Qazaxda 28 May – Respublika Gününə həsr edilmiş onlayn konfrans təşkil olunub
Bu gün Qazax Rayon İcra
Hakimiyyətinin dəstəyi, Qazax Rayon Gənclər və İdman İdarəsi, Gənclərin İnkişaf
və Karyera Mərkəzinin Qazax nümayəndəliyi və Qazax Rayon Heydər Əliyev Mərkəzinin
birgə təşkilatçılığı ilə 28 May – Respublika Gününə həsr edilən onlayn konfrans
təşkil olunub. "Zoom” platforması üzərindən virtual formatda
keçirilən konfransda könüllülər və aktiv gənclər iştirak ediblər. Qazax Rayon
Gənclər və İdman İdarəsinin rəisi Vüqar Nəbiyev konfransı giriş sözü ilə açaraq iştirakçıları əlamətdar gün münasibətilə təbrik edib. O,
qısa müddət ərzində mövcud olmuş Azərbaycan Xalq Cümhuriyyətinin 1918-1920-ci
illəri tariximizin şərəfli bir dövrünə çevirdiyini bildirib. Qazax Gənclərin İnkişaf və Karyera Mərkəzinin direktoru İsmayıl Süleymanov çıxış edərək zəngin dövlətçilik ənənələri olan
Azərbaycan xalqının XX əsrin əvvəlində Müsəlman Şərqində ilk demokratik
respublika yaratmasının mühüm tarixi uğur olduğunu qeyd edib. Qazax Rayon
Heydər Əliyev Mərkəzinin direktoru Ceyhunə Hüseynova cəmi 23 ay fəaliyyət
göstərən Azərbaycan Xalq Cümhuriyyətinin 1920-ci ildə endirilən üçrəngli
bayrağının növbəti dəfə Azərbaycan xalqının ümummilli lideri Heydər Əliyev
tərəfindən Naxçıvan Muxtar Respublikasının Ali Məclisinin sessiyasında rəsmi
dövlət bayrağı kimi qaldırıldığını xatırladıb. Qazax Dövlət Sosial-İqtisadi Kollecinin Monitorinq və Qiymətləndirmə
şöbəsinin müdiri Elvira Əfəndiyeva da Ulu Öndərin ölkəmizdə ikinci dəfə
hakimiyyətə gəldikdən sonra Azərbaycan Xalq Cümhuriyyətinin fəaliyyətinə yüksək
siyasi qiymət verdiyini diqqətə çatdırıb. Xalq Cümhuriyyətinin varisi elan
edilən Azərbaycan Respublikasının inkişafından, müstəqilliyimizin əbədiliyinin təmin
olunmasında ümummilli liderin atdığı addımlardan söz açıb. Əldə olunan o müstəqilliyin bu
gün ölkə Prezidenti cənab İlham Əliyev tərəfindən layiqincə qorunduğunu diqqətə
çatdırıb. Sonra Qazax Gənclərin İnkişaf və Karyera Mərkəzinin "Gənc Könüllüləri” Musa
Paşayev, Pəri İbrahimova,
Qazax Rayon
Gənclər və İdman İdarəsinin könüllüsü Şəhadət Abbasov, Regional İnkişaf İctimai
Birliyinin könüllüsü Ülvi Zeynalov məruzələrlə çıxış ediblər. Gənclər
məruzələrində qeyd ediblər ki, bir əsrdən artıq çar Rusiyasının əsarəti altında
qalan Azərbaycanın qədim dövlətçilik ənənələri I Dünya müharibəsinin gedişində
və çar Rusiyasında baş verən daxili mübarizələr nəticəsində yaranmış çox
mürəkkəb bir tarixi şəraitdə yenidən dirçəlməyə başlayıb. Müsəlman Şərqində ilk
demokratik respublika kimi adını tarixə yazan Azərbaycan Xalq Cümhuriyyəti
ölkəmizin çoxəsrlik ictimai-siyasi və xalqımızın milli oyanışı proseslərinin
məntiqi nəticəsi və tarixi zərurət kimi yaranıb. Tarixə nəzər salsaq görərik
ki, qarşısına müstəqil, azad və demokratik respublika qurmaq kimi şərəfli
vəzifə qoymuş ilk milli hökumət cəmi 23 aylıq fəaliyyəti dövründə xalqımızın öz
müqəddəratını təyin etməyə qadir olduğunu əyani şəkildə bütün dünyaya nümayiş
etdirib. Konfrans öz işini mövzu ətrafında geniş müzakirələrlə davam etdirib. GOYEZEN.AZ
Facebook-da paylaş