İcra başçısı Vətən müharibəsi şəhidi kapitan İmamverdi İsmayılovun atasının vəfatı ilə bağlı ailəsinə başsağlığı verib
44
günlük müharibədə tarix yazan Azərbaycan! 2020-ci ilin 27 sentyabrında başlayan
və Azərbaycanın şanlı tarixinə 10 noyabr – Qələbə Günü
kimi qızıl hərflərlə daxil olan böyük Zəfərimiz. Bu, o tarixi zəfərimizdir ki,
44 gün davam edən haqq savaşında Azərbaycan Ordusu Ermənistanın 30 il ərzində
qurduğu silahlı qüvvələrini darmadağın etdi. Bütün dünyaya səs salan Azərbaycanın
Vətən müharibəsində əldə etdiyi böyük Qələbəni bizlərə Azərbaycan
Respublikasının Prezidenti, Silahlı Qüvvələrin Müzəffər Ali Baş Komandanı İlham
Əliyevin rəhbərliyi altında şanlı Azərbaycan Ordusunun əsgər və zabitləri, hərbçiləri
yaşatdı. Göstərdikləri şücaətlə, qəhrəmanlıqla dövlətin, xalqın, yaşadıqları
rayonun, kəndin, qəsəbənin, bütöv Azərbaycanın adını ucaldan igid Vətən
oğulları ilə bu gün hər birimiz fəxr edir, onlarla qürur duyuruq. Hərb
tariximizə böyük Qələbəni yazdıran, canlarından keçərək Şəhidlik zirvəsinə yüksələn
bütün şəhidlərimizin ruhu qarşısında baş əyir, onlara və ailələrinə bir ömür
boyu minnətdarıq. Cənab Prezident İlham Əliyevin və Birinci
vitse-prezident Mehriban Əliyevanın şəhidlərimizə, şəhid ailələrinə, Qarabağ
müharibəsi əlillərinə, onların ailələrinə göstərdikləri diqqət və qayğı Qazaxda da hər zaman örnək götürülür. Qazax Rayon İcra Hakimiyyətinin başçısı Rəcəb
Babaşov rəhbər təyin olunduğu ilk gündən şəhidlərimizə və onların ailələrinə
daim qayğı ilə yanaşır. İkinci Qarabağ müharibəsində
qəhrəmancasına şəhid olan igid Vətən oğullarından biri də kapitan İsmayılov İmamverdi
Yoloğlu oğludur. Rayon rəhbərliyi tərəfindən şəhidimizin
ailəsi də hər zaman diqqətdə saxlanılır. Aprelin 8-də qəhrəman şəhidimizin atası
Yoloğlu İsmayılov dünyasını dəyişib. Aprelin 9-da torpağa tapşırılan şəhid
atasının bu gün üç mərasimi olub.
Bu gün Qazax Rayon İcra Hakimiyyətinin başçısı Rəcəb Babaşov icra aparatının məsul
işçiləri və rayonun hüquq-mühafizə orqanlarının rəhbərləri ilə birlikdə şəhid kapitanın ata ocağında olub, üç mərasimində
iştirak edib. Mərhum Yoloğlu İsmayılovun
vəfatından kədərləndiyini bildirib, qazaxlı ziyalılar və rayon ictimaiyyəti
adından ailəsinə dərin hüznlə başsağlığı verib, bu ağır günlərdə Tanrıdan
onlara səbir, dözüm, dəyanət diləyib.
Respublika
Prezidenti, Ali Baş Komandan İlham Əliyevin rəhbərliyi altında 44 günlük Vətən
müharibəsində qüdrətli Azərbaycan Ordusunun qazandığı tarixi Qələbədən söz açan
icra başçısı həmin qələbədə payı olan İmamverdi kimi qəhrəman oğullarımızla hər
birimizin fəxr etdiyini bildirib. Azərbaycan xalqı var olduqca şəhidlərimizin
daim qəlblərdə yaşayacağını qeyd edib. Şəhidlərimizin göstərdikləri igidliyin,
qəhrəmanlığın bugünkü və gələcək nəsillər üçün hər zaman örnək olacağını
vurğulayıb. "Şəhidlərimizi, onların ailələrini yad etmək hər birimizin vəzifə
borcudur”, - deyən rayon rəhbəri şəhidimizin ailəsinə göstərilən diqqət və
qayğının bundan sonra da yüksək səviyyədə olacağını söyləyib.
Sonra icra başçısı qəhrəman şəhidimizin ölümündən sonra ölkə Prezidenti tərəfindən təltif olunduğu "Suqovuşanın
azad olunmasına görə” medalını anasına təqdim edib.
İmamverdi İsmayılov 1 may 1989-cu ildə Qazax rayonunun Aşağı Əskipara kəndində anadan olmuşdur. 1995-ci ildə İslam Nəsibov
adına Aşağı Əskipara kənd tam orta məktəbin 1-ci sinifinə daxil olmuş, 2003-cü
ildə həmin məktəbin 8-ci sinifini bitirmişdir. Həmin ildə Cəmşid Naxçıvanski
adına Hərbi Liseyə daxil olmuşdur. 2006-cı ildə həmin liseyi bitirmiş və Heydər Əliyev adına Azərbaycan Ali Hərbi Məktəbinə daxil
olmuşdur. 2010-cu ildə həmin məktəbi bitirmişdir. Sonra 1 il Azərbaycan
Respublikası Silahlı Qüvvələrin Təlim və Tədris
Mərkəzində (TTM) təhsil almışdır. 2011-ci ildə İmamverdi İsmayılov
leytenant rütbəsi almış, peşəkar hərbçi kimi yetişmişdi. Xidmətə başladığı ilk
gündən nizam-intizama riayət edir, öz vəzifəsini ləyaqətlə yerinə yetirirdi.
Qusar rayonunda, Sumqayıt şəhərində (Nasosnu), Bakı şəhərində Müşviq qəsəbəsində
"N” saylı hərbi hissələrdə qüsursuz xidmət edərək Müdafiə Nazirliyi tərəfindən
təltiflərə layiq görülmüşdü. İmamverdi İsmayılov "Azərbaycan Respublikası
Silahlı Qüvvələrinin 95 illiyi (1918-2013)", "Azərbaycan Respublikası
Silahlı Qüvvələrinin 100 illiyi (1918-2018)" yubiley medalları və "Qüsursuz xidmətə görə" 3-cü dərəcəli medalla təltif olunmuş,
fəxri fərmanlar almışdı. Bununla bərabər, xidmətdə də irəliləmiş, artıq 2017-ci
ildə kapitan rütbəsi almış, "N" saylı hərbi hissənin Maddi Təchizat
üzrə xidmət rəisi olmuşdu. Vətən
müharibəsi başlayanda həmlə taborunun qərərgah rəisi olan İmamverdi İsmayılov 27-28
sentyabrda Goranboyun Gülüstan kəndi istiqamətindən irəliləyərək qarşıya
qoyulmuş Murovdağ yüksəkliyinin alınması əmrini bir nəfər itki ilə yerinə
yetirmişdir. Təcrübəli bir zabit kimi döyüş planlarını özü hazırlayır, istiqamətləri
dəqiq müəyyənləşdirərək bütün detalları nəzərə alırdı. Əsgərlərin sonsuz hörmətini,
böyük rəğbətini qazanmışdı İmamverdi İsmayılov. Kapitan
rütbəsi daşıyan İmamverdi İsmayılov Murov istiqamətində gedən döyüşlərdə şəhid
olmuşdur. 29.09.2020-ci il tarixdə Qazax rayonunun Ağköynək kənd qəbiristanlığında
izdihamla dəfn edilmişdir. Ailəliydi.
Emin və Elnur adlı adlı iki oğul övladı yadigar qalıb. Bütün şəhidlərimiz kimi kapitan
İmamverdi İsmayılovun xatirəsi hər zaman əziz tutulur. Şəhid kapitanımızın göstərdiyi
igidlik cənab Prezident İlham Əliyev tərəfindən də yüksək qiymətləndirilmişdir.
O, ölümündən sonra ölkə Prezidentinin 15 dekabr 2020-ci il tarixli Sərəncamına
əsasən "Vətən uğrunda” medalı və 3-cü dərəcəli "Rəşadət” ordeni, 24 iyun 2021-ci il tarixli Sərəncamına
əsasən "Suqovuşanın azad olunmasına görə” medalı ilə təltif olunmuşdur. Qazax Rayon İcra
Hakimiyyəti başçısının "Şəhid adlarının əbədiləşdirilməsi məqsədilə
Qazax şəhərində mövcud olan adsız küçələrə şəhid olmuş şəxslərin adlarının
verilməsi haqqında”2 noyabr 2021-ci il tarixli 9-21/377 nömrəli Sərəncamına əsasən adsız olan küçələrdən birinə 3-cü
dərəcəli "Rəşadət” ordenli şəhidimizin adı verilib.
GOYEZEN.AZ
Facebook-da paylaş