Respublika fənn olimpiadalarının ilk mərhələsi keçirilib
Bu
gün ölkənin bütün şəhər
və rayonlarında 2018-2019-cu tədris ili üçün məktəblilərin Respublika fənn
olimpiadalarının birinci - rayon (şəhər) mərhələsi keçirilib. Azərbaycan
Respublikası Təhsil Nazirinin 12 dekabr 2014-cü il tarixli 1256 nömrəli Əmri
ilə təsdiq edilmiş məktəblilərin fənn olimpiadalarının təşkili və keçirilməsi
qaydalarına uyğun olaraq keçirilən bilik yarışında 9,10,11-ci, həmçinin xüsusi istedada
və hazırlığa malik 8-ci sinif şagirdləri iştirak ediblər. Respublika fənn olimpiadaları
Azərbaycan dili və ədəbiyyat, riyaziyyat, fizika, kimya, biologiya,
informatika, tarix, coğrafiya fənləri üzrə keçirilib. Olimpiadanın rayon
(şəhər) mərhələsində şagirdlərə fənlər üzrə qapalı test formatında 25 sual
təqdim edilib. Fənn
olimpiadalarının keçirilməsində əsas məqsəd ayrı-ayrı fənlər üzrə istedadlı uşaqların
aşkar edilməsi, şagirdlərdə fənlərə olan marağın artırılması və özünə
inam hissinin gücləndirilməsi, onların sağlam rəqabət mühitində öz bilik və
bacarıqlarını nümayiş etdirmələrinə imkan yaradılmasından ibarətdir. Respublikamızın
hər yerində olduğu kimi, Qazax rayonunun ümumtəhsil məktəblərinin 9,10,11, eləcə
də 8-ci sinif şagirdlərinin iştirakı ilə fənn olimpiadasının rayon mərhələsi
təşkil olunub. Qazax
rayon Təhsil şöbəsindən GOYEZEN.AZ saytına bildirilib ki, şəhər Mehdi
Hüseyn adına humanitar və təbiət fənlər təmayüllü məktəb-liseydə keçirilən fənn
olimpiadasının rayon mərhələsində 9-cu siniflər üzrə 131 nəfər, 10-cu siniflər
üzrə 159 nəfər, 11-ci siniflər üzrə 160 nəfər, 8-ci siniflər üzrə 3 nəfər, ümumilikdə,
453 nəfər şagird iştirak edib. Olimpiadada
Azərbaycan dili və ədəbiyyat fənni üzrə 127, riyaziyyat fənni üzrə 102, fizika
fənni üzrə 50, kimya fənni üzrə 33, biologiya fənni üzrə 30, informatika fənni
üzrə 8, tarix fənni üzrə 61, coğrafiya fənni üzrə isə 42 nəfər şagird öz bilik
və bacarığını sınayıb.
Facebook-da paylaş