Qazax Rayon Heydər Əliyev Mərkəzində 31 Mart - Azərbaycanlıların Soyqırımı Günü ilə əlaqədar film nümayiş olunub
Martın
30-da Qazax Rayon Heydər Əliyev Mərkəzində 31 Mart - Azərbaycanlıların
Soyqırımı Günü ilə əlaqədar film
nümayişi təşkil olunub. Tədbirdə Qazax Dövlət Sosial-İqtisadi Kollecinin
tələbələri iştirak ediblər.
Qazax
Rayon Heydər Əliyev Mərkəzinin direktoru Ceyhunə Hüseynova çıxış edərək 200 ildən
bəri ermənilərin azərbaycanlılara qarşı törətdikləri vəhşiliklərin,
soyqırımının tarixi, səbəbləri barədə məlumat verib. C.Hüseynova bildirib ki, 1918-ci il 30 mart-3 aprel tarixlərində Bakıda, Qarabağda,
Naxçıvanda, Şamaxıda, Qubada, Xaçmazda, Lənkəranda, Salyanda, Zəngəzurda Bakı
Sovetinin 6 min silahlı əsgəri və daşnak- ermənilərin 4 minlik silahlıları azərbaycanlılara
qarşı soyqırıma başladılar. Üç gün davam edən qırğın zamanı erməni silahlıları
bolşeviklərin köməyi ilə azərbaycanlıların yaşadıqları məhəllələrə qəflətən
basqınlar edildi, 30 mindən çox azərbaycanlı qətlə yetirildi, 10 minlərlə insan
öz torpaqlarından qovuldu, yaşayış məntəqələri dağıdıldı, mədəniyyət abidələri,
məscid və qəbiristanlıqlar yerlə-yeksan edildi. Ermənilərin xalqımıza qarşı törətdiyi 31 Mart
soyqırımı faciəsinin araşdırılması və həqiqətlərin dünyaya yayılması işi
Ümummilli Lider Heydər Əliyevin təşəbbüsü ilə başlanılmışdır. Azərbaycan
xalqına qarşı törədilmiş bütün soyqırım faciələrini qeyd etmək məqsədilə
1998-ci il martın 26-da Ulu Öndər Heydər Əliyev "Azərbaycanlıların
soyqırımı haqqında” Fərman imzalamışdır. Sözügedən Fərmanla martın 31-i "Azərbaycanlıların
Soyqırımı Günü” elan edilmişdir. Sonra
31 Mart - Azərbaycanlıların Soyqırımına həsr olunmuş, Bakı, Şamaxı, Quba,
Qarabağ, Zəngəzur, Lənkəran və digər ərazilərdə azərbaycanlılara qarşı erməni
daşnaklarının xüsusi qəddarlıqla törətdiyi soyqırımdan, vəhşiliklərdən bəhs edən
görüntülərin tarixi faktlarla öz əksini tapdığı sənədli film nümayiş etdirilib.
Qazax Dövlət Sosial-İqtisadi Kollecinin Yer
quruluşu və torpaqşünaslıq fakültəsinin IV kurs tələbəsi Məleykə Rüstəmova çıxış
edərək erməni daşnaklarının Azərbaycan xalqına qarşı törətdikləri
soyqırım siyasəti haqqında öz fikirlərini bildirib. Qeyd edib ki, günahsız insanların xüsusi amansızlıqla qətlə
yetirilməsi və azərbaycanlıların doğma yurd-yuvalarından didərgin salınması
təkcə azərbaycanlılara qarşı deyil, bütün bəşəriyyətə qarşı cinayətdir. 31 Mart - Azərbaycanlıların Soyqırımı Günü ilə
əlaqədar təşkil edilmiş filmin
nümayişi gün ərzində davam etdirilib.
GOYEZEN.AZ
Facebook-da paylaş