44 günlük Vətən müharibəsindən sonra Qazaxda ilk dəfə "Azərbaycan, Şuşalı Novruz bayramın mübarək!” adlı ümumrayon tədbiri keçirilib - FOTOLAR
2020-ci ilin 27 sentyabrında başlayıb 10 noyabrında
şanlı Zəfərlə başa çatan İkinci Qarabağ müharibəsi, Vətən müharibəsi Azərbaycan
xalqının yaddaşına, eləcə də hərb tariximizə qızıl hərflərlə yazıldı.
Prezident, Azərbaycan Silahlı Qüvvələrinin Müzəffər Ali Baş Komandanı İlham
Əliyevin rəhbərliyi altında şanlı Azərbaycan Ordusunun əsgər və zabitləri,
hərbçiləri 44 günlük haqq savaşına çıxdılar və sonda tarixi Qələbə qazandılar.
Şanlı Zəfərimiz, Vətən torpaqlarının ərazi bütövlüyü naminə Azərbaycanın igid,
qəhrəman oğullarının bir qismi canlarından keçərək Şəhidlik zirvəsinə yüksəldi,
bir qismi isə sağlamlığını Vətən yolunda itirdi. Bu gün Azərbaycan vətəndaşı
olaraq bizə Qələbə sevincini, qalib xalq adını bəxş edən Müzəffər Ali Baş
Komandana, şəhidlərimizə, sağlamlığını itirən qazilərimizə borclu və
minnətdarıq. Bu il qalib xalq olaraq növbəti Bahar bayramını,
Novruz bayramını qarşılamağa hazırlaşırıq. Respublikamızın hər yerində olduğu
kimi, Qazaxda da 44 günlük Vətən müharibəsindən sonra
ilk dəfə qədim və milli bayramımız olan Novruz bayramı təntənəli şəkildə qeyd
olunub. Martın
16-da "Azərbaycan,
Şuşalı Novruz bayramın mübarək!” adlı ümumrayon tədbiri keçirilib. Qazax Rayon İcra Hakimiyyətinin təşkilatçılığı ilə
keçirilən Novruz şənliyi ilə əlaqədar Qazax Rayon Mədəniyyət Mərkəzinin qarşısı
bayramsayağı, Novruz atributları ilə bəzədilib, səmənilər, xonçalar düzülüb,
Novruzun rəmzi olan böyük tonqal çatılıb. Bayram tədbirində Qazax Rayon İcra
Hakimiyyətinin başçısı Rəcəb Babaşov, icra aparatının məsul işçiləri, Azərbaycan
Respublikası Milli Məclisinin Beynəlxalq münasibətlər və parlamentlərarası əlaqələr
komitəsinin sədri Səməd Seyidovun köməkçisi Akif Əmirov, hüquq-mühafizə orqanlarının, idarə, müəssisə və
təşkilatların rəhbərləri, şəhid ailələri, Vətən müharibəsi iştirakçıları,
Qarabağ müharibəsi əlilləri, ictimaiyyət nümayəndələri, minlərlə rayon sakini
iştirak edib. Rayon sakinlərində xoş əhval-ruhiyyə yaradan Novruz
bayramı tədbirinə Dədə Qorqud abidə kompleksinin qarşısından start verilib. Bayramın
atributları sayılan Kosa və Keçəlin, Bahar qızın faytonla yolboyu rayon
sakinlərini salamlaması, zurnaçıların, aşıqların baharı, Azərbaycanı tərənnüm
edən mahnılarının ətrafa yayılması bayram şənliyinə xoş ovqat qatıb. Bugünkü bayram tədbirində Vətən torpaqlarının
azadlığı uğrunda canından keçən şəhidlərimizin də xatirəsi anılıb. Qazax Rayon İcra Hakimiyyətinin başçısı Rəcəb Babaşov,
hüquq-mühafizə orqanlarının rəhbərləri, şəhid ailələri, Vətən müharibəsi
iştirakçıları, qaziləri şəhərin mərkəzində yerləşən Şəhidlər xiyabanını ziyarət
edib, memorial önünə tər qərənfillər düzərək igid Vətən oğullarına olan ehtiramlarını
bildiriblər. Vətənin bütövlüyünü şirin canlarından əziz tutan qəhrəman
oğullarımızın ruhuna dua oxunub, dərin ehtiramla yad olunublar. Sonra Qazax Rayon İcra Hakimiyyətinin başçısı Rəcəb
Babaşov və qonaqlar bayram ovqatlı sərgilərə, bayramsayağı bəzənmiş süfrələrə,
pəhləvanların, idmançıların və uşaqların maraqlı çıxışlarına, əl işlərindən
ibarət nümunələrə, qədim məişət əşyalarına tamaşa ediblər. Adət-ənənələrimizə
uyğun hazırlanmış Novruz təamları ilə tanış olub, ululardan bugünkü nəslə
yadigar qalan qədim el sənətlərinin nümayişinə baxıb, aşıqların ifasında qədim
el havalarını dinləyiblər.
Qazax Rayon Mədəniyyət Mərkəzinin qarşısında davam
edən bayram şənliyində Kosa və Keçəlin zarafatları, Bahar qızın söylədikləri
şeirlər, məzəli əhvalatlar, Novruzla bağlı adətlər, oxunan rəngarəng mahnılar
və müxtəlif rəqslər rayon sakinlərinin sevincinə səbəb olub. Tədbirin aparıcıları, Qazax Dövlət Dram Teatrının
aktyorları Yusif Qoca və Zəmanə Dərviş xalqımızın əsrlərdən
bəri sevinc hissi ilə keçirdiyi Novruz bayramı münasibətilə başda Müzəffər Ali
Baş Komandan İlham Əliyev, Birinci vitse-prezident Mehriban Əliyeva olmaqla
xalqımızı, eləcə də rayon sakinlərini, tədbirə toplaşanları təbrik edib, xoş
arzularını çatdırıblar. Öz gəlişiylə bu gözəl bayramın hər evə, hər ocağa bol ruzi-bərəkət gətirməsini
diləyiblər. Bu Novruzun digərlərindən fərqli olduğunu dilə gətirən aparıcılar indi
Novruz tonqalının əzəli torpağımız olan Qarabağda alovlandığını, Vətən uğrunda
canlarından keçən bacı və qardaşlarımızın ruhlarının şad olduğunu, şəhidlərimizin
qanları bahasına düşmən tapdağından azad edilən Qarabağımızın öz doğma sakinlərinə
qovuşduğunu, indi Xarı bülbülün kövrək deyil, güldüyünü qeyd ediblər. Qazax Rayon İcra Hakimiyyətinin başçısı Rəcəb Babaşov çıxış edərək tədbir iştirakçılarını, xüsusilə də şəhid ailələrini, qazilərimizi
salamlayıb, əlamətdar Novruz bayramı münasibətilə təbrik edib. Rayon rəhbəri bu
dəfə keçirilən Novruz bayramının xüsusilə qeyd edildiyini, qalib xalqın nümayəndəsi
kimi bu Novruzu sevinclə keçirdiyimizi diqqətə çatdırıb. Builki Novruzu belə
yüksək səviyyədə, bayram əhval-ruhiyyəsində qeyd etdiyimizə görə, eləcə də üzərində
gəzdiyimiz torpağa görə şəhidlərimizə borclu olduğumuzu vurğulayıb. Şəhidlərimizə
Allahdan rəhmət, qazilərimizə şəfa diləyib. Bu gün qalib xalq olaraq
qürurlandığımızı, Ali Baş Komandan İlham Əliyevin qalib xalqın Ali Baş
Komandanı olduğunu bildirən icra başçısı buna görə bir daha şəhidlərimizə,
qazilərimizə minnətdar olduğumuzu söyləyib. Bu
gün Qazaxda həm də yeni bir ailənin təməli qoyulub. Vətən müharibəsi
iştirakçısı, "Xocəvəndin azad olunmasına görə medalı” ilə təltif olunan Elməddin
Yusubov sevib-seçdiyi Bənövşə Əhmədova
ilə nikaha daxil olub. Hər kəsin, rayon rəhbərliyinin şahidliyi ilə yeni
qurulan ailənin ünvanına xoş sözlər, təbriklər səslənib. Nikahı rəsmiləşdirən Qazax
Rayon Qeydiyyat Şöbəsinin rəisi Məsumə Səmədova yeni ailə quran gənclərə ailə
xoşbəxtliyi, səadəti arzulayıb. Rayon rəhbərliyi tərəfindən alınan hədiyyəni gənc
ailəyə təqdim edən Vətən müharibəsi şəhidi Babək Həsənovun anası Gülarə Həsənova
da onlara səmimi ürək sözlərini çatdırıb, belə xoş günün bütün qazilərimizə
qismət olmasını arzu edib. Yeni
ailə quran cütlük Novruz tonqalını alovlandırdıqdan sonra "Göyəzən” ansamblının
ifasında səslənən Yallının sədaları altında rəqs olunub. Daha
sonra bayram tədbiri Qazax Rayon Mədəniyyət Mərkəzinin böyük zalında davam
edib. Novruz
bayramı tədbirində pandemiya dövründə səmərəli fəaliyyət göstərən, vaksinasiya prosesində fəal iştirak edən Qazax
Rayon Mərkəzi Xəstəxanası Publik Hüquqi Şəxsin direktoru Məmmədova Sevda Abbas
qızı, Qazax Rayon Səhiyyə İşçiləri Həmkarlar İttifaqı Şurasının sədri Həsənova Sevda
Hüseyn qızı, İkinci Şıxlı kənd Ailə Sağlamlıq Mərkəzinin həkimi Nuriyeva Tünzalə
Nurəddin qızı, Kəmərli kənd Ailə Sağlamlıq Mərkəzinin həkimi Babayeva Lusiya
Sozalı qızı, Qazax Rayon Mərkəzi Xəstəxanası
Publik Hüquqi Şəxsin Qazax Təcili və Təxirəsalınmaz Tibbi
Yardım Stansiyasının
həkimləri Məmmədov Mehman Məmməd oğlu, Gülməmmədov Gülməmməd Qurban oğlu Qazax
Rayon İcra Hakimiyyəti başçısının Fəxri Fərmanı ilə təltif olunublar.
Tədbir
iştirakçılarından Azərbaycan Yazıçılar Birliyi Qazax zona filialının sədri, Əməkdar incəsənət
xadimi, şair Barat Vüsal çıxış edərək milli bayramımız olan Novruz
bayramı münasibətilə tədbir iştirakçılarını təbrik edib, səmimi ürək sözlərini
çatdırıb. Yeni ailə quran gənclərin ünvanına xoş sözlərini çatdıran B.Vüsal
onların belə əlamətdar bir gündə nikaha daxil olmalarını nümunəvi addım kimi
qiymətləndirib. Tədbirin yüksək səviyyədə təşkil olunmasına görə rayon rəhbərliyinə
minnətdarlığını bildirən şair bugünkü tədbirin də əvvəlki tədbirlərin davamı
olduğunu bildirib. Ötən ilin avqustunda Şuşaya etdiyi səfərdən, orada yaşadığı
xoş təəssüratlardan danışan B.Vüsal həmin günün ömrünə yazılan yaddaqalan gün
olduğunu qeyd edib. Şuşadan qayıtdıqdan sonra yazdığı "Dönmüşəm” şeiri ilə fikirlərini
ifadə edən şair hər kəsə Şuşanı görməyi arzulayıb.
Azərbaycan Respublikası Milli Qəhrəmanlarını Tanıtma İctimai
Birliyinin Qazax Rayon Şöbəsinin sədri, şəhid həyat yoldaşı Kifayət Mustafayeva çıxış edərək bayram təbriklərini
çatdırıb. K.Mustafayeva qeyd edib ki, vaxt var idi belə tədbirlərin işğal
altında olan torpaqlarımızda, Qarabağda keçirilməsini arzu edirdik. O gün
reallaşdı və biz buna görə Ali Baş Komandan İlham Əliyevə, şəhidlərimizə, qazilərimizə
borcluyuq. K.Mustafayeva Azərbaycan xalqını Şuşalı edən şəhidlərimizin ailələri
qarşısnda bir şəhid ailəsi olaraq baş əydiyini vurğulayıb.
Vətən müharibəsi şəhidi, ölümündən sonra "Vətən uğrunda",
"Cəbrayılın azad olunmasına görə”, "Qubadlının azad olunmasına görə”, "Laçının
azad olunmasına görə”, "Hərbi xidmətlərə görə” medalları ilə təltif olunmuş qəhrəman
şəhidimiz Babək Həsənovun anası Gülarə
Həsənova çıxış edərək şəhid anası olaraq Azərbaycan xalqının
Novruz bayramını təbrik edib. Mən azərbaycanlı qadın kimi, fəxr edirəm ki, şəhidlərimiz
bizim başımızı uca etdilər. Şəhid analarına üz tutaraq həmişə başlarını uca
tutmalarını, torpaqları qaytararaq özləri torpaqda olan oğulları ilə hər zaman
qürur duymalarını, fəxr etmələrini söyləyib. Şəhid ailələrinə hər zaman göstərilən
qayğıya görə ölkə Prezidenti İlham Əliyeva, Birinci vitse-prezident Mehriban
Əliyevaya, eləcə də rayon rəhbərliyinə minnətdarlığını bildirib. "Xarı bülbül
gülür, biz də gülməliyik”, - deyən şəhid anası Şuşanı ziyarət etməyin ən böyük
arzusu olduğunu qeyd edib.
Ali
Baş Komandanın əmri ilə düşmənin üzərinə qartal tək şığıyan igidlərimizdən biri,
ölümündən sonra "Vətən uğrunda", "Kəlbəcərin azad olunmasına görə” medalları
ilə təltif olunan şəhid gizir Sərxan Abdullayevin atası Elxan Abdullayev çıxış edərək bu gün keçirilən
bayramın əvvəlki bayramlardan daha fərqli olduğunu bildirib. Şəhidlərimizin canı, qanı, qazilərimizin
sağlamlığı bahasına bu gün Novruz bayramını yüksək əhval-ruhiyyə ilə qeyd
etdiyimizi diqqətə çatdırıb. Azərbaycan
xalqını, şəhid ailələrini, qazilərimizi təbrik edən şəhid atası bu günü qeyd
etməyin hər kəsin haqqı olduğunu söyləyib. "Şəhidlərimiz qoymadılar ki, biz Vətənsiz
qalaq. Bu gün onların da ruhu şaddır. Neçə ki, biz birik, heç kəs bizə bata
bilməz”, - deyən şəhid atası Azərbaycan xalqının bundan sonra da həmrəy
olacağını vurğulayıb. S.Abdullayev sonda tədbirin yüksək səviyyədə təşkil
olunmasına görə əməyi keçən insanlara minnətdarlığını bildirib.
Vətən müharibəsi şəhidi, ölümümndən sonra "Azərbaycan
Bayrağı" ordeni, "Vətən uğrunda", "Cəbrayılın azad olunmasına görə”, "Xocavəndin azad olunmasına görə”, "Kəlbəcərin azad olunmasına görə”, "Hərbi xidmətlərə görə” medalları ilə təltif olunmuş şəhid gizir Səbuhi Məmmədovun
anası Cəvahir Bənnayeva çıxış edərək tədbir iştirakçılarının bahar bayramını, Novruz bayramını təbrik edib. "Oğlum Səbuhi
bu bayramı həddindən artıq çox sevirdi. Bütün küçələrdəki tonqalların üstündən
atlayardı. Şəhid anaları başınızı dik tutun, bizim övladlarımız 30 illik
Qarabağ həsrətimizi bizə qaytardılar. Bizim övladlarımız bizim olmayanları bizə
qaytardılar və əbədiyyətə qovuşdular. Şəhidlərimiz bizim cənnətdəki sülh göyərçinlərimizdir.
Cənnətdəki bayramınız mübarək əziz şəhidlərimiz. Bizim evlərimizdə, küçələrimizdə
tonqal yanmasa da, bütün Qarabağımızda tonqallar yanır. Bütün Azərbaycan xalqı
şəhidlərimizə minnətdardır”. Birinci Qarabağ müharibəsi qazisi Nüsrət Musayev çıxış
edərək bir qazi olaraq bütün şəhid ailələrinin qarşısında baş əydiyini söyləyib.
Qalib ölkənin vətəndaşı olaraq bugünkü günü qeyd etməyin qürurunu yaşadığını
qeyd edib. Vətənin, torpağın uğrunda bu gün də canından keçməyə hazır olduğunu
bildirib. Tədbirin yüksək səviyyədə təşkilinə görə rayon rəhbərliyinə, əməyi
keçən hər kəsə minnətdarlığını bildirib. "Bu xalqa qələbə yaraşır”, - deyən N.Musayev
sonda bir daha təbriklərini çatdırıb.
Polkovnik leytenant, Vətən müharibəsi əlili, "Hərbi xidmətlərə
görə”, "Xocavəndin azad olunmasına görə”, "Füzulinin azad olunmasına görə”,
"Şuşanın azad olunmasına görə” medalları ilə təltif olunan Valeh Mustafayev çıxış edərək tədbir iştirakçılarını, şəhid ailələrini,
qazi yoldaşlarını əlamətdar gün münasibətilə təbrik edib. "Şəhid ailələri
qarşısında baş əyirəm”, - deyən V.Mustafayev hər bir şəhid ailəsinin onun üçün əziz
olduğunu bildirib. 44 günlük Vətən müharibəsindən söz açan natiq 2020-ci ilin
27 sentyabrında başlayan həmin müharibədə bütün dünyanın xalq-dövlət-ordu
birliyinin, Ali Baş Komandan İlham Əliyevin ətrafında sıx birləşməyimizin
şahidi olduğunu qeyd edib. Şəhidlərimizin canı, qanı, qazilərimizin sağlamlığı
bahasına Vətən qarşısında olan borcumuzun geri qaytarıldığını vurğulayıb. Müğənnilərdən
Vüsalə Quluyevanın, Elşən Ələkbərovun ifasında səslənən "Yaşa Azərbaycan!”, Zəmanə Dərvişin
ifasında səslənən "İki dövlət, bir millət”, Fariz Namazlının ifasında səslənən
"Xudayar” təsnifi, Nəsimi Aşbazovun ifasında səslənən "Bura Vətəndir”, Rafiq
Abdıyevin ifasında səslənən "Yadıma düşdü”, gənc aşıq Samir Cəlaloğlunun
ifasında səslənən "Bura Qazaxdır oğlum”, Qazax Dövlət Sosial–İqtisadi
Kollecinin II kurs tələbəsi Nəzrin Muradovanın ifasında səslənən "Azərbaycan”, Qazax şəhər 2 nömrəli
Uşaq Musiqi Məktəbinin şagirdlərinin ifasında səslənən "Ey həyat sən nə qəribəsən”,
Qazax şəhər İsmət Qayıbov aadına 3 nömrəli tam orta məktəbin şagirdi Türkan Rəhimovanın
ifasında səslənən "Novruz gəlir, yaz gəlir” mahnıları tədbir iştirakçıları tərəfindən
alqışlarla qarşılanıb. Şuşalı
Azərbaycanımızın Novruz şənliyinə həsr edilmiş bayram tədbiri "Sənsiz
bir an Azərbaycan” mahnısı ilə başa çatıb.
Facebook-da paylaş