Millət vəkili Səməd Seyidovdan nümunəvi addım
Vətənimizin, torpaqlarımızın müdafiəsi, xalqımızın azadlığı uğrunda
canından, qanından keçərək Şəhidlik zirvəsinə ucalmağı özlərinə ən böyük şərəf
sayan oğullarımızı yad etmək, onların ailəsinə sahib çıxmaq, qayğı ilə yanaşmaq
hər birimizin vətəndaşlıq borcu olmalıdır. Bizlər üçün ölümün gözünə dik
baxaraq Şəhidlik zirvəsinə yüksələn igid Vətən oğullarının yarımçıq qalan
arzularını elə bizlər həyata keçirməliyik. Şəhidlərimizin ailələri, övladları
az da olsa mənəvi rahatlıq tapsın deyə bizlər şəhidlərimizin yoxluğunu onlara
hiss etdirməməliyik. Hər birimiz bu yolda səfərbər olmalı, əlimizdən gələni əsirgəməməliyik.
Atdığımız addımla, etdiyimiz kiçik bir işlə onların könlünü oxşamağa
çalışmalıyıq. Necə ki, Azərbaycan Respublikası Milli Məclisinin
Beynəlxalq münasibətlər və parlamentlərarası əlaqələr komitəsinin sədri, millət
vəkili Səməd Seyidov öz nümunəvi addımı ilə bunu bir daha nümayiş etdirdi. Millət vəkili Səməd
Seyidovun Tovuz döyüşlərində düşmən hücumunun qarşısını
alarkən qəhrəmancasına şəhid olan mayor Əhmədov Namiq Hajan oğlunun evində olarkən övladlarına verdiyi sözü
tutması, onların yeni evinə televizor hədiyyə etməsi bir daha göstərdi ki,
şəhidlərimizin xatirəsi heç vaxt unudulmur, onların ailələri hər zaman yad
olunur.
Bu gün millət
vəkilinin köməkçisi Akif Əmirov Yuxarı
Salahlı kəndində olub, şəhidimizin atası Hajan Əhmədovla görüşüb və Səməd
Seyidovun səmimi salamlarını, ürək sözlərini çatdırıb. Daha sonra Səməd
müəllimin şəhidimizin övladlarına hədiyyə etdiyi televizoru ona təqdim edib. Övladı ilə hər zaman fəxr
etdiyini bildirən şəhid atası Hajan Əhmədov Vətən uğrunda canından keçən bütün
şəhidlərimizə Allahdan rəhmət diləyib. Övladının ailəsinə göstərilən qayğıya
görə başda ölkə başçısı olmaqla, rayon rəhbərliyinə və Səməd müəllimə minnətdarlığını
bildirib. Əhmədov
Namiq Hajan oğlu 8 noyabr 1984-cü ildə Qazax rayonunun Yuxarı Salahlı kəndində
anadan olmuşdur. 1991-ci ildə şəhid Zahid Mahmudov adına Yuxarı Salahlı kənd
tam orta məktəbin birinci sinfinə daxil olmuş, 2002-ci ildə həmin məktəbi yaxşı
qiymətlərlə bitirmişdir. 2002-ci ildə Heydər Əliyev adına Ali Hərbi Məktəbinə
daxil olmuş, 2006-cı ildə həmin məktəbi bitirərək artilleriya ixtisasına
yiyələnmişdir. 2007-ci ildə Silahlı Qüvvələrin Təlim Tədris Mərkəzində
zabit kursunda oxuduqdan sonra Azərbaycan Respublikası Müdafiə Nazirliyinin N
saylı hərbi hissəsində zabit kimi xidmətə başlamışdır. O, Aprel döyüşlərində fəal
iştirak etmiş və Aprel döyüşlərindən sonra Fəxri Fərmanla təltif olunmuş, ona
vaxtından əvvəl mayor rütbəsi verilmiş və N saylı hərbi hissənin komandiri vəzifəsinə
irəli çəkilmişdir. 2020-ci il iyulun 13-dən
14-nə keçən gecə və səhər saatlarında Azərbaycan-Ermənistan dövlət sərhədinin
Tovuz rayonu istiqamətində gedən şiddətli döyüşlər zamanı düşmən hücumunun
qarşısını alarkən döyüşdə Azərbaycan Ordusunun hərbi qulluqçusu, mayor Əhmədov
Namiq Hajan oğlu da qəhrəmancasına şəhid olmuşdur. Şəhid Namiq Əhmədov iyulun
14-də doğulub boya-başa çatdığı Yuxarı Salahlı kəndində böyük izdihamla kənd qəbiristanlığında
torpağa tapşırılmışdır. Şəhidimiz ailəliydi, bir qız və bir oğlan övladı
yadigar qalıb. GOYEZEN.AZ
Facebook-da paylaş