İcra başçısı sərhəddə yerləşən Məzəm və Quşçu Ayrım kəndlərində olub
Dekabrın 17-də saat 20:30 radələrindən başlamaqla
Ermənistan Silahlı Qüvvələrinin Noyemberyan rayonunun Koti və Boqanis kəndlərinin
yaxınlığındakı döyüş mövqelərindən "Qazax” əlahiddə sərhəd diviziyasının Qazax
rayonunun Quşçu Ayrım və Fərəhli kəndləri
istiqamətindəki sərhəd döyüş məntəqələri və kənd sakinlərinin yaşayış evləri
intensiv atəşə tutulub. Düşmən bölmələrinin atəş nöqtələrinə qarşı cavab atəşi
açılmışdır. Bu
gün Qazax Rayon İcra Hakimiyyətinin başçısı Rəcəb Babaşov rayonun
hüquq-mühafizə orqanlarının rəhbərləri, icra aparatının məsul şəxsləri ilə
birlikdə dünən düşmən tərəfindən atəşə tutulan Quşçu Ayrım kəndində olub, sakinlərlə
görüşüb. "Sərhəddə
yaşayan sakinlər hər cür diqqət və qayğıya layiqdir. Düşmən gülləsinin
qabağında mətin dayanan, öz ata-baba yurdlarını bir an olsun belə tərk etməyən
bu cür insanlara qayğı ilə yanaşmaq hər bir dövlət məmurunun borcudur”, - deyən
rayon rəhbəri hər zaman onların yanında olduğunu bildirib. İcra başçısı qeyd
edib ki, bu gün necə ki, Qazax rayonunun işğal altında olan Bağanıs Ayrım, Barxudarlı, Sofulu, Xeyrımlı, Qızılhacılı, Yuxarı Əskipara,
Aşağı Əskipara kəndlərindən olan məcburi köçkünlərimizin qayğılarını
diqqət mərkəzində saxlayırıq, eləcə də sərhəddə yerləşən kəndlərdə yaşayan
insanlarımıza da o cür qayğı ilə yanaşırıq. İcra başçısı bu gün rayonda sərhəd kəndləri olan Quşçu Ayrım, Məzəm, Fərəhli, Cəfərli və Bala Cəfərli kəndlərində yaşayan sakinlərin hər zaman qayğı ilə
əhatə olunduqlarını vurğulayıb. Ölkə başçısı
cənab İlham Əliyevin istər məcburi köçkün ailələrinə, istərsə də sərhəddə
yaşayan insanlara göstərdiyi diqqət və qayğıdan söz açan rayon rəhbəri bu
amilin Qazaxda da olduğu kimi icra olunduğunu bildirib. Rayon rəhbəri fəaliyyətə
başladığı ilk gündən digər sərhəd kəndləri kimi Quşçu Ayrım və Məzəm kəndlərini də daim diqqətdə
saxladığını, sakinlərlə mütəmadi olaraq görüşdüyünü diqqətə çatdırıb.
"Özümə borc bildim ki, bu gün
gəlim sizinlə görüşüm və qayğılarınızla maraqlanım”, - deyən icra başçısı kənd sakinləri ilə səmimi
söhbət edib. Dünən baş vermiş atışmadan söz açan rayon rəhbəri bu gün sərhədlərimizin
keşiyində mətin dayanan "Qazax” əlahiddə sərhəd diviziyasının əsgər və
zabitlərinin ayıq-sayıqlığı sayəsində düşmənə layiqli cavabın verildiyini bildirib. Bu gün
Ali Baş Komandan İlham Əliyevin irəli əmrinə hazır olan güclü ordumuzun, sərhədçilərimizin
torpaqlarımızı, xüsusilə də sərhədlərimizi layiqincə qoruduğunu, sakinlərin təhlükəsizliyinin
tam təmin olunduğunu qeyd edib. Kənd sakinlərindən şəhid atası
Abbas Mirzəyev, Misir Dünyamalıyev kənd sakinləri adından çıxış edərək ürək
sözlərini bildiriblər. "Bu gün biz əminik ki, dövlətimiz, ölkə rəhbərimiz bizim
arxamızdadır. Ən əsası da düşmənin bir gülləsinə 5 güllə ilə cavab verməyi,
düşmənin hər bir həmləsini dəf etməyi bacaran bu cür ordumuz, sərhədçilərimiz
var”, - deyən sakinlər dünənki atışmaya baxmayaraq kənddə normal həyat tərzinin
olduğu kimi davam etdiyini, hər şeyin öz axarında olduğunu qeyd ediblər. Son 3 ildə
sərhəd kəndlərində sakinlərin təhlükəsizliyinin təmin olunması istiqamətində
görülən işlərdən danışan sakinlər bunun bariz nümunəsi kimi Məzəm və Quşçu
Ayrımda istinad divarlarının çəkilməsini göstəriblər. Bu günə kimi Məzəmdə 57 evin qarşısına 2530 p/m uzunluğu və 3 metr
hündürlüyü olan istinad divarlarının çəkilməsini, bundan əlavə, sakinlərin
xahişini nəzərə alaraq daha 5 evin qarşısına 88 p/m uzunluğunda istinad divarının
çəkilməsinin nəzərdə tutulmasını, eyni zamanda kəndə rahat və təhlükəsiz şəraitdə
gedib-gəlmək üçün ötən illərdə yol kənarına çəkilən istinad divarının çəkilişinin
bu il də davam etdirilməsini kənd camaatının təhlükəsizliyinin təmin olunması istiqamətində görülən məqsədyönlü işlər kimi qiymətləndiriblər. Sakinlərlə səmimi söhbət edən rayon rəhbəri sonra dünən baş vermiş atışma zamanı zərər çəkmiş evlərə baxış keçirib, ev sahibləri ilə də görüşüb.
Onların qayğıları ilə maraqlanaraq hər bir vətəndaşın diqqət mərkəzində
olacağını bildirib. Daha sonra rayon rəhbəri Məzəm kəndində olub, burada yaşayan sakinlərlə
görüşüb, onları narahat edən məsələlərlə də maraqlanıb. Şəhid anası Tamella
Süleymanova başda ölkə başçısı olmaqla rayon rəhbərliyinə onlara göstərdiyi
qayğıya görə minnətdarlıq edib. Bugünkü görüşü onlara olan diqqətin, səmimi münasibətin
əyani sübutu kimi qeyd edib.
GOYEZEN.AZ
Facebook-da paylaş