Qazaxlı gənclər Vətən müharibəsi şəhidi həkim tibb xidməti leytenantı Adil Əfəndiyevin məzarını ziyarət ediblər
2020-ci
ilin 27 sentyabr tarixi Azərbaycan xalqının yaddaşına bizi böyük Qələbəyə, Zəfərə
aparan yolun başlanğıc tarixi kimi yazıldı. Qarabağ adlı haqq savaşımıza məhz o
gündən başladıq və 44 gün davam edən savaşda şanlı Azərbaycan Ordusu Silahlı
Qüvvələrin Müzəffər Ali Baş Komandanı İlham Əliyevin rəhbərliyi altında Qələbə
qazandı. 30 ilə yaxın işğal altında qalan torpaqlarımız müzəffər ordumuzun, əsgər
və zabitlərimizin şücaəti, qəhrəmanlığı sayəsində azad edildi. 10 noyabr tarixi
yaddaşlara Zəfər Günü kimi yazıldı. Ermənistan-Azərbaycan Dağlıq Qarabağ münaqişəsinə
son qoyan 44 günlük Vətən müharibəsi
Azərbaycanın qüdrətini, güclü dövlət olduğunu bütün dünyaya bir daha göstərdi. Bu
gün bir vətəndaş olaraq hər birimiz Qarabağ torpaqlarının erməni hərbi
birləşmələrindən təmizlənməsində canını fəda edən əsgər və zabitlərimizə
minnətdar olmalı, qanları ilə dastan yazan şəhidlərimizin ruhları qarşısında
baş əyməliyik. Vətən naminə döyüşən və yaralanan qazilərimizlə, canlarından
keçən şəhidlərimizlə hər zaman qürur duymalı, onları tanımalı və tanıtmalıyıq. Qazax Rayon
Gənclər və İdman İdarəsinin əməkdaşları və könüllüləri də
Vətən uğrunda canından keçən şəhidlərimizi hər zaman yad edir, əziz xatirələrini
dərin ehtiramla anırlar. Öz
ənənəsinə sadiq qalan gənclər bu dəfə Vətən müharibəsində şəhidlik zirvəsinə
ucalan, ölümündən sonra "Vətən uğrunda”, "Şuşanın
azad olunmasına görə”, "Hərbi xidmətlərə görə”, "Füzulinin azad
olunmasına görə”, "Xocavəndin azad olunmasına görə” medalları ilə təltif olunmuş şəhid tibb
xidməti leytenantı Əfəndiyev Adil Qədir oğlunun məzarını ziyarət ediblər. Şəhidimizin məzarına gül
dəstələri qoyularaq ruhuna dualar oxunub. Qazax Rayon
Gənclər və İdman İdarəsinin rəisi Vüqar Nəbiyev bildirib ki, 44 günlük Vətən müharibəsidünya ictimaiyyətinə Azərbaycan Ordusunun nə qədər qüdrətli
ordu olduğunu, hərbçilərimizin döyüşlərdəki peşəkarlığını, qəhrəmanlığını və məharətini
göstərdi. V.Nəbiyev 30 illik həsrətdən sonra düşmən tapdağında olan
torpaqlarımızın Ali
Baş Komandanın qətiyyətli rəhbərliyi ilə Şanlı Ordumuz tərəfindən işğaldan azad
olunduğunu, hər kəs tərəfindən Qələbə, Zəfər dolu anların bu gün də qürur hissi
ilə xatırlandığını qeyd edib. Böyük zəfəri bizlərə bəxş edən Adil kimi qəhrəman
oğullarımıza bir ömür boyu borclu olduğumuzu, bütün şəhidlərimizin əziz
xatirələrinin daim yad olunacağını, qəlbimizdə əbədi yaşayacaqlarını
vurğulayıb. Ölkə Prezidenti İlham Əliyev, Birinci vitse-prezident Mehriban
Əliyeva və rayon rəhbərliyi tərəfindən şəhid ailələrinə, qazilərimizə
göstərilən dövlət qayğısından söz açan V.Nəbiyev bugünkü ziyarətin də məhz
həmin qayğıya söykəndiyini, bu məqsəd və amala xidmət etdiyini diqqətə çatdırıb.
Gələcək nəsillərə Adil kimi igid oğullarımızı tanıtmağın ən ümdə iş olduğunu
söyləyib. Qəhrəman şəhidimizin anası Afət Əhmədova övladının xatirəsini əziz
tutduqlarına, yad etdiklərinə görə gənclərə razılığını bildirib. Şəhid anası
kimi tək övladı Adillə deyil, bütün şəhidlərimizlə fəxr etdiyini dilə gətirib.
Adilin tək qazaxlıların oğlu deyil, bütöv Azərbaycanın övladı olduğunu söyləyib.
Bugünkü ziyarəti Adilin timsalında bütün şəhidlərimizə olan ehtiramın bariz
nümunəsi kimi göstərib. Tibb xidməti
leytenantı Əfəndiyev Adil Qədir oğlu Şəhid Adil Əfəndiyev 12 avqust 1995-ci ildə Qazax şəhərində anadan
olmuşdur. 2001-ci ildə Qazax şəhər Mehdi Hüseyn adına
humanitar və təbiət fənləri üzrə məktəb-liseyin 1-ci sinfinə daxil olmuş, 2012-ci ildə həmin məktəb-liseyin 11-ci sinfini
bitirmişdir. 2012-ci ildə Azərbaycan Tibb Universitetinə daxil olmuşdur.
2018-ci ildə Azərbaycan Tibb Universitetinin Hərbi Tibb fakültəsinin "Hərbi həkim
işi” ixtisasını bitirmişdir. Təyinatla Naxçıvan Muxtar Respublikasının Culfa
rayonunda həkim kimi hərbi xidmətə başlamışdır. "N” saylı hərbi hissənin qərargah
və təchizat bölüyünün tibb məntəqəsinin rəisi, tibb xidməti leytenantı Adil Əfəndiyev
22.10.2020-ci il tarixdə Füzuli-Cəbrayıl-Xocavənd rayonları istiqamətində
gedən döyüşlərdə qəhrəmancasına şəhid olmuşdur. Qəhrəman şəhidimiz 25.10.2020-ci ildə Qazax şəhər qəbiristanlığında
izdihamla dəfn edilmişdir. Subay idi. 25 yaşında Şəhidlik zirvəsinə yüksələn tibb xidməti leytenantı Adil Əfəndiyevin döyüş
meydanında göstərdiyi igidlik ölkə Prezidenti tərəfindən də yüksək qiymətləndirildi.
O, ölümündən sonra cənab Prezident İlham Əliyevin 15 dekabr 2020-ci il tarixli
Sərəncamına əsasən "Vətən uğrunda” və 29
dekabr 2020-ci il tarixli Sərəncamına əsasən "Şuşanın
azad olunmasına görə”, 30 dekabr 2020-ci il tarixli
Sərəncamına əsasən "Hərbi xidmətlərə görə”, 24 iyun 2021-ci il tarixli Sərəncamlarına
əsasən "Füzulinin azad olunmasına görə”, "Xocavəndin azad olunmasına görə” medalları ilə təltif olunmuşdur.
GOYEZEN.AZŞəhidlərimizi tanıyaq və
tanıdaq---------------------------------------
Facebook-da paylaş