Qazaxda “Qarabağ” ordenli Vətən müharibəsi şəhidi baş leytenant Nəbi Hüseynovun ildönümü qeyd olunub
2020-ci
ilin 27 sentyabrında başlayan Vətən müharibəsi bir daha sübut etdi ki, ölkə
Prezidenti İlham Əliyevin gücü, siyasi iradəsi sayəsində müstəqil Azərbaycan
milli kimliyi və malik olduğu siyasi potensialı ilə tarixi taleyini həll etməyə
qadir olan bir dövlətdir. 44 günlük Vətən müharibəsi göstərdi ki, Azərbaycan
Müzəffər Ali Baş Komandanımızın rəhbərliyi altında şanlı ordumuzun gücü və
qüdrəti sayəsində üzərinə düşən bütün tapşırıqların öhdəsindən layiqincə gələ
bilər. "Qarabağ Azərbaycandır!” deyərək haqq savaşına çıxan və 30 illik həsrətə
son qoyan Azərbaycan Ordusunun əsgər və zabitləri, hərbçiləri bizlərə uzun
illər yaddaşlara əbədi həkk olunacaq şanlı bir Zəfər bəxş etdilər. Qanları,
canları bahasına müstəqil Azərbaycanın bundan sonra da bütün dünyaya günəş kimi
doğması üçün Silahlı Qüvvələrin Ali Baş Komandanı İlham Əliyevin ətrafında
yumruq kimi birləşdilər. Ali Baş Komandanın "İrəli!” əmrini layiqincə yerinə
yetirərək hərb tariximizə illərdir ki, arzusunda olduğumuz Qələbə Zəfərini
yazdılar. Torpaqlarımızın
qorunması, vətənimizin müdafiəsi uğrunda canından, qanından keçərək Şəhidlik
zirvəsinə ucalmaq ən böyük şərəf və qürurdur. Şəhidlik zirvəsinə ucalanların
xatirəsini yaşatmaq, onları gəncliyə nümunə göstərmək isə hər kəsin vətəndaşlıq
borcudur. Azərbaycanın
müstəqilliyini və ərazi bütövlüyünü hər şeydən üstün tutan, bu yolda ən uca
zirvəyə - Şəhidlik məqamına yüksələn igid Vətən oğullarından biri də baş leytenant
Hüseynov Nəbi Hacıbala oğludur. Döyüşdə göstərdiyi qəhrəmanlığa görə ölkə
Prezidenti İlham Əliyev tərəfindən ölümündən sonra "Qarabağ”
ordeni, "Vətən uğrunda”, "Cəbrayılın azad olunmasına görə”, "Xocavəndin azad
olunmasına görə”, "Kəlbəcərin azad olunmasına görə" medalları ilə
təltif olunmuş igid Vətən oğlunun bu
gün uğrunda canını fəda etdiyi torpağa tapşırıldığı gündən 1 il ötür. Bu
gün "Qarabağ” ordenli şəhidimizin doğulduğu Birinci Şıxlı kəndində ildönümü qeyd olunub. İldönümü mərasimində Qazax
Rayon İcra Hakimiyyətinin başçısı Rəcəb Babaşov, icra aparatının məsul
şəxsləri, Azərbaycan Respublikası Milli Məclisinin Beynəlxalq
münasibətlər və parlamentlərarası əlaqələr komitəsinin sədri, millət vəkili
Səməd Seyidov, köməkçisi Akif Əmirov, rayonun hüquq-mühafizə
orqanlarının, idarə, müəssisə və təşkilatların rəhbərləri, Azərbaycan
Respublikası "Azərbaycan Qarabağ Müharibəsi Əlilləri, Veteranları və Şəhid
Ailələri İctimai Birliyi”nin Qazax rayon filialının, Azərbaycan
Respublikası Müharibə, Əmək və Silahlı Qüvvələr Veteranları Şurasının Qazax
rayon şöbəsinin sədrləri və üzvləri, şəhidimizin vaxtilə təhsil aldığı Musa
Həsənov adına Birinci Şıxlı kənd tam orta məktəbin direktoru Məzahir Qocayev və
müəllim-şagird kollektivi, şəhid ailələri, şəhidimizin ailə üzvləri, yaxınları,
doğmaları, kənd sakinləri iştirak ediblər. İgid Vətən oğlunun kənd qəbiristanlığında
yerləşən məzarı ziyarət olunub, tər qərənfillər düzülərək ruhuna
dua oxunub, əziz xatirəsi böyük ehtiramla yad edilib. Qəhrəman şəhidimizin
təltif olunduğu "Cəbrayılın azad olunmasına görə” medalı məzarı başında atasına təqdim
olunub. Qazax Rayon İcra
Hakimiyyətinin başçısı Rəcəb Babaşov çıxış edərək şəhidimizə
Allahdan rəhmət, ailəsinə səbir diləyib. 44 günlük Vətən müharibəsindən söz
açan icra başçısı Ali Baş Komandan İlham Əliyevin rəhbərliyi altında həmin
müharibədə qazanılan şanlı Qələbədə baş leytenant Nəbinin də payı olduğunu
bildirib. Qəhrəman şəhidimizin keçdiyi döyüş yolundan, göstərdiyi şücaətdən söz
açan icra başçısı illər keçsə də Nəbi kimi qəhrəmanlarımızın unudulmayacağını
vurğulayıb. "Bu gün Nəbi bizim
aramızda olmasa da o, yaşadığı qısa ömrünə yüz ilin qəhrəmanlığını sığdırdı.
Vətənin ərazi bütövlüyünü canı, qanı bahasına qorudu, düşmən tapdağında qalan
torpağımızı canından keçərək azad etdi. Nəbinin döyüş yoluna, aldığı orden və
medallara nəzər salarkən onunla fəxr edib, qürurlanmamaq mümkün deyil. Nəbi Şəhidlik
adlı elə bir şərəfli yolu seçdi ki, onun tutduğu amal, getdiyi yol bu gün hər
birimizə örnəkdir”, - deyən icra başçısı belə igid Vətən oğulları ilə illər
keçsə belə hər zaman qürur duyulacağını dilə gətirib. Rayon rəhbəri Vətən
müharibəsində Şəhidlik zirvəsinə ucalan Qazaxın igid oğullarının sırasında
dayanan Nəbinin təkcə qazaxlıların, doğma el-obasının deyil, bütöv
Azərbaycanın, işğaldan azad etdikləri torpaqların övladı olduğunu, onunla hər kəsin
fəxr etdiyini bildirib. Savaşda əldə etdiyimiz şanlı Qələbəyə görə Ali Baş
Komandana, müzəffər Azərbaycan Ordusuna, şəhidlərimizə, qazilərimizə borclu
olduğumuzu bir daha söyləyib.
"Ölkə Prezidentinin də
söylədiyi kimi, şəhid ailələrinin bizim qayğımıza, diqqətimizə ehtiyacı var. Bizim
də hər zaman borcumuzdur ki, həmin qayğını onlara hiss etdirək, dəstəyimizi
onlardan əsirgəməyək. Əgər bu gün Ali Baş Komandan İlham Əliyev, Birinci
vitse-prezident Mehriban Əliyeva şəhid ailələrinə, qazilərimizə yüksək
səviyyədə qayğı göstərirsə, onlara dayaq olursa, şəhid ailələrinin
qazilərimizin qarşısında baş əyirəm söyləyirsə, bu, hər kəsə örnək olmalıdır”,
- deyən icra başçısı Qazaxda bu amilin hər zaman əsas götürüldüyünü qeyd edib.
Şəhid ailələrinə, qazilərimizə göstərilən qayğının bundan sonra da yüksək
səviyyədə olacağını vurğulayıb. İcra başçısı Qazaxda bütün
şəhidlərimiz kimi, Vətən müharibəsi şəhidlərinin adlarının əbədiləşdirilməsi
istiqamətində görülən işlərdən söz açaraq Qazax Rayon İcra Hakimiyyətinin
təşəbbüsü və dəstəyi ilə "Göyəzən” qəzetinin baş redaktoru, şair-publisist
Elçin İsmayıl tərəfindən yazılmış "Qanları ilə
dastan yazanlar" kitabını, Qazax Tarix-Diyarşünaslıq
Muzeyində 338 nəfər şəhidin şəkillərindən ibarət guşənin
yaradılmasını, şəhərin mərkəzində yerləşən Şəhidlər xiyabanında Vətən
müharibəsi şəhidlərinin şəkli əks olunmuş lövhələrin vurulmasını, bundan əlavə,
şəhərin N.Nərimanov küçəsində şəhidlərin xatirələrini əbədiləşdirən Abidə
Kompleksinin yaradılmasını həmin işlərin bariz nümunəsi kimi qeyd edib. Bu
gün həmin Abidə Kompleksinin Şəhidlər xiyabanından sonra hər kəsin ziyarət
etdiyi müqəddəs ünvana çevrildiyini bildirib. Azərbaycan
Respublikası Milli Məclisinin Beynəlxalq münasibətlər və
parlamentlərarası əlaqələr komitəsinin sədri Səməd Seyidov çıxış edərək şəhidimizə
Allahdan rəhmət, ailəsinə səbir diləyib. Bir vətəndaş olaraq hər kəs kimi bütün
şəhidlərimizin ruhu qarşısında baş əydiyini qeyd edib. "Elə bir oğul
böyütmüsünüz ki, onun adı Azərbaycan durduqca, var olduğu müddətcə yaşayacaq.
Nəbi kimi qəhrəmanlarımız öz həyatlarını bizlərə, gələcək nəsillərə
bağışladılar. Bizlərin də onları unutmağa haqqımız yoxdur”, - deyən millət
vəkili Nəbinin, onun kimi igid Vətən oğullarının daim bizim qəlbimizdə əbədi
yaşayacaqlarını bildirib. Qazaxda Vətən müharibəsi şəhidlərinin adlarının
əbədiləşdirilməsi istiqamətində görülmüş işləri, igid Vətən oğulları haqqında
yazılan kitabı, yaradılan guşəni, Abidə Kompleksini yüksək qiymətləndirən
millət vəkili bütün bu işlərin arxasında ölkə başçısının, Birinci
vitse-prezidentin şəhidlərimizə verdikləri dəyərin, onların ailələrinə
göstərdikləri qayğının dayandığını qeyd edib. Həyata keçirilən bu işlərə görə
rayon rəhbərliyinə razılığını ifadə edib, minnətdarlığını bildirib. Sonra Musa Həsənov adına Birinci Şıxlı kənd tam orta məktəbin şagirdləri şəhidimizə həsr olunmuş şeirlər səsləndirib, igid Vətən oğluna olan ehtiramlarını bildiriblər. Daha sonra rayon
rəhbəri və qonaqlar igid Vətən oğlunun ata ocağına gələrək torpaq uğrunda
canından keçən şəhidimizə bir daha Allahdan rəhmət, ailəsinə səbir diləyib,
əziz xatirəsini ehtiramla yad ediblər.
Şəhidimizin atası Hacıbala Hüseynov öz ailəsinin, el-obasının adını uca edən qəhrəman övladı ilə fəxr etdiyini söyləyib.
Şəhid ailəsi kimi
hər zaman onlara göstərilən diqqət və qayğıya görə ölkə Prezidenti İlham Əliyevə,
Birinci vitse-prezident Mehriban Əliyevaya və rayon rəhbərliyinə minnətdarlığını
bildirib. Oğlunun xatirəsinin əziz tutulmasını, daim yad olunmasını Nəbinin timsalında
bütün şəhidlərimizə olan hörmət və ehtiramın, qayğının bariz nümunəsi kimi qiymətləndirib. Baş leytenant
Hüseynov Nəbi Hacıbala oğlu Şəhid Nəbi Hüseynov 9 iyul 1992-ci ildə
Qazax rayonunun Birinci Şıxlı kəndində anadan olmuşdur. 1998-ci ildə Musa Həsənov
adına Birinci Şıxlı kənd tam orta məktəbin 1-ci sinifinə daxil olmuş, 2006-cı
ildə həmin məktəbin 8-ci sinifini bitirmişdir. Elə həmin il Cəmşid
Naxçıvanski adına Hərbi Liseyə daxil olmuşdur. 2006-2010-cu illərdə həmin hərbi məktəbdə təhsil
almışdır. 2010-cu ildə Heydər Əliyev adına Azərbaycan Ali
Hərbi Məktəbinə daxil olmuşdur. 2014-cü ildə həmin məktəbi
bitirdikdən sonra bir il Silahlı Qüvvələrin Təlim və Tədris Mərkəzində (TTM)
olmuş, hərbi sahədəki biliyini daha da mükəmməlləşdirmiş, təcrübəsini daha da
artırmışdır. Xüsusi Təyinatlı Qüvvələrin "N” saylı hərbi
hissələrində xidmət edən Nəbi qrup komandirinin müavini olmuşdur. Baş leytenant
Nəbi Hüseynov 09.10.2020-ci ildə Füzuli-Cəbrayıl-Xocavənd rayonları istiqamətində
gedən döyüşlərdə düşmənin hücumunun qarşısını alarkən qəhrəmancasına şəhid
olmuşdur. 09.10.2020-ci il tarixdə Birinci Şıxlı kənd
qəbiristanlığında izdihamla dəfn edilmişdir. Subay idi.
İkinci
Qarabağ müharibəsində Vətən uğrunda canlarından keçən bütün şəhidlərimizlə
yanaşı, baş leytenant Nəbi Hüseynovun da göstərdiyi qəhrəmanlıq, igidlik ölümündən sonra ölkə başçısı tərəfindən
yüksək qiymətləndirilmişdir. İlk dəfə cənab Prezident İlham Əliyevin 9 dekabr 2020-ci il tarixli Sərəncamına əsasən "Qarabağ” ordeni ilə təltif edilən Nəbi daha sonra dörd medala da
layiq görülmüşdür. Nəbi Hüseynov ölkə Prezidentinin
15 dekabr 2020-ci il tarixli Sərəncamına əsasən "Vətən uğrunda”, 24 dekabr 2020-ci il
tarixli Sərəncamına əsasən "Cəbrayılın azad olunmasına görə”, 24
iyun 2021-ci il tarixli Sərəncamlarına əsasən "Xocavəndin azad olunmasına görə” və "Kəlbəcərin azad olunmasına görə" medalları ilə
təltif olunmuşdur.
Facebook-da paylaş