İcra başçısı Çaylı kəndində Şəhidlər xiyabanını ziyarət edib
Vətən torpaqlarının ərazi bütövlüyü uğrunda canından keçən igid oğul
və qızlarımızın xatirəsi Qazaxda hər zaman əziz tutulur. Şəhidlərimizə, onların
ailə üzvlərinə olan qayğı həmişə yüksək səviyyədədir. Bu, rayon rəhbərinin fəaliyyətə
başladığı ilk gündən şəhidlərimizin ailə üzvlərinə daim qayğı ilə yanaşmasında,
şəhidlərimizin uyuduğu qəbiristanlıqların, onların xatirəsinə ucaldılmış abidələrin,
parkların, bulaqların, xiyabanların abadlaşdırılmasında, yenilənməsində, əsaslı
şəkildə təmir edilməsində özünü aydın şəkildə göstərir. Kədər və qürur yerimiz
olan, şəhərin mərkəzində və kəndlərdə yerləşən Şəhidlər xiyabanı, orada
aparılan abadlıq işləri, ən əsası da şəhərdəki xiyabana şəhidlərimizin adı və şəkli
əks olunmuş lövhənin vurulması bu istiqamətdə görülən işlərin bariz nümunəsidir.
Bu gün həmin xiyabanlar müqəddəs məkan kimi hər kəsin üz tutduğu, ömür boyu şəhidlərimizi
ehtiramla yad edəcəyi əbədi bir ünvandır. Rayonda
Vətən müharibəsi şəhidlərinin adlarının əbədiləşdirilməsi istiqamətində də
təqdirəlayiq işlər görülür. Qazax Rayon İcra Hakimiyyətinin təşəbbüsü və dəstəyi
ilə "Göyəzən” qəzetinin baş redaktoru, şair-publisist Elçin İsmayıl tərəfindən
Vətən müharibəsi şəhidlərinə həsr olunmuş "Qanları ilə dastan
yazanlar" kitabının yazılması, Qazax Tarix-Diyarşünaslıq Muzeyində Birinci və İkinci Qarabağ
müharibəsi zamanı Vətən uğrunda canlarından keçən 339 nəfər şəhidin xatirəsinə
guşənin yaradılması, şəhərin mərkəzində yerləşən Şəhidlər xiyabanında Vətən
müharibəsi şəhidlərinin lövhələrinin vurulması bu dediklərimizin bariz
nümunəsidir.
Qazax Rayon İcra
Hakimiyyəti başçısının müvafiq Sərəncamlarına əsasən Qazax şəhərində olan 12
adsız küçəyə müxtəlif adda ordenlə təltif olunmuş 11 nəfər Vətən müharibəsi və 1 nəfər Tovuz döyüşləri şəhidlərinin adlarının
verilməsi də igid Vətən oğullarının adlarının əbədiləşdirilməsi istiqamətində
görülən işlərdir. 44 günlük Vətən müharibəsində
qanları ilə tarix yazan igid oğullarımızın əziz xatirələrini əbədiləşdirmək üçün görülən nümunəvi işlərdən biri də
yaradılan Abidə Kompleksidir. Şəhərin Nəriman Nərimanov küçəsində yaradılan bu Abidə
Kompleksi müstəqil Azərbaycanın suverenliyi, torpaqlarımızın ərazi
bütövlüyü uğrunda canından keçən qəhrəmanlarımızın xatirəsinə olan hörmət və
ehtiramı özündə əks etdirir. 27 sentyabr Anım Günündə açılışı olan Abidə
Kompleksi bu gün canını Vətən, xalq, dövlət yolunda fəda edən oğullarımızın
xatirəsini əbədiləşdirən müqəddəs bir məkana çevrilib. Qazaxda bütün
şəhidlərimizlə yanaşı, 44 günlük Vətən müharibəsində Müzəffər Ali Baş Komandan
İlham Əliyevin rəhbərliyi altında adlarını hərb tariximizə qızıl hərflərlə
yazdıran igid oğullarımızın xatirəsi də əziz tutulur. Ən əsası
da 44 günlük savaşda qazandığımız tarixi nailiyyətlərə görə Ali Baş Komandana,
onun rəhbərliyi altında bizləri Qələbə ilə sevindirən Azərbaycan Ordusunun əsgər
və zabitlərinə, hərbçilərimizə, Vətən uğrunda sağlamlığını itirən qeyrətli, cəsur
qazilərimizə, canından keçən şəhidlərimizə bir ömür boyu minnətdar və borclu
olduğumuz bir an belə unudulmur. Eyni zamanda minnətdar olmaqla yanaşı, Vətən
uğrunda canlarından keçən şəhidlərimizin adlarını yaşatmaq, gələcək nəsillərə
ötürmək, şəhidlərimizin ailələrinə sahib çıxmaq, onları daim yad etmək ən ümdə
vəzifə götürülür.
Bu gün Qazax Rayon İcra Hakimiyyətinin başçısı Rəcəb Babaşov ənənəsinə sadiq qalaraq Çaylı
kəndində yerləşən Birinci və İkinci Qarabağ müharibəsi şəhidlərinin uyuduğu Şəhidlər
xiyabanında olub, igid Vətən oğullarının məzarlarını ziyarət edib, əziz
xatirələrini ehtiramla anıb. Rayon
rəhbəri Vətən uğrunda canlarından keçən, qanları ilə tarix yazan
oğullarımızla, şəhidlərimizlə, sağlamlığını itirən qazilərimizlə bu gün hər
kəsin fəxr etdiyini, qürur duyduğunu bildirib. Müstəqil Azərbaycan dövləti və
xalqımız var olduqca şəhidlərimizin də qəlblərdə daim əbədi yaşayacağını qeyd
edib. Şəhidlərimizin adlarını yaşatmağın, gələcək nəsillərə örnək və nümunə
göstərməyin hər birimizin üzərinə düşən ən əsas iş olduğunu vurğulayıb. "Bu gün özümə borc
bildim ki, şəhidlərimizi ziyarət edim. Ruhları qarşısında mənəvi borcumuzu az
da olsa qaytaraq”, - deyən icra başçısı tək dövlət məmuru olaraq deyil, həm də
bir vətəndaş olaraq şəhidlərimizi yad etdiyini bildirib. İcra başçısı ölkə
Prezidenti İlham Əliyev, Birinci vitse-prezident Mehriban Əliyeva tərəfindən
şəhid ailələrinə, qazilərimizə göstərilən qayğının hər birimiz üçün örnək və
nümunə olduğunu qeyd edərək həmin qayğının bundan sonra da davam etdiriləcəyini
söyləyib. Şəhidlər xiyabanında
səliqə-sahmana, təmizliyə daim diqqət ayrılmasını qeyd edən icra başçısı
bununla bağlı aidiyyəti şəxslərə müvafiq tapşırıq və tövsiyələrini verib.
Şəhid çavuş Ruslan
Aslanovun atası Yaqub Aslanov Qazaxda şəhidlərə,
onların ailələrinə verdiyi yüksək dəyərə görə ölkə başçısına, Birinci
vitse-prezidentə və rayon rəhbərliyinə şəhid ailələri adından minnətdarlığını
bildirib. Bugünkü ziyarəti xiyabanda uyuyan şəhidlərin timsalında bütün
şəhidlərimizə olan dərin ehtiramın bariz nümunəsi kimi dəyərləndirib.
GOYEZEN.AZ
Facebook-da paylaş