Qazaxda Vətən müharibəsi şəhidlərinin məzarları ziyarət olunub
Azərbaycan
xalqının yaddaşına və hərb tariximizə qızıl hərflərlə yazılan 2020-ci il hələ
uzun illər tarixi Qələbənin, Zəfərin qazanıldığı bir il kimi xatırlanacaq. Çünki
həmin il 44 günlük Vətən müharibəsində əldə etdiyimiz böyük Zəfərin, unudulmaz
tarixi Qələbənin əks olunduğu bir ildir. Azərbaycan Prezidenti, Silahlı
Qüvvələrin Müzəffər Ali Baş Komandanı İlham Əliyevin rəhbərliyi altında
rəşadətli ordumuzun bəxş etdiyi bu möhtəşəm Qələbənin sevincini hər bir
azərbaycanlı bu gün də böyük qürur hissi ilə xatırlayır. Bu
hissi bizə, xalqımıza yaşadanlar isə Azərbaycanın qorxmaz Vətən
övladlarıdır. Biz xalqımıza bu Qələbəni yaşadan Müzəffər Ali Baş Komandan,
Prezident İlham Əliyevə və Azərbaycan Ordusuna, torpaqlarımız uğrunda
canlarından keçən qəhrəman oğullarımıza, sağlamlığını itirən qazilərimizə
minnətdarıq. Onlar heç zaman unudulmayacaq. Vətən uğrunda canlarından keçən
şəhidlərimizin adlarını yaşatmaq, gələcək nəsillərə ötürmək, şəhidlərimizin
ailələrinə sahib çıxmaq, onları daim yad etmək isə bizim mənəvi borcumuzdur. 30 illik həsrətə son qoyan 44 günlük Vətən
müharibəsində qazandığımız Qələbədə Qazaxın mərd oğullarının da payı var.
Qazaxın 51 nəfər igid oğlu düşmən tapdağında qalan torpaqlarımızın işğaldan
azad edilməsi uğrunda gedən döyüşlərdə əsl qəhrəmanlıq göstərərək uca zirvəyə -
Şəhidlik zirvəsinə yüksəldi. Bu gün Qazaxda bütün şəhidlərimizin, o cümlədən 44
günlük Vətən müharibəsində adlarını hərb tariximizə qızıl hərflərlə yazdıran
igid oğullarımızın da xatirəsi əziz tutulur. Vətən uğrunda canından keçən
oğullarımız, onların ailələri hər zaman yad olunur. Rəhbər təyin olunduğu ilk gündən şəhidlərimizi,
qazilərimizi, onların ailə üzvlərini daim diqqətdə saxlayan Qazax
Rayon İcra Hakimiyyətinin başçısı Rəcəb Babaşov həmin qayğını bu
gün də davam etdirir. Cənab Prezident İlham Əliyevin və Birinci vitse-prezident
Mehriban Əliyevanın şəhidlərimizə, şəhid ailələrinə, Qarabağ müharibəsi
əlillərinə, onların ailələrinə göstərdikləri qayğı rayon rəhbərinin iş
fəaliyyətinin əsas hissəsini təşkil edir. Əlamətdar günlərdə, şəhidlərimizin
doğum və anım günlərində onların məzarlarını ziyrət edən, ailələrini tək
qoymayan rayon rəhbəri ənənəsinə sadiq qalaraq qarşıdan gələn 31 dekabr -
Dünya Azərbaycanlılarının Həmrəylik Günü və Yeni il bayramı ərəfəsində 44
günlük Vətən müharibəsində qəhrəmancasına şəhid olan oğullarımızı
da yad edib, onların əziz xatirələrini ehtiramla anıb. Qazax Rayon İcra Hakimiyyətinin başçısı Rəcəb Babaşov icra aparatının
məsul şəxsləri, Azərbaycan Qarabağ Müharibəsi Əlilləri, Veteranları və
Şəhid Ailələri İctimai Birliyinin Qazax rayon filialının sədri Xasay
Balayev, Azərbaycan Respublikası Müharibə, Əmək və Silahlı Qüvvələr
Veteranları Şurasının Qazax rayon şöbəsinin sədri Azər Məmmədovla birlikdə
Vətən müharibəsində iştirak edən Qazax şəhərindən, Hüseynbəyli,
Canalı və Orta Salahlı kəndlərindən
olan şəhidlərimizin məzarlarını ziyarət edib. Şəhidlərimizin ailə üzvləri ilə
birlikdə qəhrəman oğullarımızın məzarları ziyarət olunaraq ruhlarına dualar
oxunub. İcra başçısı Vətən uğrunda canından
keçən bütün şəhidlərimizə Allahdan rəhmət, ailələrinə səbir diləyib. Cənab
Prezident, Müzəffər Ali Baş Komandan İlham Əliyevin rəhbərliyi altında 44
günlük Vətən müharibəsində tarixə adlarını qızıl hərflərlə yazan igid oğullarımızla,
şəhidlərimizlə, qazilərimizlə bu gün hər kəsin fəxr etdiyini, qürur duyduğunu
bildirib. Nə qədər ki, müstəqil Azərbaycan dövləti və xalqı var, şəhidlərimizin
daim qəlblərdə yaşayacağını qeyd edib. Şəhidlərimizin adlarını əziz tutmağın,
yaşatmağın hər birimizin vəzifəsi olduğunu vurğulayıb. Rayon rəhbəri qeyd edib ki, ölkə başçısı
şəhidlərimizin, qazilərimizin ailələri, valideynləri qarşısında baş əyirəm
söyləyirsə, bu, hər birimiz üçün nümunə olmalıdır. "Bu gün özümə borc
bildim ki, bayram ərəfəsində şəhidlərimizi ziyarət edim. Ruhları qarşısında
mənəvi borcumuzu az da olsa qaytaraq”, - deyən icra başçısı tək dövlət məmuru
olaraq deyil, həm də bir vətəndaş olaraq şəhidlərimizi yad etdiyini söyləyib.
Rayon rəhbəri şəhid ailələrinə göstərilən diqqət və qayğının bundan sonra da
davam etdiriləcəyini söyləyib. Şəhid gizir Elvin Orucovun anası Səidə Orucova, əsgər
İlkin Əliyevin atası Bəxtiyar Əliyev və başqaları şəhid ailəsi kimi hər zaman
onlara göstərilən diqqətə və qayğıya görə ölkə Prezidenti İlham Əliyevə,
Birinci vitse-prezident Mehriban Əliyevaya və rayon rəhbərliyinə
minnətdarlıqlarını bildiriblər. Övladlarının doğum günlərində, əlamətdar
günlərdə yad olunmasına görə razılıq ediblər. Şəhid ailələri igid Vətən
oğullarının adlarının yaşadılması istiqamətində görülmüş bütün işləri dövlətin,
ölkə başçısının və rayon rəhbərliyinin şəhidlərimizə, onların ailələrinə
göstərilən qayğının əyani sübutu kimi qeyd ediblər. Ölümündən sonra "Vətən uğrunda”, "Füzulinin azad olunmasına görə”, "Döyüşdə fərqlənməyə görə” medalları ilə təltif olunmuş, Qazax şəhər
sakini, şəhid gizir Orucov Elvin Rövşən oğlunun məzarı Ölümündən sonra "Vətən uğrunda”, "Ağdamın azad olunmasına görə” medalları ilə təltif olunmuş, Qazax şəhər
sakini, şəhid əsgər Hüseynov İlqar Yaşar
oğlunun məzarı
Ölümündən sonra "Vətən
uğrunda”, "Döyüşdə fərqlənməyə görə”, "Füzulinin azad
olunmasına görə” medalları ilə təltif olunmuş, Qazax şəhər sakini, şəhid çavuş Veyisli Xaliddin Zərgər oğlunun məzarı
Ölümündən sonra "Azərbaycan Bayrağı” ordeni,
"Vətən uğrunda”, "Şuşanın azad olunmasına görə”, "Xocavəndin azad olunmasına görə”,
"Kəlbəcərin azad olunmasına görə”, "Füzulinin azad
olunmasına görə”, "İgidliyə
görə” medalları
ilə təltif olunmuş, Hüseynbəyli kənd sakini, şəhid kiçik gizir Mədətov Röyal
Şahin oğlunun məzarı Ölümündən sonra "Vətən uğrunda",
"Xocavəndin azad olunmasına görə", "Laçının azad olunmasına görə” medalları
ilə təltif olunmuş, Canalı kənd sakini, şəhid əsgər Əliyev İlkin Bəxtiyar oğlunun
məzarı Ölümündən
sonra "Vətən uğrunda”, "Laçının azad olunmasına görə”, "Suqovuşanın azad olunmasına görə” medalları
ilə təltif olunmuş, Orta Salahlı kənd sakini, şəhid əsgər Vəliyev Anar Həmzə
oğlunun məzarı GOYEZEN.AZ
Facebook-da paylaş