Azərbaycan-Türkiyə qardaşlığı əbədi və sarsılmazdır!
Azərbaycana
növbəti səfərini reallaşdıran Türkiyə Respublikasının Prezidenti Rəcəb Tayyib
Ərdoğan iki dost və qardaş ölkə arasında münasibətlərin daha da
möhkəmləndirilməsi istiqamətində ciddi addım atdı. Səfər çərçivəsində iyun
ayının 16-da Türkiyə Respublikasının Prezidenti Rəcəb Tayyib Ərdoğan Azərbaycan
Parlamentində geniş çıxış etmişdir. Rəcəb Tayyib Ərdoğanın Şuşada və Azərbaycan
Respublikasının Milli Məclisində çıxışı zamanı verdiyi bəyanatlar qardaş
ölkənin yeni reallıqlar fonunda Cənubi Qafqazda apardığı və bundan sonra da
aparacağı geosiyasətin əsas konturları kimi də qəbul oluna bilər. Bu konturları
şərti olaraq bir neçə istiqamət üzrə qruplaşdırmaq olar. Bunlar əvvəla
Türkiyənin Azərbaycanla müstəqilliyin ilk illərindən başlatdığı və əbədi olaraq
müəyyənləşdirilmiş əməkdaşlıq, qardaşlıq, birlik siyasətini daha da qətiyyətlə
aparmaqla bağlı dünyaya verdiyi mesajdır. Bir mesaj olaraq dünyaya bildirdi ki,
qlobal və regiondakı beynəlxalq münasibətlərin hansı formada dəyişməsindən və
dəyişəcəyindən asılı olmayaraq Türkiyə Azərbaycanın yanında əbədi olaraq
qalacaq. Digər tərəfdən vurğulanan mesaj Türkiyənin bölgədə gələcəkdə yarana
biləcək müharibə təhdidləri ilə bağlıdır. Türkiyə Prezidenti bu bölgədə sülhün
və təhlükəsizliyin əbədi qalmasında maraqlı olduğunu bildirdi. Bu marağın təmin
edilməsi üçün Türkiyə əməkdaşlıq mənafeləri və beynəlxalq hüquq tələbləri
çərçivəsində bütün addımları gələcəkdə də atacaq. Həmçinin, Türkiyə bölgədə
yeni reallığa uyğun olaraq əməkdaşlıq perspektivlərinin açılmasına çox maraqla
baxır və bu işlərin gerçəkləşməsi üçün əlindən gələni etməyə hazırdır. Bildirilib ki,
işğaldan azad olunmuş ərazilərin dirçəlməsində Türkiyə də öz töhfəsini verir və
bundan sonra da verəcəkdir. Türkiyə Respublikasının Prezidenti Rəcəb Tayyib
Ərdoğanın səsləndirdiyi fikirlərin əsas leytmotivi ondan ibarətdir ki, davamlı
sülhə gedən yol bölgədəki bütün xalqların və dövlətlərin qarşılıqlı etimad və
əməkdaşlığından keçir. Türkiyə olaraq inşallah bu prosesdə qardaş Azərbaycanın
yanında yer almaqda davam edəcəyik. Tarix daha bir
Türkiyə-Azərbaycan qardaşlığına şahidlik etdi, yeni bir dostluq və qardaşlıq
dastanı yazıldı. Xalqımız üçün əlamətdar gündə - 15 İyun – Milli Qurtuluş
Günündə Türkiyə Prezidenti Rəcəb Tayyib Ərdoğanın Azərbaycana gəlişi, işğaldan
azad edilmiş Şuşaya səfəri çox mühüm tarixi hadisədir. Tarixi sənədlərin
imzalandığı tarix və məkan hər zaman böyük əhəmiyyət kəsb edir. Çünki illər
sonra gələcək nəsillər bu tarixi və məkanı tarix kitablarından oxuyarkən məsələnin
mahiyyətini və əhəmiyyətini daha dərindən dərk edirlər. Bu mənada Şuşa
Bəyannaməsinin siyasi və tarixi əhəmiyyətini izah edən məsələ sənədin imzalanma
tarixi, yəni 15 İyun - Milli Qurtuluş Günüdürsə, ikincisi onun bir tərəfdən
Azərbaycanın mədəniyyət paytaxtı olaraq bilinən, eyni zamanda da alınmaz qala
hesab olunan, şəhərin bünövrəsinin əsrlər öncə azərbaycanlı, türk Pənahəli xan
tərəfindən qoyulduğu məkanda - Şuşada imzalanmasıdır. Əgər 28 il öncə 15 iyun
tarixində Azərbaycanda vətəndaş müharibəsinin qarşısını Ümummilli Lider Heydər
Əliyev aldısa, illər sonra Qars müqaviləsinin imzalanmasından yüz il sonra eyni
gündə Azərbaycanın torpaqlarını düşmən tapdağından azad edən Müzəffər Ali Baş
Komandan İlham Əliyev Şuşa Bəyannaməsini imzaladı. "Azərbaycan Respublikası ilə Türkiyə Respublikası arasında
müttəfiqlik münasibətləri haqqında Şuşa Bəyannaməsi”nin imzalanması ən yüksək
zirvədə olan Azərbaycan-Türkiyə münasibətlərinin keyfiyyətcə yeni mərhələyə
qədəm qoyduğunu göstərir. 1921-ci ildə imzalanmış Qars müqaviləsindən tam yüz
il sonra iki dost və qardaş ölkə arasında müttəfiqlik münasibətlərinə dair Şuşa
Bəyannaməsinin imzalanması, heç şübhəsiz, müstəsna siyasi və tarixi əhəmiyyət
daşıyır. Elə təsadüfi deyil ki, Birgə Bəyannamədə tarixi Qars müqaviləsinə istinad
edilir. Prezident İlham Əliyevin qeyd etdiyi kimi: "Tarixi Qars müqaviləsi düz
100 il bundan əvvəl imzalanmışdır. Bu da böyük rəmzi məna daşıyır. Azad edilmiş
Şuşa şəhərində 100 ildən sonra müttəfiqlik haqqında imzalanan Birgə Bəyannamə
bizim gələcək iş birliyimizin istiqamətini göstərir”. Müttəfiqlik
münasibətlərinə dair Şuşa Bəyannaməsi Azərbaycan və Türkiyə dövlətlərinin
münasibətlərində, sadəcə, iki dövlətin rəhbərlərinin, dövlət qurumlarının
deyil, onların vətəndaşlarının, cəmiyyətlərinin də bir-birinə olan sonsuz,
səmimi sevgisinin təzahürüdür. Müttəfiqlik bəyannaməsində iki dövlət arasında
münasibətlərin dərinləşdirilməsinin bütün sahələri ehtiva olunur ki, bu sənəd
də bundan sonra Azərbaycan-Türkiyə münasibətlərinin əsas rol xəritəsini təşkil edəcək.
Müdafiə sənayesi və qarşılıqlı hərbi yardım ilə bundan sonra iki ölkə bir-birinin
təhlükəsizliyini qoruyacaq. Bu, o deməkdir ki, iki ölkədən birinin
müstəqilliyinə, suverenliyinə, ərazi bütövlüyünə, beynəlxalq səviyyədə tanınmış
sərhədlərinin toxunulmazlığına və ya təhlükəsizliyinə qarşı üçüncü dövlət və ya
dövlətlər tərəfindən təhdid və ya təcavüz edildiyi təqdirdə bir-birinin
yardımına çatacaq. Bununla yanaşı, sənəd heç bir üçüncü ölkəyə qarşı olmadan,
beynəlxalq hüquqa və BMT Nizamnaməsinə uyğun olaraq bir-birinə lazımi yardım
göstərmək, bölgədə iqtisadi əməkdaşlığı təşviq etməklə sülhü və təhlükəsizliyin
təmin edilərək dərinləşdirilməsini özündə ehtiva edir. Bütün iqtisadi
və nəqliyyat əlaqələrinin bərpasını özündə ehtiva edən sənədə də istinad edərək
Zəngəzur dəhlizinin açılmasının önəmini bildirən Prezident İlham Əliyev bir
daha dünyaya mesaj vermiş oldu ki, Azərbaycan da, Türkiyə də regionda iqtisadi
və nəqliyyat əlaqələrinin bərpa olunması ilə əslində bütün regionun
inteqrasiyasında maraqlıdır. Bu məsələ qardaş ölkənin və Azərbaycan xalqının
sevimli siyasi fiquruna çevrilən hörmətli Ərdoğanın da nitqində öz əksini tapdı
ki, Ermənistanın bu çağırışlara adekvat və müsbət reaksiya verəcəyinə ümid
edirik. Çünki Prezident Ərdoğan bildirdi ki, bütün əməkdaşlıq ideyalarında
Rusiya da var və Rusiyanın dövlət rəhbəri Putin də bütün layihələrə açıqdır.
Türkiyənin və Azərbaycanın yürütdüyü qətiyyətli, eyni zamanda, gələcək
perspektivləri də özündə ehtiva edən uzaqgörən siyasət bütövlükdə Cənubi Qafqaz
regionunun dirçəldilməsinə istiqamətlənib. Mövcud və potensial inkişaf
perspektivlərindən kənarda qalmamaq üçün Ermənistan uyğun addımlar atmalıdır.
Azərbaycan torpaqlarının işğaldan azad edilməsi ilə əlaqədar sülhün təmin
edilməsi mexanizmləri çərçivəsində Türkiyə-Rusiya Birgə Mərkəzinin
fəaliyyətinin təşviq edilməsi məsələsi də olduqca önəm kəsb edən məsələdir ki,
bu Türkiyənin regionda, burada gedən proseslərdə artıq birmənalı olaraq söz
sahibi olduğundan xəbər verir. Türkiyə
dövlətinin və xalqının 44 günlük Vətən müharibəsi dövründə hər gün Azərbaycanın
yanında olmasını bildirməsi bir daha sübut etdi ki, Azərbaycan xalqının
Ümummilli Lideri Heydər Əliyevin "Bir millət, iki dövlət” və Türkiyə
Cümhuriyyətinin qurucusu Mustafa Kamal Atatürkün "Azərbaycanın sevinci bizim
sevincimiz, kədəri bizim kədərimizdir” kəlamları ən dar məqamda belə öz sözünü
deyir. Onların siyasətlərinin davamçıları da atdığı hər addımda bu iki dövlət
adamlarının ideallarına sadiqdirlər. Beləliklə, Azərbaycan
və Türkiyə bu gün dünya miqyasında nadir əməkdaşlıq və müttəfiqlik nümunəsi
göstərir. Bu reallıqlar iki dövlətin bundan sonra da dostluq və qardaşlıq
prinsiplərinə əsaslanan çoxşaxəli münasibətlərinin uğurla inkişaf edəcəyini
deməyə əsas verir. Heç şübhəsiz, Azərbaycan və Türkiyə birgə addımlayaraq yeni
zəfərlər qazanacaq, böyük tarixi nailiyyətlərə imza atacaqlar. Məmməd YUSİFOV, Bakı Dövlət Universitetinin Qazax filialının Tədris və
elmi işlər üzrə direktor müavini, Fizika-riyaziyyat elmləri namizədi, dosent
Facebook-da paylaş