İcra başçısı rayon prokuroru ilə birlikdə sərhəd kəndi olan Quşçu Ayrımda sakinlərin müraciətinə yerində baxıb
Bu gün Qazax Rayon İcra Hakimiyyətinin başçısı Rəcəb Babaşov Rayon Prokuroru Rauf Gözəlovla birlikdə
sərhəd kəndi olan Quşçu Ayrımda bir qrup kənd sakini ilə görüşüb, onların qayğıları
ilə maraqlanıb. "Sərhəddə yaşayan sakinlər
hər cür diqqət və qayğıya layiqdir. Düşmən gülləsinin qabağında hər zaman mətin
dayanan, öz ata-baba yurdlarını bir an olsun belə tərk etməyən bu cür insanlara
qayğı ilə yanaşmaq hər bir dövlət məmurunun borcudur”, - deyən rayon rəhbəri
həmişə olduğu kimi, bundan sonra da onların yanında olacağını bildirib. İcra başçısı rayonun sərhəd kəndləri olan Quşçu
Ayrım, Məzəm, Fərəhli, Cəfərli və Bala Cəfərli kəndlərində yaşayan
sakinlərin hər zaman qayğı ilə əhatə olunduqlarını və bu günə kimi onlar
tərəfindən qaldırılan hər bir məsələyə həssaslıqla yanaşıldığını bildirib. Ölkə başçısı
İlham Əliyevin istər məcburi köçkün ailələrinə, istərsə də sərhəddə yaşayan
insanlara göstərdiyi diqqət və qayğıdan söz açan rayon rəhbəri bu amilin
Qazaxda da əsas götürüldüyünü vurğulayıb. Rayon rəhbəri fəaliyyətə başladığı ilk gündən
sərhəd kəndlərini daim diqqətdə saxladığını, sakinlərlə mütəmadi olaraq
görüşdüyünü diqqətə çatdırıb. Kənd sakinləri
ilə səmimi söhbət edən icra başçısı daha sonra onların qayğıları ilə maraqlanıb.
Sakinlərin kənndə su təminatının
yaxşılaşdırılması məqsədilə göldə qoyulmuş su nasosunun sıradan çıxması və təmir
olunması ilə bağlı müraciətlərini dinləyən rayon rəhbəri məsələnin qısa bir
vaxtda aradan qaldırılmasını bildirib. Qeyd edilən məsələnin müsbət həll
olunması istiqamətində Qazax Rayon
Suvarma Sistemləri İdarəsinin rəisi Məhəd Vəkilova aidiyyatı üzrə
müvafiq tapşırıqlarını verib. Sakinlərin
kənddaxili ara yollara çınqıl döşənməsi ilə bağlı istəyini dinləyən icra
başçısı bu məsələyə də həssaslıqla yanaşılacağını söyləyib. Rayon Prokuroru Rauf Gözəlov vətəndaşlara göstərilən yüksək dövlət
qayğısına görə rayon rəhbərliyinə minnətdarlığını bildirib. İstər ötən gün sakinlərlə
olan görüşdə, istərsə də bugünkü görüşdə bunun bir daha şahidi olduğunu, məhz göstərilən
bu qayğı sayəsində heç bir sosial problemin olmadığını, qaldırılan hər bir məsələnin
həlli istiqamətində əməli işlər görüldüyünü qeyd edib. Kənd sakinlərindən Dursun Mirzəyev,
İbrahim Xəlil, Rəsul Rüstəmov və başqaları onlara göstərilən diqqətə, qayğıya görə ölkə
Prezidenti İlham Əliyevə minnətdarlıqlarını bildiriblər. Rayonda bütün
sahələrdə vətəndaş amilinin əsas götürülməsinə, qaldırdıqları məsələlərin həlli
istiqamətində görülmüş işlərə görə rayon rəhbərliyinə razılıqlarını ifadə
ediblər. GOYEZEN.AZ
Facebook-da paylaş