Vətən müharibəsində şəhid olan qazaxlı çavuş Xaliddin Veyislinin xatirəsi oxuduğu məktəbdə də anılıb
Şəhidlərimizi tanıyaq və
tanıdaq--------------------------------------- 27 sentyabrdan
başlayıb 10 noyabrda tarixi Qələbə ilə başa çatan 44 günlük Vətən müharibəsindən
xeyli vaxt keçməsinə baxmayaraq bu gün də bütün dünya Silahlı Qüvvələrin Ali
Baş Komandanı İlham Əliyevin rəhbərliyi altında müzəffər Azərbaycan Ordusunun
döyüş meydanında qazandığı həmin tarixi Qələbədən, böyük Zəfərdən danışır. O
müharibə ki, torpaqlarımızı 30 ilə yaxın işğal altında saxlayan düşmən döyüş
meydanında Azərbaycan Ordusunun gücünü, qüdrətini gördü. Hərbçilərimiz, əsgərlərimiz
göstərdikləri şücaətlə, qəhrəmanlıqla bütün dünyaya sübut etdilər ki, Azərbaycanın
güclü ordusu var. Ən əsası da həmin ordu öz torpağımızda vuruşaraq, öz torpağımızı
qorudu və işğalçıları öz torpaqlarımızdan qovdu. Ali Baş Komandanın "İrəli!” əmrini
layiqincə yerinə yetirərək Vətən torpaqlarının ərazi bütövlüyünü bərpa edən hərbçilərimizə,
əsgərlərimizə, canından keçən şəhidlərimizə, onların ailə üzvlərinə diqqət
ayırmaq, qayğı göstərmək hər birimizin borcudur. Şəhidlərimizi tanımaq və
tanıtmaq hər kəsin ən ümdə işi olmalıdır. Qazaxda
şəhidlərimizin xatirəsi hər zaman əziz tutulur. Vətən uğrunda canından keçən
oğul və qızlarımızın xatirəsi daim yad olunur, şəhidlərimizin keçdiyi şərəfli
döyüş yolu gələcək nəsillər üçün örnək göstərilir. Bu gün Səlim Əfəndiyev adına Qazax
şəhər 1 nömrəli tam orta məktəbin məzunu olmuş, Vətən uğrunda canından keçərək Şəhidlik zirvəsinə ucalan qəhrəmanımız çavuş Veyisli
Xaliddin Zərgər oğlunun əziz xatirəsi yad olunub. Şəhidimizin valideynlərinin, məktəblilərin iştirakı
ilə keçirilən görüşdə igid Vətən oğlunun məktəb illərinə, döyüş yoluna nəzər
salınıb, şəhidimiz haqqında olan xoş xatirələr şagirdlərə çatdırılıb. Qazax Rayon İcra Hakimiyyəti
başçısı aparatında İctimai-siyasi və humanitar məsələlər şöbəsinin baş məsləhətçisi
Gülnar Quluyevanın və Rayon Təhsil Şöbəsinin müdir
müavini Əziz Məmmədovun, məktəb direktorunun iştirak etdiyi tədbirdə şəhidlərimizə
həsr olunmuş şeirlər səslənib, şəhidlərimizin xatirəsi dərin ehtiramla yad
olunub. Tədbirdə çıxış edənlər ölkə
Prezidenti, Ali Baş Komandan İlham Əliyevin rəhbərliyi altında 44 günlük Vətən
müharibəsində qüdrətli Azərbaycan Ordusunun qazandığı tarixi Qələbədə payı olan
Xaliddin kimi qəhrəman oğullarımızla bu gün hər birimizin fəxr etdiyini
bildiriblər. 44 günlük savaşda əldə etdiyimiz şanlı
Qələbəyə görə şəhidlərimizə, yaralı qazilərimizə bir ömür boyu borclu
olduğumuzu söyləyiblər. Vətən
uğrunda canından keçən şəhidlərimizin Vətən, torpaq naminə göstərdikləri qəhrəmanlıqların
məktəblilər üçün nümunə olduğunu, gələcək nəsillərin şəhidlərimizin
döyüş yolunu öyrənərək vətənpərvər ruhda böyüməsində bu cür anım tədbirlərinin böyük
rolu olduğunu qeyd ediblər.
Məktəb
direktoru Bəsdi Ələkbərova və müəllimlər məktəbin yetirməsi olan Xaliddin
kimi oğullarımızla fəxr etdiklərini, şəhidlərimizin valideynləri qarşısında baş
əydiklərini bildiriblər. Şəhidlərimizin xatirəsinin hər zaman əziz
tutulacağını, onların daim qəlblərdə yaşayacaqlarını söyləyiblər. Şəhidimizin atası Zərgər Veyisov, anası Natella Qocayeva övladlarına göstərilən diqqət və qayğıya
görə ölkə başçısı İlham Əliyev başda olmaqla, rayon rəhbərliyinə minnətdarlıqlarını
bildiriblər. Pandemiya və müharibədən sonra məktəblərdə keçirilən ilk dərsin
övladlarına, eləcə də Vətən müharibəsi şəhidlərinə həsr olunmasını yüksək qiymətləndiriblər.
Bu tədbirin təşəbbüskarı olan Qazax Rayon İcra Hakimiyyətinin başçısı Rəcəb
Babaşova təşəkkür ediblər. Bugünkü anım tədbirini rayon rəhbərliyinin şəhidlərimizə
olan növbəti qayğısı kimi dəyərləndiriblər. Övladlarının daim qəlblərdə
yaşaması üçün bu cür anım tədbirlərini təşkil edən və əməyi keçən hər kəsə
razılıqlarını ifadə ediblər. Sonda məktəblilər şəhidlərimizə həsr olunmuş şeirlər söyləyərək onlara
olan ehtiramlarını bildiriblər. Çavuş Veyisli Xaliddin Zərgər
oğlu
Şəhid Xaliddin
Veyisli 14 sentyabr 1981-ci ildə Qazax rayonunda anadan olmuşdur. 1987-ci ildə
Qazax şəhər Səlim Əfəndiyev adına 1 nömrəli tam orta məktəbin 1-ci sinfinə
daxil olmuş, 1998-ci ildə həmin məktəbin 11-ci sinfini bitirmişdir. 1999-cu
ildə Səfərbərlik və Hərbi
Xidmətə Çağırış üzrə Dövlət Xidmətinin Qazax Rayon Şöbəsi tərəfindən həqiqi
hərbi xidmətə çağırılmış, 2001-ci ildə hərbi xidməti
başa vurmuşdur. 2008-ci ildən Azərbaycan Silahlı Qüvvələrinin "N” saylı hərbi hissəsində müddətdən artıq həqiqi hərbi xidmət hərbi qulluqçusu (MAHHXHQ)
kimi xidmətdə olmuşdur. Çavuş Xaliddin
Veyisli 26.10.2020-ci ildə qəhrəmancasına şəhid olmuşdur. 27.10.2020-ci ildə
Qazax şəhərindəki Şəhidlər qəbiristanlığında izdihamla dəfn edilmişdir. Ailəliydi.
Jalə adlı qız, Fəqan adlı oğul övladı yadigar qalıb. Qızı Jalə Veyisli Qazax şəhər Mehdi
Hüseyn adına humanitar və təbiət fənləri üzrə məktəb-liseyin VII, oğlu Fəqan
Veyisli isə V sinif şagirdidir. Bütün şəhidlərimiz kimi Xaliddin Veyislinin də göstərdiyi şücaət dövlətimiz,
ölkə rəhbəri tərəfindən yüksək qiymətləndirilib. Medallarla təltif olunan şəhidlərimizin
arasında şəhid çavuşumuzun da adı var. Xaliddin Veyisli ölümündən sonra cənab
Prezident İlham Əliyevin 15 dekabr 2020-ci il tarixli Sərəncamına əsasən "Vətən
uğrunda”, 18 dekabr 2020-ci
il tarixli Sərəncamına əsasən "Döyüşdə fərqlənməyə görə” və 25 dekabr 2020-ci il tarixli Sərəncamına əsasən "Füzulinin azad
olunmasına görə” medalları ilə təltif edilmişdir. GOYEZEN.AZ
Facebook-da paylaş