Aqroparklar ərzaq təhlükəsizliyinin əsas təminatçısına çevrilir
Son illər
həyata keçirilən islahatlar həm ölkənin sosial-iqtisadi inkişafında, həm də
iqtisadiyyatın neft amilindən asılılığının azaldılmasında mühüm rol oynayır.
Dövlət başçısı İlham Əliyevin kənd təsərrüfatının inkişafı ilə bağlı imzaladığı
çoxsaylı sərəncam və fərmanlara əsasən bu gün aqrar sektorda elə bir sahə
yoxdur ki, orada inkişaf olmasın. Əhalinin
ərzaq təminatında başlıca rolu olan aqroparkların yaradılması isə bu inkişafa
dinamik xarakter verir. Məhz bunun nəticəsidir ki, artıq qısa vaxt ərzində ölkə
ərazisində 21 aqropark fəaliyyətə başlamışdır. İlin sonunadək isə onların
sayının 50-yə çatdırılması nəzərdə tutulur. Qazax
rayonunda da geniş ərazini əhatə edən aqropark salınmış və onun inkişafı
istiqamətində xeyli iş görülmüşdür. İkinci Şıxlı kəndində "İnvestel GROUP”
MMC tərəfindən yaradılan aqropark həm kənd təsərrüfatının inkişafı, həm də yeni
iş yerlərinin açılması baxımından olduqca böyük əhəmiyyətə malikdir. Parkın
torpaq sahələrinin suvarılması üçün 13,5 kilometr məsafədən su və bunun davamı
kimi sahədaxili suvarma məqsədilə uzunluğu 18 kilometr olan yeraltı suvarma
xətləri çəkilmişdir. Bundan əlavə, aqropark daxilində sahəsi 1600 kvadratmetr
olan anbar, tutumu 2670 ton olan çoxfunksiyalı soyuducu anbar, ikimərtəbəli
inzibati ofis binası tikilmiş, texnikaların saxlanması üçün böyük talvar
quraşdırılmışdır. Aqroparkın
elektrik təchizatı üçün isə 13,2 kilometr uzunluğunda hava xətti çəkilmiş,
müxtəlif güclü 4 transformator, həmçinin 3 nasos quraşdırılmışdır. Su ilə
təminata gəldikdə, bu sahədə də az işlər görülməmişdir. Belə ki, Xram çayı
sahilində sahilbərkitmə işləri görülərək irihəcmli nasos stansiyası və
suqəbuledici inşa edilmiş, torpaqların su ilə davamlı təminatı üçün 2-ci və
3-cü pillə nasos stansiyalarının yanında hər birinin həcmi 4500 kubmetr olmaqla
beton örtüklü 2 su anbarı inşa edilmişdir. Aqroparkın
idarə işləri üzrə şöbə müdiri Seymur Əhmədov söhbət zamanı dedi ki, həyata
keçirilən tədbirlər nəticəsiz qalmır. "Cari il 300,05 hektarda kartof, 463
hektarda buğda, 140,1 hektarda arpa, 5 hektarda noxud, 5 hektarda yazlıq, 20
hektarda payızlıq yerkökü, 74,7 hektarda qarğıdalı, 44,50 hektarda isə soya
əkmişik. Artıq taxıl biçini başa çatmışdır. Hazırda kartof və yerkökü yığılır.
Yığılan məhsullar çeşidlənərək soyuducu anbarlara vurulur”. Sabir ƏLİYEV, "Azərbaycan” qəzetinin bölgə müxbiri 24 avqust 2019-cu il
Respublika
mətbuatı Qazax haqqında
Facebook-da paylaş