Sərhəd kəndi Cəfərlidə Vətən müharibəsi şəhidi leytenant Nicat Nəsibovun adını əbədiləşdirən bulağın açılışı olub
2020-ci il Qələbə və Zəfər ili kimi yaddaşlara əbədi
həkk olundu. Həmin il ki, Prezident, Silahlı Qüvvələrin Müzəffər Ali Baş
Komandanı İlham Əliyevin rəhbərliyi altında şanlı Azərbaycan Ordusu xalqımızın
30 illik Qarabağ həsrətinə son qoydu və bu gün erməni işğalından azad edilən torpaqlarımızda
üçrəngli bayrağımız əvvəlki tək dalğalanır. Bu gün hər birimiz fəxarətlə
söylədiyimiz, qürurlandığımız o tarixi Qələbəni bizlərə bəxş edən Ali Baş
Komandana, hərbçilərimizə, şəhidlərimizə, qazilərimizə borclu və minnətdarıq.
İllər ötsə belə bizlərə 44 günlük haqq savaşında hər gün qələbə sevinci yaşadan
şanlı Azərbaycan Ordusunun əsgər və zabitləri, hərbçiləri, ruhları qarşısında
bir ömür boyu baş əydiyimiz şəhidlərimiz heç vaxt unudulmayacaq. Vətən müharibəsində
qazanılan Qələbədə, xalqımıza yaşadılan zəfər dolu günlərdə payı olan igid
oğullarımızdan biri də şəhid leytenant Nəsibov Nicat Qəşəm oğludur. Noyabrın
10-da qəhrəman şəhidimizin doğulduğu Cəfərli kəndində vaxtilə təhsil aldığı
məktəbin qarşısında adını əbədiləşdirən bulağın açılışı olub. Açılış
mərasimində Qazax Rayon İcra Hakimiyyətinin məsul şəxsləri, rayonun hüquq-mühafizə
orqanlarının, idarə, müəssisə və təşkilatların rəhbərləri, Azərbaycan
Respublikası "Azərbaycan Qarabağ Müharibəsi Əlilləri, Veteranları və Şəhid
Ailələri İctimai Birliyi”nin Qazax rayon filialının, Azərbaycan
Respublikası Müharibə, Əmək və Silahlı Qüvvələr Veteranları Şurasının Qazax
rayon şöbəsinin sədrləri və üzvləri, şəhidimizin vaxtilə təhsil aldığı Mirvarid Dilbazi adına Cəfərli kənd tam orta məktəbinmüəllim
və şagirdləri, Vətən müharibəsi qaziləri, iştirakçıları, şəhid
ailələri, şəhidimizin ailə üzvləri, yaxınları, doğmaları, kənd sakinləri
iştirak ediblər. Şəhidimizin
adına tikilmiş bulağın açılışını bildirən qırmızı lent kəsilərək üzərindəki ağ
örtük qaldırılıb, gül dəstələri düzülüb. Şəhidimizin ruhuna dua oxunub, əziz xatirəsi ehtiramla yad
edilib. Qəhrəman şəhidimizin təltif
olunduğu "İgidliyə görə” medalı anasına təqdim olunub.
Qazax Rayon İcra Hakimiyyətinin başçısı Rəcəb
Babaşov şəhidimizə
Allahdan rəhmət diləyib, əziz xatirəsini ehtiramla yad edib, səmimi ürək
sözlərini çatdırıb. Vətənin azadlığı uğrunda canını fəda edən Nicat
Nəsibov kimi igid Vətən oğullarının döyüşdə göstərdiyi qəhrəmanlığın gələcək
nəsillər üçün örnək olduğunu, Vətən müharibəsində qəhrəmanlıq göstərən
şəhidlərimizi yad etməyin, Nicat kimi oğulları tanıtmağın hər bir
azərbaycanlının mənəvi borcu olduğunu bildirib. İcra başçısı qəhrəman
şəhidlərimizin qəlbimizdə əbədi yaşayacaqlarını qeyd edib. 44 günlük haqq
savaşında tarixi Qələbəni bizlərə bəxş edən Ali Baş Komandana,
hərbçilərimizə, şəhidlərimizə, qazilərimizə borclu və minnətdar olduğumuzu
vurğulayıb. Vətən müharibəsində adlarını tarixə qızıl hərflərlə yazdıran bütün
şəhidlərimiz kimi, Nicat Nəsibovun da Azərbaycan xalqının, qazaxlıların
qəlbində əbədi yaşayacağını, xatirəsinin daim əziz tutulacağını
vurğulayıb. Respublika Prezidenti İlham Əliyev və Birinci vitse-prezident
Mehriban Əliyevanın şəhidlərimizə, şəhid ailələrinə, qazilərimizə göstərdikləri
qayğının hər kəsə örnək olduğunu bildirən icra başçısı həmin qayğının Qazaxda
da hər zaman nümunə götürüldüyünü söyləyib. Şəhid ailələrinə göstərilən qayğının
bundan sonra da olduğu kimi davam etdiriləcəyini qeyd edib. İcra
başçısı açılışına toplaşdığımız bulağı şəhidimizin adının əbədiləşdirilməsi
istiqamətində atılan uğurlu addımlardan biri kimi dəyərləndirib. Bildirib ki,
bu cür bulağın inşa olunmasında əsas məqsəd şəhidimizi gələcək nəsillərə
tanıtmaqdır. Çünki bulağın qarşısından keçən, suyundan içən hər kəs şəhidin
ruhuna dua oxumaqla bərabər, həm də onu tanımış olacaq. Qazax Rayon Təhsil
Şöbəsinin müdir müavini Əziz Məmmədov çıxış edərək çıxış edərək şəhidimizə Allahdan rəhmət
diləyib, əziz xatirəsini ehtiramla anıb. Ali Baş Komandanın rəhbərliyi altında
xalqımızın 30 illik yurd həsrətinə son qoyan şəhidlərimizə, onların ailələrinə
qayğı göstərməyin, sahib çıxmağın hər birimizin borcu olduğunu qeyd edib. Ölkə
Prezidentinin və Birinci vitse-prezidentin şəhid ailələrinə göstərdikləri
qayğının Qazaxda da olduğu kimi davam etdirilməsinə görə ziyalılar adından
rayon rəhbərliyinə minnətdarlığını bildirib. Şəhidlərimizin, onların keçdikləri
döyüş yollarının gələcək nəsillərə çatdırılması, örnək göstərilməsi üçün
ümumtəhsil məktəblərində anım tədbirlərinin keçirildiyini vurğulayıb. Rayon
rəhbərliyinin təşəbbüsü və dəstəyi ilə yazılmış "Qanları
ilə dastan yazanlar" kitabının müəllifi, "Göyəzən”
qəzetinin baş redaktoru, şair-publisist Elçin İsmayıl çıxış
edərək kitab haqqında qısa məlumat verib. Kitabı oxuyan hər kəsin şəhidlərimizi
daha yaxından tanımaq imkanının olduğunu bildirib. 50 qəhrəman şəhidimiz
haqqında yazılmış kitabda şəhidlərimizin necə şərəfli bir yol keçdiklərinin
aydın şəkildə öz əksini tapdığını, kitabı oxuduqca bunun bir daha şahidi
olduğumuzu qeyd edib. Şəmistan Şahvələdov adına Xanlıqlar kənd tam orta məktəbin
biologiya müəllimi Xatın
Hüseynxanova, kənd ağsaqqalı Seyfəddin Vəliyev çıxış edərək qanları ilə dastan yazan Nicat kimi
oğullarımızla fəxr etdiklərini, qəhrəman şəhidlərimizin qəlbimizdə əbədi
yaşayacaqlarını söyləyiblər. Mirvari
Dilbazi adına Cəfərli kənd tam orta məktəbin Azərbaycan dili və ədəbiyyat müəllimi,
şəhidin 5-11 siniflər üzrə rəhbəri Həmidə
Mustafayeva, Azərbaycan dili və ədəbiyyat müəllimi Vilayət Rüstəmov çıxış
edərək şəhidimiz haqqında ürək sözü bildirməyin çətin olduğu qədər də
qürurverici olduğunu bildiriblər. Nicat kimi neçə-neçə oğulların öz qanları ilə
tarix yazdıqlarını, həmin oğullarla qürur duymağın hər birimizin borcu olduğunu
diqqətə çatdırıblar. Nicatın bu gün aramızda olmasa da onun əziz xatirəsinin
daim bizim qəlbimizdə əbədi yaşayacağını qeyd ediblər. Şəhid ailələrinə
göstərilən diqqət və qayğıya görə ölkə başçısına, Birinci vitse-prezidentə,
rayon rəhbərliyinə minnətdarlıqlarını bildiriblər. Sonra Mirvari Dilbazi adına Cəfərli kənd tam orta
məktəbin 7-ci sinif şagirdləri Ayan Mustafayeva, Aysu
Elləzova, Samir Nəbiyev, Rəşid Orucov, 6-cı snif
şagirdi Əfqan Əzizov şəhidlərimizə
həsr olunmuş şeirlər səsləndiriblər.
Şəhid
atası Qəşəm
Nəsibov şəhid ailəsi kimi onlara göstərilən diqqət və qayğıya görə
razılığını bildirərək ölkə Prezidenti İlham Əliyevə, Birinci vitse-prezident Mehriban
Əliyevaya, rayon rəhbərliyinə minnətdarlıq edib. Övladının şəhid olduğu gündən
daim yad olunmasını Nicatın timsalında bütün şəhidlərimizə olan hörmət və
ehtiramın bariz nümunəsi kimi dəyərləndirib. Oğlu Nicatın, eləcə də onun kimi
igid Vətən oğullarının hər zaman fəxr, qürur yeri olacağını söyləyib. Bulağın tikilməsində, ərsəyə gəlməsində
əziyyəti keçən insanlara, açılış mərasimində iştirak edənlərə ailəsi adından
təşəkkürünü çatdırıb. Leytenant Nəsibov
Nicat Qəşəm oğlu 22 yaşında Şəhidlik
zirvəsinə yüksələn Nicat Nəsibov 1 yanvar 1998-ci ildə Qazax rayonunun Cəfərli
kəndində anadan olmuşdur. 2004-cü ildə Mirvarid Dilbazi adına Cəfərli kənd tam
orta məktəbin 1-ci sinifinə daxil olmuş, 2012-ci ildə həmin məktəbin 8-ci
sinifini bitirmişdir. 2012-ci ildə Cəmşid Naxçıvanski adına Hərbi Liseyə daxil
olmuş, 2015-ci ildə həmin liseyi bitirmişdir. 2015-ci ildə Heydər Əliyev adına
Azərbaycan Ali Hərbi Məktəbinə daxil olmuş, 2019-cu ildə həmin hərbi məktəbi
bitirib leytenant rütbəsi ilə "N” saylı hərbi hissədə tağım komandiri vəzifəsində
xidmətə başlamışdır. 2020-ci ildə digər "N” saylı hərbi hissəyə təyinat
almışdır. "N"
saylı hərbi hissədə tağım komandiri vəzifəsində hərbi qayda-qanunlara uyğun şəkildə
xidmət aparır, üzərinə düşən işin öhdəsindən layiqincə gəlirdi. Xidmətini yüksək
səviyyədə həyata keçirdiyi üçün 26 avqust 2018-ci ildə "Azərbaycan Respublikası
Silahlı Qüvvələrinin 100 illiyi (1918-2018)" yubiley medalı ilə təltif
olunmuşdu. Füzuli-Cəbrayıl
bölgəsində Qarabağ uğrunda gedən döyüşlərdə igidlik göstərən Nicat Nəsibov
torpaqlarımızın azadlığını canından üstün tutmuşdur. "N” saylı hərbi hissənin
4-cü taborunun 12-ci bölüyü 1-ci tağımının komandiri leytenant Nicat Nəsibov
18.10.2020-ci il tarixdə Füzuli rayonu istiqamətində gedən döyüşlərdə qəhrəmancasına
vuruşmuş, aldığı qəlpə yarasından şəhid olmuşdur. Şəhid leytenantımız
01.11.2020-ci il tarixdə doğulduğu Cəfərli kənd qəbiristanlığında izdihamla dəfn
edilmişdir. Subay idi. Müzəffər Azərbaycan
Ordusunun şücaətli igidlərindən olan şəhid leytenant Nicat Nəsibov ölümündən
sonra cənab Prezident İlham Əliyevin 15 dekabr 2020-ci il tarixli Sərəncamına əsasən "Vətən uğrunda”, 25 dekabr 2020-ci il tarixli Sərəncamlarına əsasən "Füzulinin azad olunmasına görə”,
"Xocavəndin azad olunmasına görə”, 24 iyun 2021-ci il tarixli Sərəncamlarına əsasən "İgidliyə görə”, "Cəbrayılın azad olunmasına görə” medalları ilə təltif edilmişdir.
GOYEZEN.AZ
Facebook-da paylaş