keçiriləcək sözü gedən festivalla bağlı görülməsi nəzərdə
tutulan işləri müzakirə edib. Festivalın yüksək səviyyədə keçirilməsi üçün
bütün təşkilati məsələlərin vaxtında icra olunması, zəruri addımların atılması istiqamətində
aidiyyəti üzrə müvafiq tapşırıqların verib. GOYEZEN.AZ
Facebook-da paylaş