• Təqvim

  • Unutma

  • Maraq



Qazaxlı gənclər Vətən müharibəsi şəhidi İlkin Əliyevin məzarını ziyarət ediblər

Şəhidlərimizi tanıyaq və tanıdaq-------------------------------------------------


2020-ci ilin 27 sentyabrı Azərbaycan xalqının yaddaşına bizi böyük Qələbəyə, Zəfərə aparan yolun başlanğıc tarixi kimi yazıldı. İllər ötsə belə həmin gün heç vaxt unudulmayacaq. 30 illik həsrətdən sonra bizi Qarabağımıza, işğalda olan torpaqlarımıza qovuşduran 44 günlük Vətən müharibəsi və müharibənin başlandığı 27 sentyabr günü hərb tariximizin şanlı salnaməsi kimi daim öyrəniləcək. Vətəndaş olaraq Qarabağımızı, Şuşamızı, eləcə də işğalda olan digər torpaqlarımızı düşmən tapdağından azad edən Silahlı Qüvvələrin Müzəffər Ali Baş Komandanı İlham Əliyevə, əsgər və zabitlərimizə minnətdar olmalı, qanları ilə dastan yazan şəhidlərimizin ruhları qarşısında baş əyməliyik. Vətən naminə döyüşən və yaralanan qazilərimizlə, canlarından keçən şəhidlərimizlə hər zaman qürur duymalı, onları tanımalı və tanıtmalıyıq.

Qazax Rayon Gənclər və İdman İdarəsinin əməkdaşları və könüllüləri də Vətən uğrunda canından keçən şəhidlərimizi hər zaman yad edir, əziz xatirələrini dərin ehtiramla anırlar.  

Öz ənənəsinə sadiq qalan gənclər bu dəfə oktyabrın 13-də Vətən müharibəsi şəhidi əsgər Əliyev İlkin Bəxtiyar oğlunun məzarını ziyarət edib, qəhrəman şəhidimizin məzarına tər qərənfillər düzərək əziz xatirəsini ehtiramla anıblar.






 

Şəhidimizin doğulub boya-başa çatdığı Canalı kəndində ata ocağında olub, şəxsi əşyalarından, şəkillərindən ibarət guşə ilə tanış olaraq igid Vətən oğluna olan ehtiramlarını bildiriblər.  







Qazax Rayon Gənclər və İdman İdarəsinin rəisi Vüqar Nəbiyev çıxış edərək qeyd edib ki, 44 günlük Vətən müharibəsi dünya ictimaiyyətinə Azərbaycan Ordusunun nə qədər qüdrətli ordu olduğunu bir daha nümayiş etdirdi. V.Nəbiyev bildirib ki, bütün dünya 44 günlük müharibədə şahidi oldu ki, Azərbaycan Ordusu bu döyüşlərdə necə peşəkarlıq, qəhrəmanlıq və məharət göstərdi. 44 günlük Vətən müharibəsi öz ordusu haqqında yalanlar, miflər uyduran Ermənistanın təbliğatına ciddi zərbə vurdu və yenilməz Ermənistan ordusu mifini darmadağın etdi.

Qazax Rayon Gənclər və İdman İdarəsinin müavini Sahib Namazov, şəhidin məşqçi-müəllimi Tariyel Nəsibov, Qazax Dövlət Sosial-İqtisadi Kollecin tələbəsi, gənc könüllü  Xuraman Muradova çıxış edərək44 günlük Vətən müharibəsində qazanılan şanlı qələbənin heç bir zaman unudulmayacağını və gələcək nəsillərə örnək olacağını  bildiriblər. 44 günlük Vətən müharibəsində qanları ilə tarix yazan İlkin kimi igid oğullarımızın xatirəsinin hər zaman əziz tutulacağını, qəlblərdə əbədi yaşayacağını söyləyiblər. 30 illik həsrətdən sonra düşmən tapdağında olan torpaqlarımızın Ali Baş Komandanın rəhbərliyi altında şanlı Ordumuz tərəfindən işğaldan azad olunduğunu, hər kəs tərəfindən Qələbə, Zəfər dolu anların bu gün də qürur hissi ilə xatırlandığını qeyd ediblər. Ölkə Prezidenti İlham Əliyev, Birinci vitse-prezident Mehriban Əliyeva və rayon rəhbərliyi tərəfindən şəhid ailələrinə, qazilərimizə göstərilən dövlət qayğısından söz açaraq bugünkü ziyarətin də məhz həmin qayğının davamı olduğunu diqqətə çatdırıblar. Gələcək nəsillərə şəhidlərimizi tanıtmağın ən ümdə iş olduğunu vurğulayıblar.

Əsgər Əliyev İlkin Bəxtiyar oğlu

 

Şəhid Əliyev İlkin Bəxtiyar oğlu 26 fevral 2001-ci il tarixdə Qazax rayonunun Canalı kəndində anadan olmuşdur. 2007-ci ildə Qazax rayon Canalı kənd tam orta məktəbin 1-ci sinifinə daxil olmuşdur. 2018-ci ildə həmin məktəbin 11-ci sinifini bitirmişdir. Uşaqlıqdan idmana daha çox maraq göstərirdi, yunan-roma güləşi ilə məşğul olurdu. Bir neçə dəfə birinci yerə çıxıb medallar da almışdı.

2019-cu ilin 3 aprelində Azərbaycan Respublikası Səfərbərlik və Hərbi Xidmətə Çağırış üzrə Dövlət Xidmətinin Qazax Rayon Şöbəsi tərəfindən Azərbaycan Silahlı Qüvvələrinə həqiqi hərbi xidmətə çağrılmışdır.

Vətən müharibəsi başlayandan bir neçə gün sonra İlkin Əliyevin xidmət etdiyi batareya müharibə bölgəsinə gətirilir. İlkinin döyüş yolu oktyabr ayının 2-dən Füzulidən başlayıb. Sonra bu yol Qubadlıdan, Xocavənddən, Şuşa ətrafından, Laçından keçib. "N” saylı hərbi hissənin artilleriya divizionun 1-ci batareyanın, 1-ci tağımın 2-ci topun komandiri əsgər Əliyev İlkin Bəxtiyar oğlu düşmənin texnikasının, canlı qüvvəsinin məhv edilməsində böyük igidlik və şücaət göstərib. O, 14.11.2020-ci il tarixdə Xocavənddə şəhid olmuşdur.16.11.2020-ci il tarixdə Hüseynbəyli kəndi ərazisində yerləşən Şəhidlər qəbiristanlığında dəfn olunmuşdur. Subay idi.   

Əliyev İlkin Bəxtiyar oğlu Prezident İlham Əliyevin 15 dekabr 2020-ci il tarixli Sərəncamına əsasən "Vətən uğrunda", 25 dekabr 2020-ci il tarixli Sərəncamına əsasən "Xocavəndin azad olunmasına görə", 24 iyun 2021-ci il tarixli Sərəncamına əsasən "Laçının azad olunmasına görə” medalları ilə təltif edilmişdir.




GOYEZEN.AZ



Facebook-da paylaş