"ASAN Məktub" layihəsi Qazaxın sərhəd kəndi Cəfərlidə
Respublika Prezidenti İlham Əliyevin 13 iyul
2012-ci il tarixli 685 nömrəli Fərmanına əsasən yaradılmış Azərbaycan
Respublikasının Prezidenti yanında Vətəndaşlara Xidmət və Sosial İnnovasiyalar
üzrə Dövlət Agentliyi və agentliyin tabeçiliyində olan "ASAN xidmət” bu gün
bütün dünyada bir brendə çevrilib. Gündən-günə yeni layihələri ilə ölkə
vətəndaşlarını sevindirən bu xidmətin fəaliyyətindən minlərlə insan yararlanır. Belə
layihələrdən biri də uşaqların istəyi əsasında həyata keçirilən "ASAN Məktub”
layihəsidir. Adından da göründüyü kimi, layihə uşaqların arzularını asan formada həyata
keçirmək üçün xidmət göstərir. "ASAN Məktub” texnologiyanın
imkanlarından faydalanaraq çox sayda uşaqların "Gizli Qəhrəman”ına çevrilib. Qeyd edək ki, "ASAN
Məktub" layihəsi"ASAN Könüllüləri” Təşkilatının tərkibində yaranıb və 3
ildir ki, fəaliyyət göstərir. Bu müddət ərzində 3000-dək uşaq müraciəti qeydə
alınmış və arzuları həyata keçirilmişdir. Layihə çərçivəsində xüsusi qayğıya
ehtiyacı olan 3-14 yaş arası uşaqlara məktublar yazdırılır və həmin məktublar www.asanmektub.azsaytına yerləşdirilir. Sayta yerləşdirilmiş məktublarda qeyd olunan istəklər
vətəndaşlar və ya şirkətlər tərəfindən təmin edilir. Yekun olaraq hədiyyələr
"ASAN Məktub" komandası tərəfindən uşaqlara təqdim olunur. "ASAN
Məktub" komandası bu
gün Qazaxın sərhəd kəndi Cəfərlidə öz layihəsini reallaşdırıb. Belə ki, layihə
iştirakçıları Cəfərli kəndində olub, uşaqlara arzu və istəklərini əks etdirən
məktublar yazdırıblar. Gəncə "ASAN xidmət” mərkəzinin
vətəndaşların qəbulu işinin təşkili üzrə baş məsləhətçisi Orxan İbrahimli GOYEZEN.AZ saytına müsahibəsində bildirib ki, "ASAN
Könüllüləri” Təşkilatının təşəbbüsü ilə reallaşan bu layihənin
keçirilməsində əsas məqsəd həssas təbəqədən olan, 14 yaşınadək uşaqların arzu
və istəklərinin reallaşdırılmasıdır. Aztəminatlı ailələrdən olan uşaqların
məktubda yazdığı hədiyyələri öhdəçiliyə götürüb xeyirxah vətəndaşlardan təhvil
alınaraq, aidiyyatı üzrə öz sahibinə təqdim etməkdir. "ASAN Könüllüləri” Təşkilatının nümayəndələri
Pəri Hüseynli, Mətanət Cəlalova və Elgün Hümbətovun iştirakı ilə baş tutan "ASAN
Məktub" layihəsi sərhəd kəndində yaşayan 31 nəfər uşağın arzu və istəyini
qeyd edib, onları sevindirməyə çalışıb. Uşaqların arzularının yer aldığı
məktublar toplanıb. "ASAN
Məktub" komandası Cəfərli kənd uşaq bağçasında olub, uşaqlar üçün
yaradılan şəraitlə də tanış olublar.
Facebook-da paylaş